Romanos 3:4-19

⁴Metha jan tsipae: “¡Jume, apara Nacom bapana jopa baxua exanae! Apara jame Nacom daxitan pexainyeiwantha exaneiba. Nacom bewa exaneibina baxuan bara bequein jiwi pemuxuitorobi jiwi. David baxua yabara paeba Nacom Pejume Diwesitha xua Nacom tapaebatsi, jeye: ‘Nacom, poxonae cueicueijam jiwi yaputaena xua xam xainyeya bara nepaebin. Bapoxonae jiwi jume amanayabame poxonae baxua exaname poxonae bequein jiwi cayabara paeba xua abe exaname’, jei David Nacom Pejume Diwesitha”, jan tsipae.

⁵Ichitha metha ichamonae jume coxonaya najume matsontsonobichipa jei tsipae: “Poxonae waxainchi abe exanatsi bapoxonae Nacom naca atene exana. Abe waexanae coyenewantha jiwi tsita itapeinya xeinatsi xua bara Nacom aichaxaibi abe peexanae coyenewa xua bara Nacom xanepanaya peexanaein. Daxota abe waexanae coyenewatha Nacom yawenatsi. ¿Eta xua metha yabara paebinchi baxua? ¿Metha Nacom jopa xaniwaicha exanaeyo icha naca atene exana abe peexanae cuiru coyene waexanaexae?” jei tsipae barapomonae, xua saya paeba icha jiwi ichi pomonae jopa peyaputae jiwi.

⁶Metha barapomonae jume notsipan, jan tsipae: “¡Jume apara, baxua jopa xainyeyo! Icha Nacom jopa xaniwaichiya exanaetsipae poxonae naca yabara paeba xua penatsicuentsiwa bapoxonae jopa itacʉpaetsipaetsi xua daxita yabara paebatsi jiwi xua penatsicuentsiwa xua abe peexanae cuiru coyene peexanaexae. Ichitha Nacom apara xaniwaichiya exana daxota itacʉpatsi xua daxita jiwi yabara paebatsi penatsicuentsiwa”, jan tsipae.

⁷Metha ichamonae jei tsipae: “Nacom jopa bewa naca yabara paebi penatsicuentsiwa tsane wanaca yabara paebinexa xua abe waexanaewan poxonae naerabiya cueicueijeichi. Poxoru poxonae naerabiya cueicueijeichi ichamonae tsita itapeinya xeinatsi xua Nacom seicaya exana xua Nacom bichocono xainyeya pepaebin xuano xua Nacom bara peainya cuin”, jei tsipae barapomonae.

⁸Ichamonae irʉ jei tsipae: “Daxota waxainchi bewa abe exanaeinchi, xua watsita itapeinya xeinaenexa xua Nacom bara xainyeya pepaebin”, jei tsipae barapomonae. Barapomonae naerabiya paeba xua pinae xan barapo coyene cuiduban ichamonae. Barapo naerabiya pepaebiwi xua neyabara jume caenaeraba, barapomonae Nacom tsita natsicuentinchi abe taneyabara paebixae.

⁹¿Waxainchi pomonae judiomonaetsi Nacom tsitatsi xua jopa wanatsicuentsi jiwichi xua beyacaincha pomonae jopa judiomonae naexanaeyo xua naca toxeinchiya bichocono abe peexanaewi? Jume. Tsipei bayathaunxuae paeban: “Waxainchi judiomonaetsi irʉ pomonae jopa judiomonae naexanaeyo daxitatsi abe waexanae jiwichi”, jan.

¹⁰Nacom Pejume Diwesitha baxua yabara jeye: “¡Dapomonae ajibi pomonae xua xanepanaya peexanaewi, xua mataʉtano bara caeinno!

¹¹Mataʉtano dapon ajibi pon ichichipa xua peyabara yaputaewa pexainyei coyenewa. Mataʉtano dapon ajibi pon xua ichichipa penaponaewa Nacomtha.

¹²Daxita jiwi Nacom pentatsi yawano abe peexanae jiwi bichocono. ¡Dapon ajibi pon xua xanepanaya beta exana, xua mataʉtano bara caeinno!

¹³Barapomonae caunuta nawita pocotsiwa peabe jumein, icha mʉthʉ tsina ichi xua cawenabeina xua tuxamna baxoyareca pebocarecaexae pon tʉpa. Bapomonae pepaebiwantha ichamonae muxujainyabeibatsi. Barapo pepaebiwantha ichamonae ajʉntʉcoyenetane exanatsi, icha jomo ichi xua ichʉn sinatsi poxonae bichocono atene exanatsi pewano tsapa pexeinaexae.

¹⁴Barapomonae saya ʉ cueicueijei xua xuan peabe jumein, po jumein xua atsaca pepaebiwa.

¹⁵Barapomonae bichocono ichichipa nawita xua ichamonae bichocono atene peexanaewatsi xuano xua pejutebiwatsi.

¹⁶Daxita ichaxota poneiba barapomonae, ichamonae abe exaneibatsi. Mataʉtano exaneiba pocotsiwa ichamonae ajʉntʉcoyenetane cana exanatsi.

¹⁷Barapomonae jopa yaputaeyo xua po coyene caemonae nantiya jʉntema jinompa penaexanae coyenewa.

¹⁸Mataʉtano barapomonae jopa cunuwiyo Nacom xua abe peexanaeyainwatsi”, jei Nacom Pejume Diwesitha.

¹⁹Waxainchi yaputainchi xua daxita Nacom paeba Moisés pia peitorobi coyenewatha baraxua judiomonae nexa. Barapomonae bewa exanae Moisés pia peitorobi coyenewa tatsi. Ichitha judiomonae jopa itacʉpaetsi xua peexanaewa barapo coyenewa. Barichi pomonae jopa judiomonae naexanaeyo jopa itacʉpaetsi xua peexanaewa baxua. Barapo coyeneya Nacom yaputane exana xua daxita jiwi jopa pepaebinexa xua pinae jopa abe peexanaewa barapo jiwi. Mataʉtano Nacom tsita itapeinya xeina jiwitha xua Nacom yabara paebina xua penatsicuentsiwa daxita jiwi xua abe peexanaexae bapontha.