Roma 3:4-19

⁴Iya! Imba bu hi di Abachi à di da ure ukurr ku, anishirr ngga a si abi ki imu. A charr na angbamvu ka Abachi di, “Meme yo, ùwà ti re ure, anishirr a bu hi di ure umuwa ku u si ujiji, aba a ti gri ùwà na kuma na abubo ibre amu, aba ta ku kpanye nu ure umuwa ku.”

⁵Ina ndanda imunta yi i ti du anishirr a hi uzizi ku Abachi, inta i ta gru ri anta na ba da angginggi? Inta ka da di Abachi à na ndanda mu nu nggo inta ti kpala, uwa vu inta farr nggo? (Uwanggo a si izhi inggi yi nggo anishirr a ta zhi nggo.)

⁶Iya! Abachi ka ti si si uni di na uzizi hen, à ka si bre ku ingbingbru inggi yi amu hen.

⁷Iki imu imungga yi i ti du ba hi inkpinkpye ni tsarr ijiji i Abachi yi, anggi mu i du imba i da di ingga i si uni la ure?

⁸Anggi mu i du imba da di, “Di inta na undanda, wre ki inta bu kpa uzizi?” Abanu a glo ingga na marr ingga da aba a wo ingga nggo i da meme. A taka lo ba nggo azhibarr a ilo wa a ti ma ba.

⁹Meme nggo, inta ta da da angginggi zizo? Na ti inta ani Yahuda ka da di inta mu i mri abangga ba nggo a si si ani Yahuda nggo hen? Iya! Ingga i ka da ni ime̱me̱ yi ba di ani Yahuda na abangga ba nggo a si si ani Yahuda hen a du ila ure i lo ba gri kyekye.

¹⁰Angbamvu ka Abachi ka a da meme yo di: “Undurr uyirr uni na uzizi à sama, undurr uyirr mi sama;

¹¹undurr uyirr u krizhizhi ni di zha du uwa ta hi Abachi à sama.

¹²Aba wemi a ka kasarr ni ga Abachi yi ba; na di na umimi wemi, uyirr mi uni na uzizi a sama na ba, undurr uyirr sama.”

¹³“Are ambarr ka sa ka ngu unushirr, imu imimi nggi i di ssuzzu zhi ni irrirri imbarr yi.” “Ibarr angu imbarr yi i so di gri ukpakpa are nggo si nâ ta si itsɨ i ìwǎ nggi.”

¹⁴“Are ambarr ka a tsarr ssu ni ukpakpa imarr.”

¹⁵“Aza ambarr ka a so di ki korr ni ka ayiyi kahre.

¹⁶A ti ka ba nu momo mi, angba ndanda a so ga ba.

¹⁷A si hi iso su hen.”

¹⁸“A si di kru isisu i Abachi hen.”

¹⁹Ziza nggo inta hi di aseki ka nggo a charr ka na angbamvu ka Abachi ka nggo, a charr aseki akama ku abangga ba nggo are ka Abachi ka so hru ba nggo. A charr are ka wre ku anishirr bu ttu angu na si da inkindirr hen. A ti na inkindirr indanda Abachi a ta vu abi ingbingbru ba wemi.