Romu 15:9-21

⁹Sira me, God ano munnewa gumbe, Ju onan igiyawa gaibu God waiyatan oya. Meib tenewa mina, “Meoya ne Ju onan igiyawa danave ne ge watdega gentna, sira ivugwa gumbe bererin tog waiya gentna.”

¹⁰Sira mameib tene, “Ju onan igiyawa, Ayapan igiyawa gaibu degadega aya.”

¹¹Sira tenewa, “Ju onan igiyawa undag, Ayapan watdega aya. At undag igiyawa, bererin tog watdega waniya.”

¹²Sira Aisaya mame waivi, “Jesi taiwa meuma matai dauwag yoipe. Me apan me Ju onan igiyawa amara muntan oya wan yoipewa. Ju onan igiyawa me gumbe owanowan avigimpe.”

¹³Ne aib anoeni, Owanowan Goddeba me degadega undag ge yum undag anotumat gumbe ye yempe guniyap noidauwape, sira Guwawa Iyakaisiyapama yusiwa gumbe ye owanowan yempe guniyap noidauwape.

¹⁴Tatangwanen. Ne aib yusipamit anoeni. Ye guniyap oraiminavitwa noidauwane, ye guniyap anoano noidauwane, sira ye oma ane gara toewanewan ene.

¹⁵Ne upeba yusipamit tena. Me ye yaug anoigimtanwa oya.

¹⁶Kuiyawa God gumbe ne ano oraiwa auna, Ju onan igiyawa munan Keriso nauwawa abnawa atan oya. God gae oraiwa gumbe, ne pirisi nauwawa eni. Me Ju onan igiyawa mu God puyo maeba me Guwawa Iyakaisiyapama gumbe iyakaisi anewa ape oya.

¹⁷God nauwawa eni oya, ne Keriso gumbe degadega eni.

¹⁸God ne anegivi. Me ne gunap Keriso ane Ju onan igiyawa mokona aya oya. Gae upeba watan me den anoeni. Keriso nau ane gae ge anoano atanwa gumbe.

¹⁹Sira me nau ane, yautanwa ge irayauyau yusiwa gumbe sira Guwawa yusiwa gumbe. Meib ne Keriso gaiyawa oraiwa wateteyameni, Jerusarem apa onne Iririkam at undag.

²⁰Mame mina, ne den sina iyayapan upeba wait nium barauya arawa egave. Kuiyawa ne imunap, ne gae oraiwa wateteyampna Keriso iviwa den yaug anoya arawa apa.

²¹Me mamaib tenewa mina. “Me gumbe bira da den wane anoyawa yaupe, sira den anoya igiyawa yaug anope.”