9Ka en sise enek, Iesu sakin koakeil emun arvitei Siu keke akilea avamasmas Ahi ven enmahisien koa rie lati min keil. Koanik suval asa koa Tus Votut viteni koa vit, “Sakini, inau nihitehit usil tahosien onom min koakeil arvitei Siu, ka nihati lat isom hetal min masmasien.”
10En out sav viteni vit, “!Kami koa mirvitei Siu, mihesi kami hetal min meatin keil onen Ahi!”
11Ka en out sav tamun viteni vit, “Kami vasi koa mirvitei Siu, mihemasmas Iahova. !Anatin, meatin vasi keil, mihemasmasi!”
12Ka en avong tamun, provet Aesea vit luvati vit, “Meatin tai koa heka en vatiamal onen asuv houlu Deved hekistal hemai. Kei hemai helosil kat koakeil arvitei Siu, ka keil iling desien one eni.”
13Navisi keke Ahi, koa romul roling desien orer mul ien, hesakin kami mihehilelau en sien vasi keil ka miheto en tomat ven demkatien koa mikuri. Navisi houmoni vasakin desien onami eni hemai hekeih imok heka en keihoen onen Ninin Votut en moulien onami.
14Tuak ka ahinkuli keil, inau nakilea keke kami mivilelau en tounah keil tetahos, mivilelau en ileleien vasi keil, ka mikilea mivahisein kami eris.
15Ka en leta koanik, nasel kat kami keih usil tounah tei keke masisil eni min kami. Ka namumoni mukonek veni Ahi, koa rie lat more envatien minau, san mormore umen enek minau.
16Kei ling nau mahi meatin toumien onen Iesu Kristo keke moum vatal min koakeil arvitei Siu. Anatin, namum ral min keil suval navi pris tai onen Ahi keke mahitehiten more longlongien onen min keil, ka nasan moulien one mini suval sanien votut tai vaha mini. Veni kei rie lat keil avahi onen navong san Ninin Votut min keil.
17Ka veni nakapil vituai ral min Iesu Kristo, nakilea mahasi nau ven umen koa namumoni ven Ahi.
18Ka nihasi nau en tounah keil enges koa Kristo mumoni ka enau koa mulamun koakeil arvitei Siu avalong kat Ahi. Iesu mumon koanik ka enau ral min selusien ka umen keil,
19ral min keihoen ten merikel ka metai sav keil, ka ral min keihoen onen Ninin onen Ahi. Sakini, nuva namum en out vasi keil keke mahitehiten vasin more longlongien usil Kristo min meatin keil, en out Serusalem va soutin rokol provins ten out Ilirikam.
20Lisenges, ek vati maha mahitehiten more longlongien enek en out keil koa meatin keil arlongtei veah usil Kristo eni. Namumoni mukonek veni ek rovattei maha moum en out koa meatin sav tai mul mum ien tuai.
21Koanek musil asa koa Tus Votut viteni navong vit, “Keil ilei kilea en kei koa arlongtei veah usili, ka indem kilea suk tounah keil areingeingeni veah mulamu.”
Rom 15
Rom 15:9-21