Loomë 15:9-21

⁹Nöö a ko a goonliba fu dee oto köndë sëmbë na u Isaëli tu, fu de sa si di gaan tjalihati u Gadu di a abi, be në fëën bai. Ja sabi fa wan sëmbë sikifi a di Buku ö, u dee sëmbë na Dju. A fan ku Gadu taa: Fëën mbei mi o gafa i në a dee oto köndë sëmbë dendu dee na Dju. Mi o ta kanda ta bai di në fii. Sö a sikifi a di Buku e.

¹⁰Nöö de sikifi tu taa: Un musu ta wai seei, un dee sëmbë na Dju. Un mökisi ku dee sëmbë u Gadu ta wai.

¹¹Nöö hën de toona taki möön taa: Hii un dee sëmbë na Dju, un hopo Masa në e. Hii un dee föluku tuu, un musu ta kanda dëën.

¹²Nöö söseei Jesaaja taki wan soni u dee sëmbë na Dju tu. A taa: Dee böngö u Isai, ee i si de joo taa de kaba a goonliba. Biga de ko dë kuma wan pau de koti tee fika lutu wanwan. Ma te wan pisi di lutu dë o booko wojo toona nasi ko. Nöö fa a o nasi dë, nöö hën o ko dë Tiima a hii pei föluku liba. Nëën liba hii dee oto köndë sëmbë na Dju o buta de futoou fu de feni heepi. Sö Jesaaja bi taki e.

¹³Nöö da sö e, dee sëmbë. Di Gadu di ta buta sö wan gaan biibi a u hati aki taa a o heepi u nöömö, hën musu fuu unu hati ku piizii e, ku kötöhati, fa i si un ta futoou ën naandë. Fa di Akaa fëën abi kaakiti tjika dë, hën musu ta wooko a unu liba mbei un fika ta mëni nöömö taa Gadu o du dee soni dee a bi paamusi.

¹⁴Dee sëmbë o, fa mi dë aki mi sabi gbelingbelin a mi hati taa un ta du sömëni bumbuu soni kaa. Mi sabi taa un sabi soni te tjika, nöö un abi di köni tu fuun sa lei unu na unu.

¹⁵Ma tökuseei mi mbei di pampia aki da unu nöö. Dee soni mi sikifi aki, mi fan so u de gbelin seei. Ma fëëë u taki de, fu di mi bi kë toona mëni unu de a bakafutu. Nöö di soni mbei mi du sö, fu di Gadu tei mi buta a sö wan gaan wooko ku ën bunuhati.

¹⁶A buta mi u mi ko wan futuboi u Keesitu Jesosi ta tja di bunu buka fëën ta konda da un dee oto sëmbë na Dju. Mi dë kuma wan mindima fuunu ku Gadu, fu mi sa hopo unu kuma wan suti paima tja go dëën. Nöö di paima aki, a dë wan paima di di Akaa fëën seei seeka buta dëën apaiti.

¹⁷Nöö fa i si mi ku Jesosi Keesitu nama aki, nöö mi ta hopo di wooko Gadu da mi u mi du dëën e. Mi ta kai ën gaan soni seei.

¹⁸Nöö te mi ta konda soni, ma ta tei na wan soni u miseei ta konda. Ma mi ta konda dee soni dee ˻Jesosi˼ Keesitu bi du a mi liba. Biga a tei dee fan dee mi fan ku dee soni dee mi du hën a du gaan soni ku de, tee sömëni u dee sëmbë na Dju ko piki Gadu buka seei.

¹⁹Ka di Akaa fëën abi kaakiti tjika dë, a mbei sömëni gaan foombo soni pasa, u lei taa hën abi di wooko. Nöö sö mi bi dë ta konda di bunu buka u ˻Jesosi˼ Keesitu ku telu a hii kamian ka mi bi waka. A Jelusalen naandë mi seti, nöö hën mi ta kondëën ta lontu a dee kamiankamian tee go dou a di pisiwata de kai Iliikum.

²⁰Hii fa mi du ën dë, mi ta biinga u konda di buka nöömö a dee kamian ka de an bi jei di në u ˻Masa Jesosi˼ Keesitu wan daka eti, fu an musu dë kuma mi tei wan wosu ta mbei di wan oto sëmbë bi seti kaa.

²¹A dë leti kumafa di Buku taki taa: Te ka sëmbë an konda di buka wan daka nöö na ala de o ko jei ën. Dee sëmbë dee an bi jei ën wan daka o ko fusutëën. Wan si ö?