Waroma 15:9-21

⁹ili nawo iwanu iwali si Wayahudi wamtunitse Imulungu kwa libatsi lyake. Ka Ghamaandiko Mahenzeluka pfagholonga Apfo nitsokutunitsa mghati mwe iwanu we isi tsingi, Nitsakwimba kulitunya taghwa lyako.

¹⁰Kuya Ghamaandiko gholonga, “Mdeng'elele mwemwe iwanu imli si Wayahudi; mdeng'elele hamwe ne iwanu wake.”

¹¹Kuya Ghamaandiko gholonga, “Mumtunye Imtwatsa, mwemwe iwanu imli si Wayahudi bae, Mumtunye yeye, mwemwe makabila ghose!”

¹²Kuya Isaya kolonga, Mlukolo mwa Yese katsolawila imunu, naye katsowatawala kolo tsose. iwanu iwali si Wayahudi nawo watsomlolela.

¹³Imulungu yane lolelo, yamwing'eni ndeng'elelo na tindiwalo ka pfamtoghola, lolelo lyenu lyongetseke kwa ngupfu ya Ghumuhe Mwenzeluka.

¹⁴Nene imwenyegho nomanya ghendo ka mwemwe ndughu tsangu mnogha sideke na mwomanya ghose, na mwodaha kwilangulitsa wenyegho.

¹⁵Mne ibaluwa ino tsanimwandikilani pfinu pfingi bila kupfuka, nidahe kumkumbusani keli. Tsanenda apfo kwa uluso we Imulungu kuna nene.

¹⁶Imulungu Kanisaghula niwe mtumighwa wa Yesu Kiristu kwe iwanu iwali si Wayahudi bae. Nosang'ana ka mlapfa nambiko mna ukupeta Imbuli Inoghile ye Imulungu, ili iwanu si Wayahudi wadahe kuwa nambiko iitogholighwa ne Imulungu, nambiko iideghesighwa na Ghumuhe Mwenzeluka.

¹⁷Apfo kwa kwilunga na Yesu Kiristu, neghodela isang'ano yangu kwaajili ye Imulungu.

¹⁸Nitsolonga bila kupfuka aghala ghayatendile Kiristu kubitila nene mna ukuwalongotsa iwanu iwali si Wayahudi wamtegheletse Imulungu. Katenda apfi kwa kulonga na kwa kutenda,

¹⁹na kwa ngupfu ya pfitango pfa kukangawatsa na kwa ngupfu ye Ghumuhe we Imulungu. Apfo mne ghumwanza wangu kulawa Yerusalemu mbaka ghumkowa ghwa Iluriko, chila hanu niwapetela iwanu Imbuli Inoghile ya Kiristu.

²⁰Chonibama nene ghamatsuwa ghose nipete Imbuli ye Imulungu mne isi tsila ng'ana Kiristu yamanyike bae, ili ndeke kutsenga mna lukwalambatsa lwikighwe ne imunu yungi.

²¹Ka Ghamaandiko Mahenzeluka pfogholonga, “Awala ng'ana walongelighwe mbuli tsake, watsakona, na awala ng'ana wahulike bae mbuli tsake, watsomanya.”