Loma: 15:9-21

⁹mo Diendaili wanda꞉halima꞉ta꞉ Koda꞉ ipika꞉ a꞉ta꞉ma꞉ homa꞉la꞉eki minolo hata꞉ Koda꞉na꞉ pi laena꞉yeke epeekeme. Hande Baibolo bukana꞉ wape pa꞉la꞉eki dupa Koto ekina꞉ I̱ma꞉ta꞉ mo Diendaili wanda꞉hali ame̱le̱ hata꞉ta꞉ naka꞉ biki yeiya꞉ lalueke. I̱ma꞉ emelimanu alo hata꞉ta꞉ neke yeiya꞉ lalueke laa wape pa꞉la꞉me.

¹⁰Kutupa doeki make wape pa꞉la꞉me. Diendaili wanda꞉halio. Koda꞉ma꞉ talopu mea haena꞉ la꞉la꞉ wanda꞉hali ame̱le̱ hata꞉ta꞉ ta꞉na꞉ma꞉ homa꞉pa꞉peke laa wape pa꞉la꞉me.

¹¹Kutupa make Diendaili wanda꞉hali paeyaoo. Ikana꞉ma꞉ Tekehalina꞉ pi laapa꞉peke. Kenke ta꞉ta꞉ ta꞉ta꞉ pa꞉ta꞉ haleme wanda꞉hali paeyao ikana꞉ma꞉ ipika꞉ pi wotu laapa꞉peke laa wape pa꞉la꞉me.

¹²Kutupa Aisayama꞉ wape pa꞉la꞉eki make dupa Diesina꞉ tapake hali homeke ipilieke. Koda꞉ma꞉ta꞉ ipikita꞉ Diendaili wanda꞉halina꞉ you hali mea haena꞉ lelieke. Kutupa mo Diendaili wanda꞉halima꞉ ipikina꞉ ti lao hata꞉ ipikana꞉ma꞉ pita꞉la꞉eki homeke hando halimikie laa wape pa꞉la꞉me.

¹³Mo hande ti lao haasa꞉ ekina꞉ teke hali Koda꞉ma꞉ta꞉ ikana꞉ma꞉ ipiki pa꞉ta꞉ hone tulaaseme ekina꞉ ta꞉na꞉ tiekema꞉ homelemeeki make puki lopa꞉niao halemeeki make iki pa꞉ta꞉ tumbao pitaeya꞉ka꞉na꞉ta꞉ epelieke. Kutupa ikana꞉ma꞉ ipikina꞉ ti lao hata꞉ hando haleme ekita꞉ mo Holi Sipitidina꞉ welema꞉ mea daeyatiki pina꞉ lea꞉ka꞉na꞉ta꞉ kota꞉ kotota꞉ epelieke.

¹⁴Yaka kame titio. Ikana꞉ma꞉ epeke haumanu putia pulu hata꞉ mo piteleme ekimanu make wotu handelememe. Kutupa ika꞉ ika꞉ kone mana꞉ la alualu pea꞉pa꞉peke ekita꞉ I̱ma꞉ ota꞉ handa꞉ ulume.

¹⁵Koto pa꞉la꞉pate I̱ma꞉ do wape poloeki pa꞉ta꞉ ika꞉ hone u tiaaso hata꞉ taka꞉lake pi mandane ekimanu laa wape polome. Koda꞉ma꞉ e tieke I̱ pa꞉ta꞉ ka꞉leke handaata꞉ I̱ma꞉ na kita꞉ yokake hata꞉ wape pea polome.

¹⁶Hande I̱ pa꞉ta꞉ ka꞉la꞉ eta꞉ dupae. Yesu Ketiso ipika꞉ e pokaaso hali hata꞉ mo Diendaili wanda꞉halina꞉ e pokaanoyeke ka꞉la꞉me. I̱ma꞉ mo hande Koda꞉na꞉ Pi Seliapo walaaso hata꞉ta꞉ yeni peaasa꞉ hali leke hata꞉ pitolome. Mo hande Diendaili wanda꞉halita꞉ Koda꞉ma꞉ ta꞉na꞉ma꞉ homolo hata꞉ mina꞉yeke pa hala꞉la꞉ ale leke haluekema꞉ pitolome. Mo Holi Sipitidima꞉ make mo hala꞉la꞉ aleta꞉ yako pina꞉ ala꞉me.

¹⁷Koto ekina꞉ I̱ma꞉ta꞉ Yesu Ketiso yaapo ta꞉ma꞉ni pea hata꞉ta꞉ Koda꞉na꞉ e pokao halo ekina꞉ epeke pua꞉me laa ta꞉na꞉ma꞉ homa꞉peke ya꞉la꞉me.

¹⁸I̱ma꞉ na kita꞉ yokake hata꞉ dupa lolo polopate Ketisoma꞉ I̱ pa꞉ta꞉ peaala꞉eki homeke lolueke. Diendaili wanda꞉halima꞉ Koda꞉na꞉ pi opua pina꞉yeke pua꞉me. Do pimiki ekina꞉ teketa꞉ dupae. I̱ma꞉ loa꞉ pimanu make pua꞉ haumanu make

¹⁹wele wotu pa꞉la꞉ ekimanu make na hando haeme ekimanu make ipika꞉ Sipitidima꞉ wele wotu pia꞉eki make koto ekimanu paeyao handaata꞉ pimikime. Koto ekina꞉ I̱ma꞉ta꞉ mo Diutuseleme da pa꞉ta꞉ kini pu mea wala꞉tiki pua mo Ilitikumi nane kone mo hande Ketiso pa꞉ta꞉ ipula꞉ Pi Seliapo paeyao pa꞉ta꞉ wala꞉niaowa꞉me.

²⁰Yaka hone witoloeki homeke dupae. Ketisona꞉ biki na opiki pa hao haleme wanda꞉hali pa꞉ta꞉ I̱ pua mo hande Pi Seliapo waluekema꞉ hone u halome. Ma꞉nda꞉ma꞉ pa꞉la꞉eki manda taapopao peaama꞉na꞉ loa꞉me.

²¹Hande Baibolo bukana꞉ wape pa꞉la꞉ ekita꞉ dupa Hande ipiki pa꞉ta꞉ ipula꞉ pi na opiki wanda꞉halima꞉ handilimikie. Kutupa pi na opimiki wanda꞉halima꞉ hone wilimikie laa wape pa꞉la꞉me.