Roma 15:9-21

⁹To kona no mgo Hibru pigtabangan din isab agun masaja dan to Diyus tongod to kayuuy din. Insuyat sikan duon to Kasuyatan to Diyus no pig-iling, “Diyus ku, ogpagsakot a to kona no mgo Hibru to pagpasalamat ikow. Ogkanta a to pagsaja ikow.”

¹⁰Meyduon isab duma no sinuyat no pig-iling, “Sikiyu no kona no mgo Hibru, pagduma kow to paglipay to mgo otow no tahan pinili to Diyus.”

¹¹Aw meyduon pad pig-iling, “Sikiyu tibo no kona no mgo Hibru, sajaa now to Ginuu. Tibo kow no mgo tribu, saja kow kandin.”

¹²Mig-iling isab si Isaias, “Meyduon ogyogwa no kibali salingsing ni Isai no ogmandu to kona no mgo Hibru. Sikandin to ogkaimanan dan.”

¹³Og-ampu a to Diyus no iyan ogkapuunan to pag-iman, no ibogoy din iyu to hilabi no kalipay dow kalinow tongod to pagsalig now kandin. Na, ogdugang to pag-iman now pinaagi to gahom to Ispiritu Santu.

¹⁴Mgo suun ku, nakasiguru a no madojow to pamatasan now, hustu to pagsabut now bahin to pigtuuhan ta, aw angay kow on no ogpaaanaday.

¹⁵Di inggad pad to sikan, wada a kataha to pagpadomdom iyu kani to seini suyat ku to impang-anad iyu to diya una. Su pigbogajan a to Diyus to katongdanan

¹⁶to pagka-suguonon ni Cristo Jesus aw sugu-a diya to mgo tribu no kona no mgo Hibru. Angod a to mgo magdudumaya to diya una no migtuman to paghalad diya to Diyus. Su to kona no mgo Hibru pigdaehan ku to Madojow no Nawnangonon no napuun to Diyus agun mahinang sikandan no kibali halad no angajan ogdawaton to Diyus, su inabin man sikandan to Ispiritu Santu.

¹⁷Kaling tongod to pagkabogkot ku duon ki Cristo Jesus, igkapanghimantug ku to pagtuman ku to sikan impahinang to Diyus kanay.

¹⁸Iyan da igkanangon ku to nahinang ni Cristo pinaagi kanay, su mahan-in to kona no mgo Hibru no migsugut on to Diyus tongod to pagpang-anad dow duma no mgo hinang ku

¹⁹yakip to mgo milagru dow kabeynganan no nahinang ku pinaagi to gahom to Ispiritu Santu. Sugud diya to siyudad to Jerusalem kotob to Ilirico, pigyogob ku to pagnawnangon to Madojow no Nawnangonon bahin ki Jesu-Cristo.

²⁰Iyan kanunoy og-awoson ku to pagnawnangon to sikan diya to mgo banwa no wada pad kamaani si Cristo agun no ko ipananglit ta to bayoy, kona ad ogtugdok to bayoy duon to sikan pigyatidan on to duma.

²¹Duon to sikan, ogkatuman sikan pig-iling duon to Kasuyatan to Diyus, “To mgo otow no wada pad disti kanangoni ogkamaan on to Diyus. To diya wada pad makadinog ogpakasabut on.”