Waloma 15:9-21

⁹leka na hewo wanhu hawawele Wayahudi, wamzele na kumtogola Nguluwi kwa chiwalo cha isungu lya heye. Kota vyogalingulonga Maandiko Matakatifu, “Ahyo ndokutogola hali wanhu hawawele Wayahudi, ndokwimba lutogo lwa itwagwa lyako.”

¹⁰Kahi Maandiko gangulonga, “Msangalale, hemwe wanhu hamuwele Wayahudi, msangalale hamwe na wanhu wa heye.”

¹¹Na kahi, gangulonga, “Hemwe hamuwele Wayahudi, mtogoleni Mkulu, hemwe wanhu weng'ha, mtogoleni.”

¹²Kahi mloli Isaya kangulonga, “Kuli lukolo lwa Jese kulawila munhu, na heye kowalongoza wanhu hawawele Wayahudi, na hewo womtumbila.”

¹³Lelo Nguluwi nayali chaluko cha kitumbila, yakumemezeni usangalalo weng'ha na kikala goya kwa makundo ga hemwe, kitumbila kwa hemwe kuze ngonjezeka kwa mong'ho wa Muhe Yelile.

¹⁴Wang'holozangu, heni ndivizela ng'hatu kota hemwe mmema kunoga na kudaha kweng'ha, na moweza kilangusa hemwe kwa hemwe.

¹⁵Mli lyandiko ali nandikwandichilani vinhu vinji ne kudumba, ndikukumbusani kahi. Ndita ahyo kwa isungu lyoyamhele Nguluwi,

¹⁶leka ndiwe kota chitumagwa wa Yesu Kilistu kwa wanhu hawawele Wayahudi. Ndangiditila kota mtambika kudamla Mbuli Inojile ya Nguluwi leka wanhu hawawele Wayahudi wawe nhambiko ilingukundigwa na Nguluwi, nhambiko ilingwezigwa na Muhe Yelile.

¹⁷Ahyo ndiwele ndilumbile na Kilistu Yesu, ndoweza kidayila madito ga heni kwa chiwalo cha Nguluwi.

¹⁸Hambe njeze kulonga chinhu chinji choneche ila chila hela Kilistu Yesu choyaditile kwa kung'holela heni leka wanhu hawawele Wayahudi wamhulichize heye. Nakadita ahyo kwa ulonzi na madito,

¹⁹kwa ludali lwa vinduzanduza na lububuwazo na kwa ludali lwa Muhe wa Nguluwi. Lelo kwa kwinula majendo ga chila honhu, kwaluchila kula Yelusalemu mbaka isi ya Iluliko, nandiwadamlila ng'hangaze Mbuli Inojile ya Kilistu.

²⁰Chondilingugana heni mazuwa geng'ha, ndamle Mbuli Inojile hali isi zila Kilistu halinguzeleka, leka ndeche kuzenga hali msisi uwichigwe na munhu yunji.

²¹Kota vyogalingulonga Maandiko Matakatifu, “Wanhu weng'ha hawalonjelwe mbuli za heye, wokona, na wala hawanahulika mbuli za heye wovizela.”