Aroma 15:9-21

⁹Ibintogaba kampa tumintine. To marisa kina'miba igegeba Koti nkantara'enawapa agama ae age asagayuyiyema tumintiye. Pika mono isa'ama maya iye: Naeba to marisa kina'mi nkikapi kamanakapa aborama, inibisaba kagega'eba asagayukuwe, piya untiye, iye.

¹⁰Pigoya, mono isa'ama to ka maya iye: To marisa kina, tigeba Koti nkaokina'mige ti'mu piyo, untiye. iye.

¹¹Pigoya, to kapa maya iye: A'ya'ma to marisa kina'mitaba, Wa'egawama nkagega'eba asagayuyiyo, iye. Piya, a'ya'ma toma toma kina'miba age asagayuyeno, piya untiye, iye.

¹²Pigoya, to ka kamana Aisaya mayama kaentiye: Tayabama Yesinta aubutasa asaewaba pakiye, iye. Pi ntagaramaba asima mima to marisa kina'mita kabiwaitakiye, iye. Piya pekini, to marisa kina'miba aeti uma atokaema i'mu pukibewe, iyema kaentiye.

¹³Pigoya, Koti aeba tamatiti'enarempa nkagoba mintiye. Aeba timatiti'enarika ti'muntanabe paruyenabe tabera aborama timekiri, Aota Awamusa'ama nkesegiyenabi mima, aeti atokaekenaga aobi pigina, Kotiba pintanaba pumaeritano.

¹⁴We, nao'nempitaba, tigeka ago abibebe pogana kanarasaye. Piya, tigeti aogiyenaba pumae waintegiri, tigeba mono agoba kanara abibebe puma, ankao'mae ao'mae pumagiri aogi napiyena tiyo'mipa imikena pewe.

¹⁵Pigoya, Koti awagaena namintika, naeba naekuru kampa punta, tigegu'a pusanaga ka'isa kamanapa esegima tigeti kaeyuwe.

¹⁶Piya, to marisa kina'miti Isu Karaisiti mpono kayokaya yagara mima Koti nkaogi kamana uwaimoma unatantika, Koti awagaenaba namintiye. Pipa namoga, aeti muta atama to marisa kina ibabute kanakena puwe. Piya pekana, Aota Awamusa'ama aota puwaitakana Kotiba a'mu puwaitanema, yuwe.

¹⁷Naeba Karaisiti Isuti atokaema mima Koti ntuga poka, kanara tabera Kotiti na'mu potauwe.

¹⁸We, Karaisiti esegiyena namoga puwagana au'wapa aboranti, pika yuwe. Tonagaba kampa ukuwe. Piya, ae esegiyenarasa to marisa kina'miba iyakuwagini, mono kamanapa wasintane. Nawamutasabe nayatasabe yoga pumagi,

¹⁹awame'enabe kasa'enabe aboramagi, Aota Awamusa'amatisa esegiyena mae u'ma, to marisa kina'mi mono abima wasiyiyema, yogaba puntone. Yerusaremi kumatasa agobima Karaisiti nkaogi mono'wapa uwaimirite wama Iririkamu mari uma irosantone.

²⁰Piya, naeba to kina'mi kimaranta abobora kisanagaba kampa nabuntine. Karaisiti nkage awaga kamana kampa uma irosanti kina'miti wama mono kamana uwaimikena puntone.

²¹Pika mono isa'ama maya iye: Ae kampa aganta'nagiba agowapa agakibewe, iye. Aeka kampa abinta'nagiba agowapa abikibewe, iye. Pi nkawameta uwaimintone.