Romanos 15:7-30

⁷Cristo a'onira kapoari'avini vani avaabononi vaakapoarikhama bana mahija ija'ari Deus jahana, danona, ogahana-ra khai vani'avini.

⁸A'onira onanamithavini hiki: Cristo kha'ina judeus kaija'ari vakadiania va'ora kakodiara kaimoni, va'ora nanokiahivini hiki ida Deus va'ora nava'iponi'imariniravini. Oniania Deua bada bini'a'iki ida varani akadija'ari va'oaniaro miro'a-ra va'ora nava'isohijoravini hi'iki, hi'adani Abraão kohana, Isaque kohana, Jacó kohana vihiki.

⁹Cristo kha'ina judeus kaija'ari vakadiania judeus kaija'ari vihirikia khai vani'aja kaimoni ida Deus va'ora va'adivini jaboni. Hojaki hida athii Deus athi kapapirania: “Vara ovani'aki bana ida kadahojai jahaki judeus kaija'ari vihiriki vakadiania. Oahiaki bana ho jaboni. Kodimoro kaathi hiki hida ijahaka'oani.”

¹⁰Hojaki hida athii hoariha jaboni: “A'onivani judeus kaija'ari avihiriki, khai vakhani'a bana judeus kaija'ari vakadiania. Deus va'ora nagathogatho'bo'da'iki adani.”

¹¹Hojaki ida athii hoariha: “A'onivani judeus kaija'ari avihiriki, khai vani'a bana ida Deus jahana. Arabo hahavi kaija'arini, khai vakhanikaraho jaboni bana.”

¹²Isaías kohana vara bivani'ajora'iki ada Cristo jaboni: “Khaki bana ada Jessé kahanodi namitharonisiagaki. Deua bikaronaki bana ada, va'ora vaka'da'dira kaimoni adani judeus kaija'ari vihiriki. Vavakaijokaki bana ada va'ora kajoamorara kaimoni.” Niha ada Isaías kohana.

¹³Deu-ra okanikhariavini hiki ida a'onira kakodiavini mahija a'onira kaibavijahahivini hiki-ra avanokhahaha'oadahavini. Onofiki ida Deu-ra avavakaijokavini, avagathanija kaimoni ida va'i khaii nini, va'i jahajahani hiki, oniani ida Ma'onahai Jahaki danona avakadiviahanokhai-ra ana'ba'divini hija bana.

¹⁴Oigamina, a'onira okava'ibodivaranivini vani oabono oni'aja: Jahaki ida vakadihojai, vakadi'ogahai hiki. Avigajahakiki ida hojai Deua binofikia vakabadanina. Avigaki jaboni ida vaabono vakanava'isohikhamavini. Nimania hida a'onira okava'ibodivaranivini.

¹⁵Oofinirina vani onajirija hida oathi kapapirani, a'onira onava'isohivini hiki hida varani ipohiki, avakava'ihokija kaimoni. Deus hora nagathogatho'avini mani ida oofinirina a'onira onava'isohivini hija.

¹⁶Deus hora nagathogathovini hi'iki Jesus Cristo kahonai abono ohina, va'ora oakodiara kaimoni adani judeus kaija'ari vihiriki. Kodibadani hiki ida sasidotxi kabadani fori hiki, va'ora okanamonivini hiki ida Deus monina jahaki. Onofiki ida Deu-ra ono'avini vihina Deus khaii nina va'ora kapoarivini. Ma'onahai Jahaki va'ora aniki adani judeus kaija'ari vihiriki, binajahaki ida vakadimahi, Deus kaija'ari vihika'oara kaimoni.

¹⁷Jesus Cristo kania oakaramisina mani ida Deus kabadania okabadanina-ra khai oni'akarahovini hija.

¹⁸Oipahihirina vani vara ovani'aja hida niha ninini Cristo hora kakodia'avini afojahaki bada oni'ina kidimoni. Ogahaia hora no'avini mani ida judeus kaija'ari vihiriki Deus athi-ra vanaabavinia va'ora oakodiavini hija. Kodivarania okavarani'ina, badania okabadani'ina jaboni, badani ija'ari-ra nava'ibodivarani'ikia okabadani'ina jaboni, Ma'onahai Jahakia bada bini'a'iki ida kidibadani danoki jaboni, oniani ida judeus kaija'ari vihiriki Deus athi-ra vanaabavini hija. Oa'aadahaonina kama'dani Jerusaléa. Anokhomini Ilíria kaarabonia. Oa'aadahaonina oadani ibavi hahavia okaikahi'ina, vara ovani'a'iki ida Cristo monina jahaki hahavi.

²⁰Onofivini arafiaki ida Cristo varani hina jahaki-ra onamonivini ija'ari Cristo monina-ra vakamitha'iariki vakadiania. Vahoariha avavaadahaoniki ida Cristo monina ibavi ipohikia. Cristo monina-ra vakamitha'iki vakadiania ookhana-ra onofirihi.

²¹Hojaki hida athi Deus athi kapapirania: “Ija'ari varani-ra mitha vani'a'iarikia vakamithaki bana ida varani hina. Ija'ari varani-ra vakamitha'iarikia avigaki bana ada.”

²²Hari. Onofibakhiaki ida avakadiania ovaa'ahahana. Onofivini kaba'i ni-okaaboka'iaki kaho.

²³Hari. A'diahi'ihi ida kodiadahai Cristo monina-ra oanamonionivini. Badara ipohikia a'onira onavanavanahavini-ra onofi'iki ho. Oahoroa'ina mani ida avakadiania ookhajorakina-ra okava'ibodivaranivini hija. Espanha kaaraboni maina-ra oanikhahaki bana ho. Avavahojaki kania oradahana vani onofija ida a'onira onavanavanahavini. Onofiki ida masiko ipohiriki avakadiania a'onira onavaa'ahavini naothinia onofiki bana ida hora avakakodiavini Espanha kaarabonia okaikahina.

²⁵Hari. A'onira onavanavanahavini viahania Jerusalém sidajia ookhaki ho, jiniroa va'ora oakavikhara kaimoni adani Deus kaija'ari.

²⁶Cristo kaija'ari Macedônia vahojaki, vahoariha Grécia kaarabonia vahojaki jaboni vaabono vakanava'isohikhamavini hi'iki ida vakadijiniro pitahani-ra vakaronavini, va'ora vakanava'igara kaimoni adani Deus kaija'ari vakanahinariki Jerusaléa vahojaki.

²⁷Va'oaniani oa vaabono vakanava'isohikhama'aha, ni-ija'ari va'ora nava'isohifiahaki jiniro-ra vakaronavinia. Asohiki ida vakadinahina va'ora vakajoamoravini adani judeus kaija'ari vakanahinariki. Judeus kaija'ari va'oaniaro miro'a varavinafiahavini fori hiki ida nahina jahaki Deus va'ora kajoamoravini hi'iki judeus kaija'ari vihiriki vakadiania. Oniania, jahaki ida judeus kaija'ari vihiriki vakadinahina pa'itxi vavahojaki-ra varavinavini judeus kaija'ari vakadiania.

²⁸Jerusalém sidajia okaikahina oarakhaki bana ida jiniro hahavi vahoariha va'ora vakajoronihivini hi'iki. A'diahini naothinia ida kodibadani, Espanha kaaraboni maina-ra oanikhahaki bana ho. Ookhana kaba'i, a'onira onavanavanahaki bana ho.

²⁹Avakadiania okaikahina vani oogaki ida Cristo hora kakodiajahakivini a'onira kajoamorajahakivini.

³⁰Oigamina, onofiki ida hora iakodiavini Deu-ra akanikhariajabanavinia. Akadika'da'di Jesus Cristo-ra avakaijokavini vani Ma'onahai Jahaki haria kakodiaja jaboni ariabono akanakaidivakhamavinia, oniani ida Deus hora akadava'avini-ra avakanikhariavini-ra onofivini hija.