Rom 15:7-30

⁷Ŋunde ŋuro Kristoko yeya topo taró ŋundiro naŋge ye soso topo ti. Asa otete ŋundoko Anutu seré te inoyote.

⁸Dokoro ŋande yimiroteno, Kristoko Anutu koro mande hamó howero uni koweye toŋaŋgurí qu samaka yerewero quro kho uniye tunoqaró. Ŋuro tero Anutuko usisambayeya mande kusiyaró ŋu kondériní,

⁹ko uni wini meyowo ŋundo sikíye ŋu qenero Anutu koro owí hokoyi. Hamó, sokomeko ŋuno ŋande nakayáŋaŋgurí, “Ŋunde ŋuro nondo uni wini meyowo keweroyemo owéŋge hokowano, ko no yambo yero seré te kunowano.”

¹⁰Ko sokomeko kaŋuya ŋande yete, “Ye uni wini meyowo qu, ye meté Anutu koro unipareyómboya niŋgu-niŋgu ti.”

¹¹Ko kanoko ŋande yete, “Ye uni wini meyowo qu, ye Anutu owí hokoyi. Ye unipare soso, seré te inoyi.”

¹²Ko Aisaiako ŋuya ŋande yete, “Jesi koro Sisani ŋundo otoqoro uni wini soso sopo yereweya. Uni wini meyowombo ene qenero o meté siyowero quro sopowaŋgo.”

¹³Anutuko unipare yoriní o meté quro sopoyoteŋgo. Meté enendo yeŋo iŋondutuyewore niŋgu-niŋgu parámi teweya, ko newonde ime ŋuya riní yeno tunoqeweya. Ŋuro tero Yuqa Surumímboro wimbí ŋu rero o meté ŋu kondé sopowaŋgo.

¹⁴Uni topone, no ŋande iŋomukoteno, asa yendo otete meté hamó mu howeyoteŋgo, ko iŋo-iŋo meté mu parámi towoyoteŋgo, ko topoyemboro kheye roŋgaruwowero quro wimbuye moré.

¹⁵Nondo itaka mande kondé kumi newondeye okokowowero quro nakayáŋoteno. Dokoro Anutuko samaka-samaka tuwó nunoro

¹⁶Kristo Yesu koro kho uniyó tunoqanowó. Ŋunde tunoqero uni wini meyowo keweroyemo kho tero o qa-qa uni ŋunde qembe Anutu koro miti mande yesowoyoteno. Yesowowe Yuqa Surumímbo yoriní meté horé tunoqi Anutuko ŋuro metéŋoní nondo yorero o qa-qa meté horé ŋunde qembe Anutu te inoyoteno.

¹⁷Ŋunde ŋuroko Kristo Yesu quroyómo Anutu koro kho teyoteno ŋuro niŋgu-niŋgu teyoteno.

¹⁸Dokoro neneŋombo kho tanowó ŋuro kama yewano. Kini, ŋa naŋge yewano, Kristoko uni wini meyowo keweroyemo khonewore ko mandenewore kho tiní Anutu howeyoteŋgo.

¹⁹Enendo kho tanowó quno ŋuno Yuqayówore o wimbí moré mu taró. Ŋunde tiníqo, Yerusalem ŋu noŋgo yate-yate Ilirikum mira ŋuno mande yesowowe unipare soso ŋuno Kristo ŋuro miti mande ŋu iŋomukaŋgurí.

²⁰Ŋundiro naŋge nondo ŋande ye iŋoyanowó, asa mira kumi muko unipare Kristo kama iŋo inoyoteŋgo ŋuno naŋge miti mande yesowowano. Ŋunde tero meyowomboro khoyó saŋanímo kama kaŋewano.

²¹Kini, sokomeko ŋuno ŋande nakayáŋaró, “Eneŋo sowo mande qu kama iŋaŋgurí ŋundo qenewaŋgo, ko piŋa mande kama iŋaŋgurí ŋundo iŋoyi tondaŋeweya.”

²²Murí ŋuro naru parámi no yeno uyarewero khe qu moré kini.

²³Quko itaka mira ketako kho ŋuno tewano qu kini. Ko kumima naru parámi yeno uyarewero kondé iŋoyano.

²⁴Asa ko andusina Spen mirako ŋuno uyarewano quno ŋuno yiyowano. Dokoro ŋande iŋoteno, nondo yeno uyaro yiyoro naru kumi yeya yoroweqota samaka niri Spen ŋuno uyarewano.

²⁵Quko itaka Yerusalem unipare meté horé samaka yerewero quro ŋuno uyareteno.

²⁶Dokoro Masedonia uniparetoya Akaia uniparetoya mande kusiyoro unipare meté horé onoŋoye moré kini qu Yerusalem yoteŋgo ŋu samaka yerewaŋgo.

²⁷Ŋunde tewero ŋuro metéŋoyoteŋgo. Hamó, ŋunde tero utatáyemboro topé tewaŋgo. Dokoro uni wini meyowombo Yuqawore Israel uniparetoya newonde kanata teyoteŋgo. Asa ko noko koro onoŋoyewore meté samaka yerewaŋgo.

²⁸Ŋunde ŋuroko nondo newonde metémboro ŋu rero yunoroqo rohoréŋoro yeno Rom ŋuno uyareyate Spen ŋuno uyarewano.

²⁹Ko ŋande iŋoteno, nondo Kristo koro puriŋo parámi rero yeno uyarewano.

³⁰Uni topo, noreŋo Uni Paráminani Yesu Kristowore ko newonde meté Yuqako nore nunoyote ŋuwore kondé ŋande kira yereyoteno, meté ye noya koweyumu tero Anutusina neneŋo hariri ti qembe.