ROMA 15:7-30

⁷Taunabunai ba heabi-dae heheni, Keriso ese umui e abimui dae heḡereḡerena, Dirava iheatolaina.

⁸Na tomu Keriso na Israel edia hesiai tauna ai e halaoa, Dirava ena hereva momokani dainai, seneda e gwau henidia hamata herevadia ihamomokanidia;

⁹bona bese idau-idau ese danu Dirava bae imodaia, ena hebogahisi dainai; buka ai e torea heḡereḡerena eto, Ina dainai bese idau-idau bogaragidiai baina imodaimu; Oi ladamu na egu ane ai baina hanamoa.

¹⁰Ma eto, Idau bese taumui e, ia besena ida ba moale hebou.

¹¹Ma eto, Bese idau-idau taumui iboumui ai, Lohiabada ba imodaia; Taunimanima iboumui ai, ia ba hanamoa.

¹²Ma Isaia eto, Iese ramuna amo ta baine gara kau, Bese idau-idau lohiadia ai bainela; Bese idau-idau taudia ese ia bae abidadama henia.

¹³Helaro Diravana ese emui abidadama dainai moale bona maino idoinai baine hahonulaimui, Lauma Helaḡa siahuna amo baine habadaia.

¹⁴Varavaragu e, lau dibagu umui na kara namo ai o honumu, diari ai o honuhonu daemu, hesisiba heheni na mai dibamui.

¹⁵Taunabunai, mai goadagu ida na tore henimuimu, ihahelalolaimui totona, Dirava ese e henigu hariharina dainai.

¹⁶Lau be Keriso Iesu ena hesiai taugu, bese idau-idau ediai; Dirava ena sivarai namo na harorolaiamu, bena Lauma Helaḡa ena hahelaḡa dainai bese idau-idau na boubou ḡaudia namodia ai baela.

¹⁷Dirava ena ḡaukara na karaiamu bona na heaḡilaiamu, Iesu Keriso bagunai.

¹⁸Keriso ena ḡaukara idaudia haida basina herevalai; a lau daigu ai bese idau-idau taudia vada e kamonai, bona edia kamonai amo hereva bona kara vada e vara, una mo na herevalaiamu.

¹⁹Toa bona hoa karadia danu vada eme hedinarai, Dirava ena Lauma ena siahu dainai; taunabunai Ierusalem amo ela bona Iluriko, Keriso ena sivarai namo vada na harorolaia ḡuḡuru.

²⁰Egu lalo-hadai tamona binai: sivarai namo baina harorolaia, Keriso ladana do asie hatoamu gabudia ai. Asina uramu ta ena du latadiai egu ruma baina haginia.

²¹Buka ai e torea heḡereḡerena eto, Asie hadibalaidia taudia na bae ita, Bona sivaraina asie kamonai taudia na bae diba.

²²Una dainai vada name helao ahu, asina vasi itamui ema bona hari.

²³A harihari lau na asi egu ḡaukara inikaha ai; bona laḡani hoho vada na ura bada baina vasi.

²⁴Taunabunai, Spania baina lao henia negana ai baina vasi; badina be na uramu egu laolao ai baina itamui, umui ida baita noho nega taina, bena dala ai ba hakaugu.

²⁵A ina harihari lau na Ierusalem ba laomu, helaḡa taudia ikahadia totona.

²⁶Badina be Makedonia bona Akaia taudia ese edia harihari ḡaudia vada e habou ogoḡami taudia Ierusalem ekalesiana ai edia.

²⁷Idia na unu e kara toma mai moaledia ida; e haeroa, idia na ima-doa taudia na heheto. Badina be lauma ḡaudia vada e abi; bena tau-ani ḡaudia ma bae heni lao eto.

²⁸Ina ḡaukara baina karaia vaitani, ina huahua baina henidia vaitani, bena baina vasi itamui, ma Spania bainala.

²⁹Lau dibagu danu, baina vasi negana ai Keriso ena hahenamo idoinai baina vasilaia.

³⁰Varavaragu e, na noimuimu, iseda Lohiabada Iesu Keriso bagunai bona Lauma ena uraheni bagunai, Dirava ba ḡuria goadagoada lau daigu ai, sibogu daigu ai na ḡuriḡurimu heḡereḡerena;