Rome vene 15:7-30

⁷Mina dada Sei di vabara rofu Keriso ka ya moi dui reyo kana, ya kaya ya kaya moi dui refa.

⁸Adina ya nida, Keriso yaku Sei di ago rama oteimagi roaita nugaradi vene di naivo rena amiye niyo. Ye makai nitore reyo ago ini aufakai rofu moi gira rigo.

⁹Ma tutubena idana vene ka Sei di iriyeduka dada, ini roka moi odoro rigi regedi, bura reyo kana: “Mina dada na bi tutubena idana vene di fogori yi roka moi odoro risi yi rokari uka ada dudu yauta nibigida.”

¹⁰Dudusa niyo, “Ya tutubena idana vene, Sei di venesa vakoi ada refo!”

¹¹Ma dudusa ka niyo, “Ya tutubena idana vene tau noibanu Varika amiye di roka moi odoro rifo; ya amiye tau noibanu ini roka moi odoro rifo!”

¹²Ma Isaiah dudusa yomakai niyo, “Jesse di davari yokoi vata nigo; mina dadigo amiye bi tutubena idana vene ourefeidego, ye ini uka mokena mina amiye rofu aebigedi.”

¹³Kamini Sei kaere bi uka mokena di adina, bi yi mokena vari gira aededi dudu, ada rena ma uka amuta noibanu yi ukari moi vata baeyaine, ye Vima kikifa di vava dudu uka mokena tau tora nina moibigedi dada.

¹⁴Nai usika ourena, ya vene dada na na diba, buni tau noibanu bi ya venesa vata baeyo; ya bi diba noibanu nufa ma ya kaya ya kaya oteimagedi.

¹⁵Idu ago bedakai dada ori de iniye dudu, ya rofu bura reyaka, ya mina rofu mokeyaganedi dada. Ini adina Sei yaku buni tora gade na masi

¹⁶Iesu Keriso di naivo amiye na riyo. Ye makai Sei di ago buniri, Sei ma amiye utari naivo redo amiye di moimai tutubena idana vene rofu moimai regida; ye Sei yaku tutubena idana vene di ori sisika rededi nimago, Vima kikifa dudu moi kikifa regori.

¹⁷Mina dada Iesu Keriso sa bi buni na yaku nai moimai Sei rofu nivasena reida.

¹⁸Ini adina na yaku ago idana nina de regida, idu beika Keriso na dudu moimai reyo, mina maka nigida: tutubena idana vene ini ago neidena rofu moi baeyaka—ago ma vegu dudu,

¹⁹rebe ma mokena vegu di vava dudu, ma Sei di Vima di vava dudu—ye Jerusalem gutuna yavoi resi Illyricum gaganiri bosi idau Keriso di ago buni di moimai rei vau reyaka.

²⁰Ye makai ago buni nirausi regi ura iniye reida, idu Keriso di roka sena niyadi sanari de, amiye idana di moimai fafau akugida baebu.

²¹Idu bura reyo kana: “Kaere ina rofu de nioteimaro vene bi vegedi, ma kaere neidena de reyadi vene bi diba nigedi.”

²²Mina resi meda tauri na ya rofu bae nena bi gana riyo.

²³Idu gua, mina roroari nai moimai bi koina niyo, ma lagani tauri baesi ya vegika ura regamaka dada,

²⁴nai uka mokenari, Spain rofu bogika, yavoi resi ya vene vesi ada resi ari bedakai oto regida ma nai yava ika oto dinari na aedegedi.

²⁵Idu gua, na bi Sei di vene siko aedegika Jerusalem rofu bogida.

²⁶Ini adina Macedonia ma Achaia ekalesia vene bi Jerusalem ri Sei di vene fogori, irava vene rofu, fore be butu butu resi magi ura rededi.

²⁷Ini ura makai regi ada reyadi, ma ini obini bi mai dairigedi. Ini adina tutubena idana vene bi baeyadi ma Vima di buni tora gade Jew vene yaku moiyadi, bi ina rofu rau regedi. Ye ina vene ka ini beika baika nufa naivo reyagane dada.

²⁸Mina dada na mina moimai rei vau rena fore butu reyadi, ina rofu moi baesi feresi ya egoru resi Spain bogida.

²⁹Na na diba ya rofu baegidari, bi Keriso di buni tora gade noibanusa.

³⁰Usika ourena, na yaku uni Varika amiye Iesu Keriso ma Vima di uka mana dudu ya niguba reida, ye Sei rofu na dada, nasa usa usa nina gira reyaganedi.