LOMU 15:7-30

⁷Yamuya Omaimidana lamedalama soto pitiye likima Kalaestikaho lilime molaibomidana iki duka emo mideko emo mideko iki ouna lalo jiki minalo.

⁸Nemokaho maya sa-loko lo noliboe: Omailimoya omutoko latatelesida maya gaya lo hukoko lo benebo maya nenako, ihilawa jitiye loko Omailimo ga lalogo lokaka noibo maya nenako, yamidana monawa maya le soto molatuwe loko Kalaestikaho lemo Juda wewenalika elekele we lolo iye.

⁹Sa-noidanaki, hetoka wewenakiya Omailimo uka he bekaka noinako, aya wewenakiya epoka litae loko sa-iye. Yamuya monoka bukuguya we makolimo Omaimidana lo mibo ga sa-loko luhuwa jenebo maya ne: Hetoka wewenasida luwawanipouya minoko epoka loko nama loko ulika le sawa jeko minatune loko libo maya ne.

¹⁰Ito Dewitida ga makoki sa-loko ne: Hetoka wewenaya Omaimidana wewenalakiya minanako, epoka liki uliwa li sawa jiki minatae.

¹¹Ito Moseseda ga mako sa-loko ne: Edimo hetoka wewenalita mukiya We napamidana epoka liki monoka lilo. Sa-ideko, muki numuto namato wewenasiya epoka liki aiyo wuiye litatayo.

¹²Ito Aesayakahoya ga mako sa-loko luhuwa jibo maya ne: Dewitida ahola Jesida awola mako nisekolaiye. Aya welimoya hetoka wewenasida uliki wenipo lolo ekolo nisekolaiye. Sa-ekolainako, hetoka wewenamasiya emokumu ubolo i-minakilae.

¹³Saina lalomu eleko ubolo minokaka noudawomidana ahola Omailimoya elewole iki elebokumuya mulutipouya aila uluma silekaka nesa, ito hulu okaka nesa maya le soto mololibetokadeko, edimotoka waitoko minadeko, Omaimidana weuna oluho elewoleyaloti he elowo olibetadeko, ewa oko ele-minokaka nesa maya edimotoka wavu-leko soto pitiye loko Omailoka noloe. 9 2 Sam 22:50; Sam 18:49 10 Dut 32:43 11 Sam 117:1 12 Aes 11:10

¹⁴Wewenanelita, edimoto wati nesa liki weutipoya molikaka niae, ito monokamidana monawakiya eli wehe li-minae, ito emo kolo mideko emo kolo mideko iki api-napi ibitatae loko edimokumu elewole oko le-minoe.

¹⁵Yagoya minamiye, nemodaya Omailimo monoka yowanu maya le ohenetaibokumuye loko monoka monawa makoki eli wehe litae loko domudaloya nomoda wamiyoko, le lolowa oko luhuwa maya je noliboe.

¹⁶Jisesi Kalaestiya edimo hetoka wewenamuya monoka yowanulo noli hekaiyoko woe. Nemoya Omaimidana gala lalomuye loko Omaitoka jokila hi mikaka niabo nesa leko yowanu loboya, Omaimidana weuna oluhomidana lamedalalimo dilipe topa okadeko, hetoka wewenalikaya Omaimidana ofilinikidana lolo iki minadeko, Omailimoya mudalidokoko umu helitiye loko lokaka noe.

¹⁷Nemoya Omaimidana yowanula lekaka nobo weya, Jisesi Kalaestikumuye loko yowanunemuya eloyoko yowekaka noiye.

¹⁸Aya yowanuya neimone nabuhaneloti lobokumu lamoe. Kalaestikaho he elowo onetaiboyoko hetoka wewenasitoka moneko monoka yowanu loboya, wehe loko lo libekoloyo, eli-minalo:

¹⁹Nemoya monoka lo soto moloko lo bodanaki, ode amode nesa leko abuha-wowo nesa elewoleya lolo odanaki, Omaimidana weuna oluholokati elewole lekoko Jelusalemu numutoka maya adaya api oko Kalaestida gala lalo muki maya lo soto moloko lo-loko woko woko anu hana-pana maya le wego wego oko Ililiko ebatokaya maya hetoe.

²⁰Sakodanakiya, asehawau maya aku esewau leko lolo okatuwe loko Kalaestida gala elamabokuka maya woko gala lalo maya wetome oko lo bituwe loko nabuha molokaka noe.

²¹Sa-oboya, monoka bukuguya ga mako sa-liki luhuwa ji-minabo gauya emesalo moloe: Emo gala lo bamudawo wewenasiya mudakilae, ito gala elamabo wewenasiya eli wehe likilae. 21 Aes 52:15

²²Aya yowanumuya edimotoka wetuwe loko eloboya, muki yupeka anuya li lokaiyoko eda nelokaka okaiye.

²³Muki yupeka meleke niseko nowiyoko nowiyokoya, edimotoka wetuwe loko eleko minokaka nobo maya nenako, ito oloti onawaloya eba malokaya yowanu maya alo suwokainako,

²⁴edimotoka wokoko yalokatiya Sipena ebatoka wetuhe loko ele-minoe. Sakoya edimotoka nisoyoko edimosi nemo muda-neladeko, nemokaho edimo mudaidoyoko ekolune. Sakokoya Sipena ebatoka wekoloyoko, onawa lasolama nemoki elowa nijiki nilimi anulo molatae loko elekaka noboya,

²⁵olotiya Omaimidana wewenalale yuhasida nasahili obetoko ehada leko woko bekoloya, Jelusalemu numutoka nowoe.

²⁶Yamidana monawaya sa-oko ne: Masedoniya ebatoka ito Akaiya ebatokaya Jisesida wewenala yuhasiya edimonipo data eliki sa-liki li huki-minabo maya ne: Jelusalemu numutoka monoka elebo wewena uvaminanipo minamibo wewenasida maya ehada le nupa okoko betune liki li huki-minabo maya ne.

²⁷Saboya mulunipou dowa liyoko sa-ikayoko woko wehe liboma ne. Ito hetoka wewenasiya Juda wewenasitokati Jisesida gala laloma lebo nenako, yamidana edawa maya edimotoka ne. Sa-onenako, aya lihimanipo pasetune liki maya uvaminanipo ona moliki Juda wewenasida bitaboya wehe lekolaiye.

²⁸Sa-itaboya, aya nesamidana ihilawa maya alo soto penebo nenako, nenimoneya aya ehada leko woko epaki bekoyoko, suwokadeko, nemoya Sipena ebakuka wekoloya edimotoka ada nisekoko alikaya wetuwe.

²⁹Ito nenimonekahoya nadenego edimotoka wetuwe loko elamoe. Kalaestitokati maku libitibo nesa napaya leko wekoloe.

³⁰Wewenanele yuhase, lemoya We napate Jisesikumuye loko ito Omaimidana weuna oluholokati emo uka miyoko emo uka miyoko okaka noudawokumuye loko nene loko sa-loko lo noliboe: Edimokiya nemotoka nisiki omikiki nemodamuya Omailoka domudaloya likalo.