Romanone 15:7-30

⁷Giyagni Kristo yoptotingi pixkapotuko, gixa yoptokakletanu, rumalwutikolupa Goyakalu.

⁸Gi rixanu wane nchina, kamrurewakleru rixka Kristo Geso sajruka gistaklewluya, tokanchi galikakpotunanu Goyakalupirana chinanu, poyegityaplu gitsrukaachinni gipiratikaluru.

⁹Payineko gimalwutyaplu Goyakalu retwamonrewle chinanu. Chinyongatyawaka: Giyagni nupgujtatanyi payinyegiyako. Nshikaletgiwakatanyi.

¹⁰Wane chinatnaka: Gimuwatanu, payinekgi, gineruneyma.

¹¹Rumepetatnaka: Gimalwutanru Gitsrukaachi pejnuruneko payinekgi. Galixkotanru, payinemnunanuka.

¹²Gisayiya gimepetatnaka: Waneplu Gesetski, payine Gitsrukate yotunomtachripa. Wale chinanupa waneyapna kagwaklewlena payineko.

¹³Wa kagwaklewlu Goyakalute genekpotutangi pejnuruko gimuwlu giglenshinikanrewlu galixinri. Tsru potu kagwaklewlu waneyapgi Giwekikaluru Kpashiri giyaklewleya.

¹⁴Naponshinikanyegitgi, nomolene gitanune, wa gixa koxa kshinikanurunpotgi, psolpotukopirana gimatachinepgi, gimkata giykokakletinripa gixkakluko.

¹⁵Psoji mkagwakpiratkatno nyonyegitgi, nomolene, wane nixa gishinkapkakletgi, gimutlewlu chinanu nenekikolu Goyakaluya.

¹⁶Kristo Geso kamrurewyegitachripno payineyegiyako chinanu, Kiglerpotunanu Tokanchi Goyakalunu nkamruretinri. Payineko genekashatikolu gigleretkaluru rixinripa, kpashiri rixkaklewatinripa Giwekikaluru Kpashiriya.

¹⁷Giyagni waneyno nalixkotpiranatyalu Kristo Gesoya Goyakalupirana.

¹⁸Gi rixanu nkagwakpiratmaka yanumsayegletlu pagixanu pirana wa Kristo gi kamruta gitaya yijnakotinripna payineko tokanuyna, kamrureyna, ruyaklewleyma giglajrukakaya, getkalurkakaya, ruyaklewle Giwekikaluru Goyakalunu.

¹⁹Wane rixa wa Gerosale ga wa psolsajrukleko Giririkpotunanuko nunkakletananumtlu psolchijneko Kiglerpotunanu Tokanchi Kristopirana.

²⁰Wane nixa muchkotletnawa nunkakletyaplu Kiglerpotunanu Tokanchi, ma koschekgiwakatikowakaya Kristo, gi wa satuna galpokotyawaka nkamrupjitinripa.

²¹Seyni chinyongatyawaka: Munkaklewyegitkonewa retanna. Mjemkanewa rumata jemanruna.

²²Giyagni gixo kata numaletka gixa yegi nyinripa.

²³Ga wa xani gike nixatka tyesretkaka. Gixo walapu nalukpotutmaklu nyayegityagi.

²⁴Giyagni Gispanya nyinpatka, nyayegitangi. Gi rixanu nkagwaka getlemtgi nuknogamtinipa, ganikyapno waneya, nali getlemtinpatkagi.

²⁵Ga wa xani Gerosale nyanutka nupxakyapna kpashirine.

²⁶Gi rixanu Masetonya gajene, Gakayi gajene kigle getle rixluna genekashlu gitaklu kwamonurune kpashirine chinanu wa Gerosale gwachine.

²⁷Gi rixanu kigle getle rixluna nyi payineko. Ga wa galikaka rumkata gipekooyegletna Gerosale gajene, rapikonna chinanu kiglerkaka wannanu Giwekikaluruya. Payineko gimkata gipxaklekoxna gimaneyna.

²⁸Giyagni nnikatinpatkalu wa tye ga wa npoyegitinpatkalu tye kamrurchi, Gispanya nyinpatka, netamtangi xako.

²⁹Numatlu wa napyegitinipgi, Kristo giglenshinikanyegle potu numapokanu.

³⁰Nkegemgayegitgi, nomolene, Wutsrukate Geso Kristoya, ga wa galuklewlu Giwekikaluruya, gipxakanno. Goyakalu gagjiyegitanno,