Rom 15:7-30

⁷Eme ya aha kaseken nadu tine aha oro ari ari, i buku none Krais mene aseken aha; ma idah kameh winiyan mesekei iri lau atudun Kindrei.

⁸Ya eme jo kasehek taha ta Krais mene eme asahan lohowan tiri Juwis. Iy amekes lahou doh ta leheya Kindrei badeh, tiye sahou handru ta tandrakan tan mene iy amekes i ta tubu iri mene ndra-au.

⁹Ya eme, iri lau badu leheleh winiyan atudun Kindrei in hamon ta tikisiy tan i buku none sahou mene ndratorowenei: “Ya eme ta katin doh le, jo kameh udu ndrokowa iri lau badu leheleh atudun nyaram. Ma jo kameh iyah wari ta atudun nyaram.”

¹⁰Ano ja asehek i buku doh: “Ya aha lau badu leheleh badeh, ka le se hawe iri lau ta Kindrei, ya aha kasekesek.”

¹¹Ma buk ndrabun tiye ale i buku doh, “Aha lau mari badu leheleh katudun Laban, Ma hawe aha lau mari kayah wari ta atudun iy.”

¹²Ma propet Aisaya ale asehek anya, “Idah kameh, lundriye Jesi ari kameh barasahan, Iy kameh asahan ta atondrok iri lau badu munyak tinan mara-ei, Ma iri lau badu leheleh kameh atehei budon tiri in tan ma atondrok iy ta sasah mwasin kameh iy edeu i tiri.”

¹³Ya jo aseken Kindrei, ndramak ta edeu lakou mwasin, kamesekei bolo oda aha kidih na sekesek, ma hawe oda aha kudu mwasin ki-in hamon ta budon taha handru in tan. Ya eme ma budon taha kameh abadok ta anyolom bohon i bwena ta lakou mwasin na boto-on ta Malawin Ndrabun.

¹⁴Aha nadu tine, budon tek ndrabadok ta aha amwenen badeh, ndradah handru na kandriyen mwasin. Ma aha ndradah na tanan aha mene ndrakuhiy, ma eme winiyan sebenei aha ta leheya ma hawe batanau aha ari ari.

¹⁵Jo nane atorou sahou rayah boto-on labai ewek taha ta tiye nyala aha ta budon taha samaniy. Tasah, na tikisiy ta Kindrei le badeh,

¹⁶iy atehei lahou dah eme kanik ta atiye sahou ta nyala Krais Jises ki tiri lau badu leheleh. Jo badeh, i buku none ari pris amekes lahou ta atiye sahou mwasin ta Kindrei. Ya eme iri lau badu leheleh badeh, i nyara salom jo edeu i mada Kindrei ma eme iy sekesek ta aliy. Ma hawe Kindrei badeh, mesekei iri asahan lau tan handru i san ta iy suni Malawin Ndrabun ili manyah udu bolo oro.

¹⁷Ya eme in bwele-e sahou nane ndrasehek ndra-au, jo winiyan sekesek ta aliy. Tasah jo badeh, ndrahis ndrase hawe Krais Jises, ya aru amekes lahou ta Kindrei.

¹⁸Ma eme jo winiyan basehek ta nyala sasah ja bwai; arile jo le kameh asehek ta nyala sasah Krais atehei eme kanik ta amekes iri lau badu leheleh kanuhun boho Kindrei i san ta sahou mwasin ma tanan handru, jo asehek.

¹⁹Handru, Malawin Ndrabun aseben jo ta asehek sahou, ma iy edeu boto-on eme tek ta amekes kalem ma lahou tinan. Iri lau anyolom ma iri atehei budon tiri handru in ta Krais. Ya eme jo mene edek udu ndra Jerusalem o-on eme eme taku Ilirikum ta atiye sahou mwasin handru ta nyala Krais.

²⁰Jo bwalek ta atiye sahou mwasin ta nyala Krais ili kon ala lau ndra aliy bwena, kora-on jo ja katah asiu ki bwele-e ndru ta ndramak ari ja. Arile, udu bolo odak mari, jo aseken handru ta atiye sahou mwasin ta nyala Krais kili kon ha-un lau batiyaniy bala aliy bwe le.

²¹I buku none sahou mene ndratorowenei tiye i buku doh: “Are lau oro banuhun kundruh nyalan bwena bwe, Idah kameh oro anyolom iy, Ma are lau oro mene banuhun sahou ta nyalan bwe le, Na len dah kameh oro atanan ta aliy.”

²²Ya eme ta katin le doh, lahou tek solo-an jo mene amekes, sokei jo bawek hawe aha bwe.

²³Arile, na dah lahou tek ta amekes udu loboho kon dah badeh, ndrano. Jaha solo-an labai ndra-au jo aseken handru ta ewek atou aha, arile jo mene winiyan bwe.

²⁴Arile, jo amekes budon ta ewek atou aha udu bolo tekedek tek ili Spen. Jo kameh ewek udu hawe aha, taha sekesek luluwen sese, ano ma jo aseken aha kaseben jo ta rayah lakou ta ili Spen.

²⁵Arile, na dah jo winiyan bawek bwai; jo kameh ili Jerusalem atiye lakou ta aseben iri lau ta Kindrei badu doh.

²⁶Tasah, iri lau ta budon handru i ta Kindrei badu kon Masadoniya hawe badu kon Akaya badeh, sekesek handru ta atukum lakou ta aseben oro lau ta Kindrei ado Jerusalem, oro badeh, andriliu ta lakou.

²⁷Eme iri sekesek handru ta atukum lakou i saluwe sasah mene oro amekes i tiri. Budon i buku doh: Oro lau ta budon handru badu Juwis mene aseben iri lau ta budon handru badu leheleh ta sahou ta Kindrei ta nyala Krais. Ya eme iri lau ta budon handru badu leheleh kadeu saluwen ki hamon ki toro lau ta budon handru badu Juwis na lakou ta aseben bolo manyah toro.

²⁸Ya eme udu hamon ta jo edeu lakou ta aseben ili toro ano kameh, udu bolo tekedek tek ili kon Spen jo barawek baranyolom aha ai.

²⁹Jo tanan na len jo ewek hawe aha kameh jo badek laleyah bwe. Jo kameh ewek atiye sahou ma amekes aha adah ma sekesek na nyosowan handru ta Krais.

³⁰Ya eme aha nadu tine, jo indrek aha i san ta Laban Jises Krais, ma hawe i san ta tikisiy ta Malawin Ndrabun, ta aha kahas hawek, ma kales boto-on ma aha kateu salom keme tek ki ta Kindrei.