Romanos 10:15-21

¹⁵Jare ngaraa quia omombeu chupe, mbaeti yave Tumpa omondo. Echa Tumpa iñee pe oyecuatía oi corai: “Yayerovia yae co. Echa yogüeru ma ovae ñee mbɨacatu regua omombeu vae reta. Yogüeru omombeu vaera ñandeve ñee icavi vae, ñande yayerovia vaera”. Jocorai oyecuatía oi.

¹⁶Erei mbaeti opaete vae güɨrovia ñee icavi vae. Echa aracae Isaías jei corai: “CheYa, ¿quia ra güɨrovia romombeu chupe vae?” Jocorai jei.

¹⁷Jae rambue romombeu Cristo regua, iru vae reta oendu vaera. Jare oendu yave, amogüe vae güɨrovia.

¹⁸Erei taparandu peve: ¿Mbaeti ra oendu reta? Oendu reta co. Echa Tumpa iñee pe oyecuatía oi corai: Tumpa jembiócuai reta yogüɨraja opaete ɨvɨ rupi, jare omombeu opaete vae pe. Jocorai oyecuatía oi.

¹⁹Erei taparandu ye peve: ¿Mbaeti ra oicuaa Israel pegua reta? Oicuaa reta co. Echa tenonde voi aracae Moisés jei corai: Ayapota icavi vae mbaeti co chembae vae reta pe, pe reta peñemoagüɨro vaera jese reta —jei Tumpa—. Ayapota icavi vae mbaeti iyaracuaa vae pere chupe vae reta pe, pe reta pepochɨ vaera —jei. Jocorai jei.

²⁰Jare Isaías jei ye oquɨye mbae reve corai: Mbaeti chereca vae reta chevae ma —jei Tumpa—. Ayecuaa mbaeti oparandu cheré vae reta pe —jei. Jocorai jei.

²¹Jare Isaías jei ye Israel pegua reta re corai: “Jecuaeño aeni tei yogüeru vaera cheve —jei Tumpa—. Erei mbaeti oyapo che jae chupe reta oyapo vaera vae. Jecuaeño oyovaicho che ndive —jei”. Jocorai jei.