Romans 10:15-21

¹⁵Edo God da binga minonu sari embobo awa itae mambae oro mo embo mo rawodo edo binga mo ingeri? Teta jiwari mi sira awodo, “Edo embo binga ewamei budo bugudo era awa ungoda bugari awa dagari ae be ra.”

¹⁶Awasedo ingodena gosera Israel embobo binga ewamei ingisera. Awarate embo enumba ae gebe isera. Awasedo Isaiah kotari jiwae mi sisira, “Bada God binga nanemi minonu setena amemi gebe eri?”

¹⁷Awasedo embo binga ewamei Iesu Keriso da jawo da awa ingiroro tumonda ari awa ungoda yei bugadira.

¹⁸Awarate nanemi nganega ari eiawa ititena, Israel embobo binga ingae mo gebe ta? Awodo aera ungo binga ingera. Edo ge awa jiwari mi sira, “Busu berari da embo berari mi binga God da jawo da javi awa ingera. Edo binga awa embobo busu berari da ainda yei bugira.”

¹⁹Edo sedo gari nei ititena, Israel embobo gosiserita mo ko gaeri? En ungo gosisera. Moses mi mina sari awawa ingodena kondade edo sisira. Umo sisira God mi uso yei sedo sisira, “Nanemi embobo asisi egae da yei ewamei ininono inemi ungoda yei joda dumo adesa. Edo nanemi embobo eiawa gae awawa jawo sininono imo tini gambari adesa.”

²⁰Edo moses giti awa gaetiri Isaiah amboda oju ae sisira God mi uso yei sisira, “Embo na eura ae atera amimi na tambera. Edo embo na kotae era awa ungoda yei na nasuka isaga etena.”

²¹Awarate Israel embobo awa sisira, “Embomei eiawa iji berari na beuso ise ujo ae edo era embobo awa edo embo na ungode da umo jigari ewamei adi dipapa edo ena awasedo na ungo naso yei purorase simba edo ena.”