Rom 10:15-21

¹⁵Meng pot pisonhe Got oh meng pot pison han ihirnong na darhet patin oh ihir pot pisaproheda. Basra. Orhor darhetporhanwi ihir pot pisaptimur. Orhor darhetporhan gin mama pot pisapti ohmur. Ama pot pisapti ohe meng rim ma brak matip oh mamaru hat patmur. Hanipyah ohe yah meng ohsi popriya moh yaho daham amam haptimur rim brak matipmur.

¹⁶Got oh orhe yah meng pot pison han ihir darhetporhan pot pisapti orhor hanip ihirdapat kat ihir tit na dindeiptimur. Kat ire ma na dindeipti ohe meng oh Aisaia oh rih gipor brak matipmur. Ma brak matip oh mamaru hat patmur. Hanipyaha. Nure meng pot pisapti mengnong moh de ihir amrapti. Hanip ti na amraptimur. Uut han pok tit arpin menghe daham amraptimur rim brak matipmur.

¹⁷Meng amram arpinhe daham ma amrapti oh Krais orhe yah mengnong moh pot pisaperhan amraptimur. Amrama Krais oh arpin ihtin hanhe daham orhe danong haptimur.

¹⁸Juda hat pati bap Isrer ihir meng na amraptida. Basra. Ihir gonsi amraptimur. Gonsi amrapti ohe meng tit ma brak matip meng oh mamaru hat patmur. Got ohe meng oh aw pe mong pe mong mong moh gonsi sapatin amram am hat patimur. rim brak matipmur. Ihan amratin oh amrapti orhora; dimtinnong oh kat tit na dindeiptimur.

¹⁹Ihir meng amrapti hanhan hat patida. Basra. Ihir gonsi am hat orhor patimur. Moses ohe ma brak matip oh Isrer ihir gonsi am hat patio rim Juda na hat pati han ire boknong mar brak matipmur. Ma brak matip oh mamaru hat patmur. Juda hat pati bap gurdapat Maihir be kuuhan bapmur ma poripti ihirnong asoh norhe da apriporhan gur ihirnong wamara heisup deiprimur. Hut pati han bap maihir kinhaya rim ihirnong heisup deiprimur. ritporhan Moses oh brak matipmur.

²⁰Gahan Aisaia oh Isrer ihir nohnong inahatiprohekin daham na kas hama Got ohe meng moh pomat brak matipmur. Ohnong potporhan ma brak matip meng oh mamaru hat patmur. Juda na hat pati han ihir ohe danong hatper daham na angnahapti orhor ihir nohnong wanaham nohe danong haptimur. Ihir Got oh kinhat pat han rim ti na dahatahapti orhor noh ire kinteinong pitap hapatmur. Got oh gipotporhan Aisaia oh brak matipmur.

²¹Isrer hat pati bap ire boknong ritporhan ma brak matip oh mamaru hat patmur. Ihir nohnong Gwe meng oh nuhur na amratiprohemur napor kasip ham sakarap nahat napaptin orhor noh ihirnong ambutinmat bes arhat orhorwi patmur ritporhan Aisaia oh brak matipmur.