ROMANOS 10:11-21

¹¹Loo libr co' nac xti's Diox ndub di's co' mbez: Ryete mèn co' ndxela's loo mbi'a, mèna ne'tyóode yiloa par ya ye'th lezo' mèna no par tyoo xà' lezo' mèna. Ne' ne' xi lezo' mèna yiloa por cón che'n mbi'a.

¹²Cona, ngue niin loo gu': Indyu'de mèn nación Israel más loo Diox leque taamas mèn co' inacte mèn nación Israel. Leque yub Diox nac Diox co' ñibe' loo rye mèn. No nda' Diox rye loothe con' ndac loo mèn co' mbez lèe Tad Diox.

¹³Por cona, ryete mèn co' cuez lèe Tad Jesús, mèna lyá' loo con' ryes.

¹⁴Hui' gu' nexa. ¿Xá mod cuez mèn lèe Tad Jesús co'se' tarte yila's mèn loo Tad Jesús, à'? No ¿xá mod yila's mèn loo Tad Jesús co'se' tarte gòn mèn cón che'n Tad Jesús, à'? No ¿xá mod gòn mèna cón che'n Tad Jesús co'se' yende chó mèn tarte co yalbàn cón che'n Tad Jesús loo mèn, à'? Yende moda, ¿lé'?

¹⁵No ¿xá mod co mèn yalbàn loo xtàa mèn co'se' yende chó mèn nzo co' tel' xtàa mèn par ya lo mèna yalbàn loo mèn? Yende moda, ¿lé'? Ndxàca loo mèn co' nda lo yalbàn xal ndub di's loo libr co' nac xti's Diox co' mbez taandxè': Susque' mèn ndac nac mèn loo Diox, mèn co' ngo yalbàn cón che'n di's ndac. No anze'f huen nda mèna.

¹⁶Per fte' lezo' gu' iryede mèn nación Israel ndyubdi's loo di's ndac co' ndlu' cón che'n Crist. Ndxàca loo mèn nación Israel xal ndub di's loo libr co' nac xti's Diox co'te' mque' Sayi ye's. Sayi ndxab: Yende chó mèn ngola's di's co' mde'th nu' loo mèn, Tad.

¹⁷Per nase nzoque' mod yila's mèn no gàp mèn yalxla's cón che'n Crist co'se' gòn mèn cón che'n di's ndac co' co mèn yalbàn cón che'n Crist.

¹⁸Ñibdizen thìb con' loo gu': ¿Ché' ndli gu' cuent tarte gòn mèn nación Israel cón che'n di's ndac ndxè', cà'? ¿Xá mod ne' tar gòn mèn nación Israel cón che'n di's ndac ndxè', à'? Loo libr co' nac xti's Diox ndub di's co' mbez: Dib athu loo izlyo' ndxathle' no ndxènle' cón che'n di's ndac che'n Diox co' mde'thle' mèn no co' mblole' mèn yalbàn. Axta dib vuelt ro izlyo' mbyath mbyèn di's co' mde'th mèna, ne. Aa. Nonque' mèn nación Israel cón che'n di'sa, ¿lé'?

¹⁹Beren, ñibdizen loo gu' tedib vez: ¿Ché' ndyac gu' tarte ta' mèn nación Israel cuent cón che'n di's ndac ndxè', cà'? Yende xàa. Nonque' mèn nación Israel cón che'n di's ndac ndxè'. Con que nerleque' cón che'n di's ndac ndxè' nac di's co' mda' Moisés cuent loo mèn nación Israel co'se' mde'th Moisés di's co' ndxab Diox co' mbez taandxè': Daa li gàc con' ndac loo mèn che'n tedib nación co' inacte mèn nación Israel co' ndyac gu' yende cón ntac loo Diox. Le' gu' na, angnziri' gu', yan lezo' gu' ñèe gu' mèn naciona por cón che'n con' ndac co' lin loo mèna. No lin con' ndac loo mèn thìb nación co' ndyac gu' nac mèn nguud no mèn naad. Con' ndac co' lin loo mèn naciona, le'i càb le' gu' yecloo tín' ñèe gu' mèn naciona.

²⁰Nde nxon', mbli Sayi ryes. Ndxab Sayi cón che'n di's co' ndxab Diox loo mèn nación Israel. Ndxab Sayi: Mèn co' alithe mque tee ban no ne'ncua'nte mèna daa tac mèna tarte ñee no tarte gòn mèna le' con' co' nac cón chenen ngro xo'f loo mèna. Mblin par ngòca loo mèna, ne, xal mèn co' mblu' loo loo mèna, loo mèn co' iñibdi'ste cón chenen.

²¹Lomisque' ndxab Sayi cón che'n mèn nación Israel xal ndxab Diox: Ryete huiz msilen yan no nalyat mbezen loo mèn co' nac mèn nacionpe' daa, mèn co' ngòc mèn co' indyubdi'ste no mèn co' ngòc mèn naad no mèn nguud par ngòo mèna loo cón chenen tedib vez. Per ne'nglide mèna cas con' ndxaben. Thìba con' ndxè'.