Rom 10:11-21

¹¹Vengan xa Vanuvei Eo biteni bit, “Ngan xil xa laling neketen nae en, xi nasak ni xil linave unoun.”

¹²Ngan ak di misep usil xir vus. Vengan xa, pe met Hi, neta tovuol vasav ni Siu xil e ngan xil xa latave Siu ti. Hi be hisit Suv na moletin xil vus, e di misa tuxolxatien xa tellep mi ngan xil vus xa di lakei mini ve tutouen.

¹³Ngan ak nggoni ngan xa Vanuvei Eo biteni bit, “Moletin xil vus xa lakei ba mi Iahova ve tutouen, xi iteh meulien e xil.”

¹⁴?E moletin xil likila likei mi Hi ve tutouen itep xosxa lataneket ti mu en? ?E lineket en itep xosxa latalong ti mu sepinien usili? ?E lilong sepinien usili itep xosxa moletin tovuol tengan vaha vahithiteni mi xil?

¹⁵?E moletin xil likila lihithiten sepinien ak itep xosxa moletin ti nasil xil tengan lava? Ngan ak nggoni ngan xa Vanuvei Eo biteni bit, “Melele xa moletin xil langgur longeongen hos bemei, meien nae bos xa bos.”

¹⁶E tave moletin xil vus ti iaxa lalong xat sepinien xil te longeongen hos ak. Vengan xa provet Aesea tehiteni mun tehit, “?Iahova, visi mike reitin e sepinien namem? Moletin tovuol.”

¹⁷Mak, ma itiamu, moletin tei iha ihithiten longeongen hos usil Iesu Kristo mi moletin xil. Ti, moletin xil likila lilonge. E melele xa lilonge, likila liling neketen nae en.

¹⁸E nasis xamim, “?Midep, be reitin xa mol‑Isrel xil latalong ti mu longeongen hos usil Kristo?” Io, lalonge ngamu. Vengan xa ngan ak nggoni ngan xa Vanuvei Eo biteni bit, “Nggo rae xil, di labithiten longeongen usili mikapis e rute xil vus, e sepinien nae usili ba duxoh moletin xil ngasen te ut etan.”

¹⁹Nasis xamim vatei mun nabit, “?Midep, be reitin xa mol‑Isrel xil latalong ti mu naha xa Hi tehit lelen ni xa ipol ni?” E‑e, lalonge tuei. Vengan xa Mosis tetisi xa Iahova vari tesep usili tehit, “Inou nipol ihos mi tatit moletin sav xil tengan nisak ni xamim, mol‑Isrel xil, iemim ihei naha xa di napol ni e meulien nae. Reitin, iemim ikat xa nipisen inou mi ngan xil xa xamim di mukes xil ni unu xil.”

²⁰E Hi tehit kila mak mu melele xa tesepin texo provet Aesea tehit, “Ngan xil xa latalang ves nou ti, xil iaxa latekamet nou. Reitin, natepisen nou mi ngan xil xa latnakes nou ti.”

²¹E Hi tehit usil mol‑Isrel xil tehit, “E melengien xil vus, di nate momal ni heok tengan namur pilei moletin navan xil, e xil latalong xat nou ti, e vatixil nggeih pupu.”