Akaloma 10:11-21

¹¹Majandiko Gachwapi galenga, “Kila ojwanhwamini Nnoongo akolaje oni.”

¹²Nhwalo gongo kwa boa, kabe ulekinije kati ja Akayahudi na bandu banga Akayahudi, Angwana ba boa nga bamwe, bombe ukina muno kwa boa abannyopa.

¹³Magambu Majandiko Gachwapi galenga, “Kila mundu jwapakujopa ku liina lya Angwana, makomboligwa.”

¹⁴Bannyopabole jwenio kongo kunhwaminije? Kabe, bunhwaminabo anda banajoaje nhwalo gwakwe? Na bajoabo nhwalo gwakwe anda abije mundu jukutangacha?

¹⁵Na bandu batangachabo anda bakingigweje? Anda pagalenga Majandiko Gachwapi, “Kilebe chu kualala muno kuika kwa baba abatangacha Nhwalo Gwambone!”

¹⁶Nambu boaje abajekatile Nhwalo Gwambone. Na Isaya alenga, “Angwana, nga beneke abaamine nhwalo gwito?”

¹⁷Kuamini kuboke pu kujoa nhwalo, nu nhwalo gwenio uboke mulilobe lya Kilisto.

¹⁸Nambu ngonya, bo, bujoiningije nhwalo gwenio? Elo, bujoininge, anda Majandiko Gachwapi pagalenga, “Lilobe lyabe lijoinike padunia poa, malobe gabe gaike mpaka kujipei dunia.”

¹⁹Ngonya kabele, bo, iotwi kube bandu ba Kuisilaeli bamanyangitije? Mwene Musa nga jukutumbula kujanga, “Manammekanga mabonelange bwiu kubandu banga kilambo, manammeka mme na lilaka kwa ilambo ya bandu akatokamau.”

²⁰Kabe Isaya ajiga kulenga, “Baba bangambalapala bambatite, nikilaite kwabe banga konya nhwalo gwango.”

²¹Nambu kwa bandu ba Kuisilaeli alenga, “Lyoele tipi nganatondabekea maboko gango kakemanga bandu abankanite Nnoongo na bangajali.”