Roma 10:11-21

¹¹Doen kagi te Timanem insolat, “Eked palos pekebollog se otaw somalig diyà kandin.”

¹²Ibeg te Timanem, somalig se kedita te otaw diyà ki Jesu Cristo. Wedad elet diyà te Judiyo aw otaw kenà Judiyo, so olò sebad se Pengolo te kedita tadon. Ontò din egkeidowan se kedita te otaw memoyò te tabang din,

¹³so doen kagi te Timanem insolat, “Mekelowà lekat te salà se kedita te otaw memoyò diyà te Pengolo tadon.”

¹⁴Meneng eked dan pekepemoyò te tabang din singed aw somalig dan diyà kandin. Eked dan pekesalig diyà kandin singed aw menenalan dan te kagi din. Eked dan heman penenalan te kagi din singed aw doen otaw megtoladà kandan.

¹⁵Wedad heman otaw megtoladà kandan singed aw doen isogò doton kandan. Meneng doen den otaw insogò amon megtoladà kandan, so doen insolat kidoen te kagi te Timanem, “Ontò mèpiya se pegdateng te menge otaw egtoladà te Mèpiya Indan.”

¹⁶Meneng te pegtoladà dan te Mèpiya Indan, pilabok se Judiyo nemenal kenyan, so gebii minikagi se telekeliwat te kagi te Timanem si Isaias, “E Pengolo ko, wedad nael otaw nemenal te intoladà day.”

¹⁷Yan netegahan tadon te eked pemenal se otaw singed aw menenalan dan te kebenalan. Se kebenalan, yan se ipegtoladà day tepad ki Cristo.

¹⁸Pengkey wedà pemenal se keditaan te Judiyo, meneng ikà niyo eg-aneng-aneng te wedà dan indani te kebenalan. Inindanan den dan, so doen kagi te Timanem insolat, “Dinineg den iyan te kedita te otaw dini lanto te tanà. In-indan den iyan doton te kebelad te keneyonan.”

¹⁹Pengkey medita se bowad-bowad i Israel wedà pemenal, meneng ikà niyo eg-aneng-aneng te wedà dan kelebeti se intoladà kandan, so doen kagi te Timanem insolat i Moises gebii, kagi din, “Tebangan ko se menge otaw kenà Judiyo amon mingà kaw kandan. Keidowan ko se menge otaw egkebensihan niyo amon meopal kaw.”

²⁰Labi pa mebangal se kagi te Timanem insolat i Isaias tepad te menge otaw kenà Judiyo, kagi din, “Kinità a te menge otaw wedà pengemahà kanak. Pengkey wedà dan peg-insà tepad kanak, meneng migpekità a den diyà kandan.”

²¹Doen heman kagi te Timanem insolat i Isaias tepad te menge Judiyo, kagi din, “Pengkey gayed a egtawal kandan amon megpedapag dan diyà kanak, meneng kenà dan egtolò so metugul dan.”