Rom 10:11-21

¹¹Teto biŋ gêc gebe “Ŋac taŋ kêkêŋ gêwiŋ eŋ naŋ, oc ênaŋa atom.”

¹²Juda to lau samuc têtôm tauŋgeŋ. Êsêac samob nêŋ Apômtau tageŋ. Eŋ ŋac tolêlôm kêtôm gebe êmoasiŋ lau samob, naŋ aweŋ gêjac eŋ naŋ,

¹³gebe “Apômtau ênam lau samob, taŋ aweŋ ênac ênê ŋaê naŋ kêsi.”

¹⁴Lau embe sêkêŋ êwiŋ ŋac tau atom, oc aweŋ ênac eŋ amboac ondoc. Embe sêŋô ênê biŋ atom, oc sêkêŋ êwiŋ amboac ondoc. Embe sênam mêtê êsêac atom, ma oc sêŋô amboac ondoc.

¹⁵Ma Anôtô embe êsakiŋ jaeŋwaga atom, oc sênam mêtê amboac ondoc. Kêtôm teto gêc gebe “Op, lau taŋ sêsôm ŋawae ŋajam lasê naŋ, eŋkaiŋ ŋakicsêa ŋajamanô.”

¹⁶Mago samob sêŋô ŋawae ŋajam tau ma sêkôc sa atom gebe Jesaia kêsôm gebe “O Apômtau, asa kêkêŋ gêwiŋ jaeŋ, taŋ aêac akêŋ naŋ.”

¹⁷Amboac tonaŋ takêŋ gêwiŋ ŋam kêsêp taŋô jaeŋ. Taŋô jaeŋ ŋam kêsêp sêsôm Kilisinê biŋ lasê.

¹⁸Ma gabe jatu kênac gebe Êsêac sêŋô ŋawae ŋajam atom me. Masi, sêŋôgac, gebe teto gêc gebe “Aweŋ ŋaonda kêsa gêjam nom ŋagamêŋ samob auc, ma êsêacnêŋ biŋ gelom-gelom e gêdêŋ nom ŋamadiŋ.”

¹⁹Jatu kênac êtiam gebe Israel oc sêjala me masi. Sêjalagac. Andaŋgeŋ Mose kêsôm gebe “Aê jakêŋ amac anam lêmuŋ êsêac, taŋ têtu laum teŋ atom tageŋ, ma jaŋgôm amac têmtac êmbôli auc êndêŋ lau-kauc-masiwaga naŋ.”

²⁰Ma Jesaia kêsôm gêc awêgeŋ gebe “Lau taŋ sêsôm aê atom naŋ, têtap aê sa, ma gaoc tauc lasê gêdêŋ êsêac, taŋ têtu kênac aê atom naŋ.”

²¹Go kêsôm tonec kêpi Israel gebe “Gajac kajo lau taŋeŋpêc to aweŋ olaboa kêtôm bêcgeŋ elêmê.”