Lom 10:11-21

¹¹Liva̱nen nises Bukitab waseg, mamagina: “Nag kal bisimounid waseg towen, mo beivag anmwasin, nag.”

¹²Nag ilivis min-Yudiy palatan, ven mwasanin gimgilis palatan, nag. Babaw ya̱kids daGuyaws kanatok-wan. Magat bitanitoug waseg mo bisiwyoubud bwein.

¹³Adbabaws-wan bitadouws daGuyaws wayagan, mo bikatinabweids.

¹⁴Tage gamag mwasanin ta-ma̱wan bidawes yagan, peinan nag isimounids waseg. Ta-ma̱wan bisimounids peinan nag ikakins yagan. Nag ikakins yagan, peinan tageiguy nag.

¹⁵Kukin go bikayabes tageiguys, mo binekes, biliganes, bisimounids mo bidawes yagan o bikatinabwes. Liva̱nen tageiguy nises mamagina: “Adbwabwals singay bwein peinan igeiguys livan bwanabwein waseg!”

¹⁶Tage babaw gamag nag itams waseg livan towen bwanabwein. Isaya anilivan kweiboug mamagina: “O Guyaw nag kavel isimounid agulivan waseg.”

¹⁷Tage bigeiguys liva̱nen Kelis mo biliganes mwasanin, bisimounids.

¹⁸Tage bulagan inekes, tan? Magen! Liva̱nen nises mamagina: “Ages bo iliganes ven babaw wasigeis. Asilivan bo ikatiliganes ven babaw wadaban pwepway.”

¹⁹Tage min-Yisleil nag ikakins. Wanamug Moses anilivan mamagina: “Igaw min-Yisleil yakamiy bukukines makava gamag mwasanin, mo bavag dibamiy bimouvit. Bod tasiyas tabla̱bols bukukines, mo bavag bikapasal nuwamiy min-Yisleil yakamiy.”

²⁰Wankuyeim Isaya ikatiginaney, ilel Yowbad anilivan mamagina: “Tasiyas nag ineveigs tage bo iba̱neigs. Tasiyas nag ikatugwans silma̱nin yey mo akamat wasigeis.”

²¹Tage liva̱nen min-Yisleil ilel mamagina: “Tut babaw adudouw wasigeis gungamag tasiyas takapidabs o takakons; adudouw, bo nag.”