Rom 10:11-21

¹¹Piŋkop dakon gen da uŋun do yaŋ yosok: “Amɨn morap Piŋkop nandaŋ gadaŋ ɨmaŋ uŋun mayaktok dɨma pakdaŋ.”

¹²Juda amɨn gat ae Amɨn Ŋwakŋwarɨ Kabɨ gat uŋun kɨsi Piŋkop da dabɨlon arɨp gɨn. Amɨn Tagɨ uŋun amɨn morap kɨsi dakon Amɨn Tagɨni. Uŋun da amɨn morap paŋpulugosak do bɨsit iyaŋ uŋun madepsi gɨsamɨkdak.

¹³Do “mɨŋat amɨn morap Amɨn Tagɨ dakon man yaŋek paŋpulugosak do bɨsit iyaŋ uŋun yokwikon baŋ tɨmɨtdɨsak.”

¹⁴Mani mɨŋat amɨnyo dɨma nandaŋ gadaŋ ɨmni kaŋ, niaŋon da bɨsit iyɨŋba paŋpulugosak? Ae gen bini do dɨma nandani kaŋ, niaŋon da nandaŋ gadaŋ ɨmni? Ae amɨn kɨnda da Piŋkop gen dɨma yoyɨsak kaŋ, niaŋon da gen bini nandani? Uŋun arɨpmɨ dɨma nandani.

¹⁵Ae amɨn dɨma yabetni kaŋ, Piŋkop gen arɨpmɨ dɨma yaŋ teŋteŋokdaŋ. Piŋkop gen da yaŋ yosok: “Gen bin tagɨsi paŋabaŋ amɨn dakon abapni uŋun yo madepsi!”

¹⁶Mani Israel amɨn kɨsi da Gen Bin Tagɨsi dɨma abɨdawit. Aisaia da yaŋ yagɨt: “Amɨn Tagɨ, gen yaŋ teŋteŋomaŋ namɨn da nandaŋ gadasak?”

¹⁷Yaŋdo, nin nandamaŋ, amɨn da Kristo dakon gen yaŋ teŋteŋaŋba nandano uŋun da nandaŋ gadat paŋalon asak.

¹⁸Mani nak gen kɨnda dayɨkdɨsat uŋun yaŋ. Israel amɨn Gen Bin Tagɨsi uŋun nandawit bo dɨma? Uŋun nandawit. Piŋkop gen papia da yaŋ yosok: “Mɨŋat amɨn morapyo mɨktɨmɨ mɨktɨmɨ ekwaŋ da tekni kɨlɨ nandawit. Geni mɨktɨm dɨwarɨkon da dɨwarɨkon kɨlɨ kɨgɨt.”

¹⁹Ae gen kɨnda gat dayɨkdɨsat uŋun yaŋ. Israel amɨn da gen uŋun dakon mibɨlɨ nandaba pɨsagɨt bo dɨma? Uŋun nandaba pɨsagɨt. Mibɨltok Piŋkop da Moses dakon gen kagakon da Israel amɨn gen yoyɨgɨt uŋun do nandaneŋ. Gen yaŋ yagɨt: “Nak da amɨn kabi kɨnda man bini mɨni ae nandak nandakniyo tagɨ dɨma uŋun tɨmɨkgo nak nandaŋ gadaŋ naba ji da uŋun do nandaba yokwi tok aŋek butjap nandakdaŋ.”

²⁰Ae Aisaia da gen tebaisi yaŋ yagɨt: “Amɨn kabi kɨnda nak wɨsɨk do pi dɨma awit uŋun da nak kɨlɨ aŋalon awit. Ae nak do dɨma yaŋek egɨpgwit amɨn nak da naga naŋ yolɨko kɨlɨ nandawit.”

²¹Mani Aisaia da Israel amɨn do nandaŋek yaŋ yagɨt: “Nak gɨldat kɨnda kaloŋ gen kɨrɨŋɨt aŋek but tobɨl ak do dɨma nandaŋ amɨn uŋun nagon opni do kɨsitno dedaŋ egɨsat.”