Roma-satziite 10:11-21

¹¹Tema ari okantzi Osankinajanorentsi: Inkarate aventaashiretaiyaarine, eerora jamenaashivaitaa.

¹²Onkantavetakya aakarika judío, aakarika griego-thatatsiri, iriitakera Cristo Avinkathariteta maaroiteni. Intzimerika ñaañaatairine aritake ineshinonkaperotakeri.

¹³Tema jiroka ikantaitake: Intzimerika ñaañaatairine Pinkathari, impairyaagairi, aritake iravisakotai.

¹⁴¿Kantatsima iñaañaayeetairi Pava tera javentaashireyeetari? ¿Kantatsima iraventaashireyeetyaari Pava, tera inkemakotaiteri? ¿Kantatsima inkemakotaiteri, tera intzime kinkithatakaantatsine?

¹⁵¿Kantatsima inkinkithatakotaiteri, tera intzime otyaantantatsine? Irootake josankinayeetantakarori, kantatsiri: ¡Oshekira inkameethatziitataitera amerone kameethari ñaantsi isaikantaitari kameetha!

¹⁶Iro kantamaitacha, tera maaroiteni inkempisantaitero Kameethari Ñaantsi. Irootake ikantantakari Isaías-ni: Pinkatharí, kempitaka te inkempisantaitero nokinkithatziri.

¹⁷Okovajaantatyaara iretaitavakyaaro inkemayeetavakero iñaane Pava onantyaari iraventaashireyeetantyaari.

¹⁸Nokantzi naaka, “¿Aritakema ikemayeetakero?” Aritakera, tema jiroka josankinayeetakeri kantatsiri: Jiñaaventayeetakero nampitsiiteki, Ikemayeetakero tsikarika isaikayeetake jaka kipatsikika.

¹⁹Napiitero nonkante, “Irikaite icharineyetakari Israel-ni, ¿Ikemathaperotakeroma?” Aña iriira Moisés-ni oñaarontakerori irosankinareki, ikantake: Ari nonkantakaakyaaro pisamaneentyaari pashinesatzi atziriite kaari sheninkatavakaachaneri. Osheki pinkisashireteri ikaratzi pipaiyetziri “masontzishireriite.”

²⁰Irojatzi ikantakeri Isaías-ni irirori: Jiñaayetaana kaaryaajaini kovakovatenane. Noñaakayetaari kaari amemenatenane.

²¹Iro kantacha jiroka jiñaaventakeri Isaías-ni ikantakota Israel-mirinkaite, ikantake: Novaankavakotapiintashivetakari, iro kantamaitachari te inkempisantaiyenani, piyathari jinaiyakeni.