ሮሜ 10:11-21

¹¹ጌሻ ማፃፋይ፥ «ኢያን ኣማኒያ ኦኒካ ዬላቴና» ያጌስ።

¹²ኢሲ ፆሳይ ኡባ ጎዳ ጊዲያ ጊሾ ኣይሁዴታ ጊዶኒኔ ኣይሁዴ ጊዶና ኣሳ ጊዶን ዱማቴꬂ ባዋ። ኢ ባና ፄጊያ ኡባስ ዳሮ ኬሃ።

¹³ጌሻ ማፃፋይ፥ «ጎዳ ሱንꬃ ፄጊያ ኦኒካ ኣታና» ያጌስ።

¹⁴ያቲን፥ ኤንቲ ኣማኖና ዴዒሼ ዋኒዲ ኢያ ፄጋናው ዳንዳዖና? ኤንቲ ኢያባ ሲዖና ዴዒሼ ዋቲዲ ኢያ ኣማናናው ዳንዳዖና? ቃሲ ኤንታው ቃላ ኦዲያ ኣሲ ባይና ዴዒሺን፥ ዋኒዲ ሲዓናው ዳንዳዖና?

¹⁵ኪቴቲዳ ኣሲ ባይና ዴዒሺን፥ ቃላይ ዋኒዲ ኦዴታናው ዳንዳዒ? ጌሻ ማፃፋን፥ «ኡፋይሳ ዎንጌላ ኦዲያ ኣሳ ቶሆቲ ዋኒዲ ሎዖና!» ያጊዲ ፃፌቲስ።

¹⁶ሺን ኢሳያሲ፥ «ጎዳው፥ ኑ ማርካቴꬃ ኦኒ ኣማኒዴ?» ያጊዳይሳዳ፥ ኡባይ ዎንጌላ ኣማኒቦኮና።

¹⁷ሄሳ ጊሾ፥ ኣማኖይ ሲሳፌ ዬስ፤ ሲሲ ኪሪስቶሳ ቃላፔ ዬስ።

¹⁸ጊዶሺን፥ ኢስራዔሌ ኣሳይ ቃላ ሲዒቦኮና ጉሴዬ? ኣካይ ሲዒዶሶና። ጌሻ ማፃፋን፥ «ኤንታ ቃላይ ቢታ ኡባን ሲዔቲስ፥ ኤንታ ኦዳይ ሳዓ ጋፃ ጋኪስ» ያጌቲስ።

¹⁹ሺን ኢስራዔሌ ኣሳይ ኤሪቦኮና ጉሴዬ? ሙሴይ ካሴ፥ «ታኒ ሂንቴና ሌቄቲዳ ኣሳን ቂሮይሳና፤ ቃሲ ኤያ ኣሳን ሂንቴና ዪሎያና» ያጊስ።

²⁰ቃሲ ኢሳያሲ፥ «ታና ኮዪቦና ኣሳስ ቤንታስ፤ ታና ኦይቺቦና ኣሳስ ቆንጫስ» ያጊዲ ያዮና ኦዲስ።

²¹ሺን ኢሳያሲ ኢስራዔሌታባ ኦዲሼ፥ «ኡባ ዎዴ ኪቴቶና ኣሳሲኔ ታና ኢፂያ ኣሳስ ታ ኩሺያ ሚጫስ» ያጌስ።