Roma 2

1

2

3

4

5

6

7

8

9

10

11

12

13

14

15

16

¹Yan keilangan meg-ahà se kedita niyo egsila te doma otaw eg-inang te medaet. Eked kaw pekeikagi te wedad salà ininang niyo. Aw mikagi kaw te mèpiya aw ipelumun te Timanem se otaw eg-inang te medaet, aw medaet heman se eg-inangen niyo, ipelumun kaw heman doma dan.

²Netegahan tadon te metòlid se peg-okom te Timanem te pegpelumun din te kedita te otaw eg-inang te medaet iling kenyan.

³Sikiyo heman, aw egsila kaw te doma otaw eg-inang te medaet, meneng medaet heman se eg-inangen niyo, eden niyo aw mekelowà kaw lekat te pelumun te Timanem.

⁴Ikà niyo eg-aneng-aneng te eked kaw pelumuni te Timanem tandà te kedakel aw kedalem te pedowan din. Iling te nelibelan niyo te gayed medalem se pedowan te Timanem kenyo so ibeg din megselsel kaw.

⁵Meneng metugul kaw. Wedà kaw pegselsel, aw yan se doun te labi pa medaet se pelumun domateng kenyo te modi aldaw, so pineokit te pelumun din kenyo, ipetaga-taga din te ontò metòlid se peg-okom din,

⁶so doen ibegay din diyà te teg sebad-sebad otaw tepad te ininang dan.

⁷Doen menge otaw gayed eg-inang te mèpiya amon iduyun dan te Timanem, aw amon meg-ogpà dan doma din doton te langit te wedad temanan. Yan se otaw begayan din te kaling pedowan wedad temanan.

⁸Meneng doen heman menge otaw egtaking te ibeg te kandan pedowan. Kenà dan egpemenal te kebenalan tepad te Timanem, meneng eg-inang dan te medaet. Yan se otaw ontò ipelumun te Timanem.

⁹Doen ontò kelimahan domateng diyà te kedita te otaw eg-inang te medaet, labi se menge Judiyo aw se menge otaw kenà Judiyo heman.

¹⁰Meneng se kedita te otaw eg-inang te mèpiya, yan se iduyun te Timanem doton te langit. Begayan din se kedita dan te kelinaw te pedowan, pengkey doton te otaw kenà Judiyo aw labi den doton te Judiyo,

¹¹so wedad palos otaw pedigselan din te peg-okom.

¹²Netaga-taga se kedita te Judiyo aw eden se menge punù te Timanem ingkeliwat i Moises. Yan aw meg-inang dan te salà, ipelumun dan te Timanem tandà te peglàpang dan te punù ingkeliwat i Moises. Meneng doen heman menge otaw kenà Judiyo kenà egketaga-taga aw eden se menge punù te Timanem ingkeliwat i Moises. Aw meg-inang dan te salà, ipelumun dan heman te Timanem pengkey kenà menge punù ingkeliwat i Moises se iokom din kandan.

¹³Pengkey metaga-taga se otaw te menge punù ingkeliwat i Moises, meneng aw eked dan tolò kenyan, kenà dan se eneng-enengen te Timanem te metòlid dan, meneng se otaw ontò tomolò te punù din.

¹⁴Wedà ketaga-taga se menge otaw kenà Judiyo tepad te menge punù te Timanem ingkeliwat i Moises. Pengkey wedà dan toledai kenyan, meneng doen aldaw eked dan peg-inang te salà, iling te impunù ingkeliwat i Moises, so netaga-taga dan te doen salà eked dan kepakay inangen.

¹⁵Pineokit kenyan, ipetaga-taga dan te insawol den te Timanem se punù din kidoen te pedowan dan. Kidoen te aneng-aneng dan, netaga-taga dan te doen mèpiya aw medaet, so seletà eg-aneng-aneng dan te mèpiya se eg-inangen dan, aw seletà eg-aneng-aneng dan heman te medaet se eg-inangen dan.

¹⁶Pegtoladà ko te Mèpiya Indan, egtoladà a te doen pa aldaw domateng aw isogò te Timanem si Jesu Cristo meg-okom te kedita te otaw, so ipetaga-taga din se kedita te ininang tadon pengkey in-eles.

¹⁷Nayan, neluba kaw besi so Judiyo kaw, aw pinemallì kaw te Timanem. Egsalig kaw heman diyà te pegketaga-taga niyo te menge punù ingkeliwat i Moises amon eneng-enengen te Timanem te metòlid kaw. Egpelangkaw-langkaw kaw heman so sikiyo se egsimba te ontò benal Timanem.

¹⁸Eg-ikagi kaw te netaga-taga kaw den te ibeg din, aw biyasa kaw den egpemallì te mèpiya, so tinoledaan kaw te kagi te Timanem insolat.

¹⁹Eg-aneng-aneng kaw besi te iling kaw te mèpiya otaw meg-agak te otaw bota, aw iling kaw te solò eg-olog te dalan pesalo doton te Timanem.

²⁰Eg-aneng-aneng kaw te biyasa kaw den megtoladà te doma otaw wedà toledai aw wedà pa peg-iling tepad te Timanem, so nesikop se kebiyasa aw kebenalan lekat te punù ingkeliwat i Moises.

²¹Pengkey migtoladà kaw te menge doma otaw te keilangan metòlid se inangen dan, meneng kenà niyo eg-inangen se ipegtoladà niyo. Pengkey egtoladà kaw te medaet se egpenakaw, meneng gayed kaw egpenakaw.

²²Pengkey eg-ikagi kaw te eked kepakay aw meglakad, meneng eglakad kaw. Pengkey eglindò kaw te inotaw, meneng egpenakaw kaw kidoen te simbahan sinolan te inotaw.

²³Pengkey mikagi kaw te mèpiya se punù ingkeliwat i Moises, meneng eglindò kaw te Timanem pineokit te peglàpang niyo te punù din sìyan.

²⁴Doen kagi te Timanem insolat te egtompuyus se otaw kenà Judiyo te Timanem tandà te medaet inang niyo menge Judiyo.

²⁵Sikiyo menge Judiyo, aw tomolò kaw te punù ingkeliwat i Moises, benal doen ontong te pegpetolì niyo. Meneng aw lomàpang kaw te punù ingkeliwat i Moises, wedad ontong niyo pengkey tinolì kaw, so neinang kaw iling te otaw wedà tolii kenà egtolò te punù ingkeliwat i Moises.

²⁶Meneng aw doen otaw kenà Judiyo wedà pa tolii gayed egtolò te ibeg te Timanem iling te punù din ingkeliwat i Moises, yan se otaw sekopen te Timanem iling te tinolì sikandin.

²⁷Pengkey Judiyo kaw, meneng aw eglàpang kaw te punù ingkeliwat i Moises, doen aldaw domateng aw mikagi se menge otaw kenà Judiyo te keilangan ipelumun kaw, so pengkey binegayan kaw te kagi te Timanem insolat, pengkey tinolì kaw heman, meneng kenà kaw egtolò. Meneng pengkey wedà keliwati se punù te Timanem diyà te menge otaw kenà Judiyo, aw wedad ketanem dan te egtolien, meneng doen otaw diyà kandan egtolò te ibeg te Timanem.

²⁸Kenà botong aw olò egtaking se menge Judiyo te ketanem te Judiyo, so keilangan melobos se pedowan dan tomaking te Timanem. Kenà heman botong aw olò tolien se menge Judiyo, so keilangan todaen dan heman se ibeg te pedowan dan pineokit te Espiritu Santo, amon tomolò dan te punù ingkeliwat i Moises. Pengkey eked duyuni te doma otaw se Judiyo netodà se pedowan, meneng Timanem se domuyun kandin.