1Irec ŋic go wemocko fuŋnege murârâŋnecmu? Ŋic gâcnezi bahac bâfuapie mana sâqore‐jarehuc gahacne fuŋne bataniŋkeekic hâcne. Mana sâqore‐jareekomec, go ijaha hâcne eekomec i!
2Eme Anutuzi ŋic iŋuc eeŋgopieŋ jaŋe okacne bazu‐jareme sâcke‐hâmoekac iŋuc manaŋgopeneŋ.
3Ŋic go gâcne jaŋere dâŋbahac muhuc ijaha eekic, ehuc “no Anutuzi akicnuocmu” iŋuc mu wiac moc ezic ine!
4Me Wofuŋzi buuruc â wama ruaine sâc fekicne egarehuc akicguhuc jume go wemocte manatac qatakic ehuc juekic? Go maŋge bârisiecmurâ Anutuzi buuruc egareekac i mi mana taraekic me?
5Go maŋsanaŋ erâ maŋge mi bârisiehuc ʒocfiki bafeku seroŋ batec ʒoc ʒaza dameŋko Anuture mumutara dâŋ fârine fua taniŋkeme ʒâhâmocguocmu.
6Anutuzi ŋic eebapa‐nâŋecte sâc furine nârezokac hâcne.
7Ŋic eehâmo gie paŋʒâic bahuc eri tatamac â juju saric bâfuaniŋte samarieniŋmu jaŋe juju sanaŋ jarezokac.
8Ŋic râŋgeŋne dâŋ fâri qizecne bâsuehuc wiac hehesicne bajuniŋmu jaŋerao ine wiac ʒâʒâicne â mimicne bâfuaocmu.
9Sâqocne bapa sasawa, Judaŋic hâcne â Grikŋic mâmâc, jaŋe ʒâic serereŋ â hâhâwic sâko fua‐jareocmu.
10Tiŋne juniŋmu sasawa, Judaŋic hâcne â Grikŋic mâmâc, jaŋe eri tatamac â wama fua‐jareocmu.
11Anutu e ra rowec ware rowec mi focnekac.
12Ŋic sâcmutâc dâŋ tâmiric juhuc sâqocne baeŋgopieŋ jaŋe sasawa sâcmutâc dâŋ tâmiric jaha sipirickeniŋmu. Â sâcmutâc dâŋhec juhuc sâqocne baeŋgopieŋ jaŋe sasawa Anutuzi sâcmutâc dâŋte sâcko dâŋjeŋic mutara‐jareocmu.
13Sâcmutâc dâŋ mâc hazeczi mananiŋmu jaŋe Anutuzi honec‐jopame tiŋne mi eŋgopieŋ, manarâ reŋkeeŋgopieŋ jaŋe ine tiŋne mujareocmu.
14Ŋic qâpuc sâcmutâc dâŋ mi mufua‐jarekicne jaŋe maŋjeŋicte sâcmutâc dâŋ reŋkehuc ine sâcmutâc dâŋ tâmiriczi sâcmutâc dâŋhec tinac eeŋgopieŋ.
15Iŋuc epie sâcmutâc dâŋ i maŋjeŋicko qâreŋkekicne, irec fuŋne jaŋgeŋkeekac. Sâcmutâc dâŋ maŋjeŋicko qâreŋkekicnere maŋjeŋiczi tutuc qajareekac, erâ wâc maŋ mamanasu‐jeŋiczi foc forisic ehuc ŋifec mu qatarac eekac â ŋifec mu bâmiriŋ eekac.
16I dameŋ sâkore iŋuc eekac. Ira Anutuzi Jesu Kristo ecneme maŋnâŋecko wiac soŋsoŋ fokac irec fuŋne bataniŋkeocmu. No Biŋebiaŋ muekopac irec sâcko bataniŋkeocmu hâcne.
17Go ʒâŋege Judaŋic muhuc sâcmutâc dâŋzi roŋgâŋ egareme herâ foekic. Erâ no Anuture fuŋne manakopac muhuc sahac fefe juekic.
18Go Anuture micdâŋ manaekic, erâ sâcmutâc dâŋ qazu‐garekicnere keci ezo, keci mi ezo i mana wosâeekic.
19Ehuc gahacnere ʒiŋuc muekic: “No tiŋtuŋ sâcne jowa qataŋ ejarepemu, â dapâcko juŋgopieŋ jaŋe sâcne batamae‐jarepemu,
20â ŋic maŋpuriŋhec jaŋe sâcne jaza bâtiŋ ejarepemu, â ɋiemaŋ jaŋe wiac sâcne qazu‐jarepemu. No sâcmutâc dâŋhecte mamana â dâŋfâri irec wamboŋne rauckerâ jukopac i.”
21Go iŋuc muekiczi ŋic gâcne miti qazu‐jarehuc gahacne maŋ mi qazucneekic. Go ŋic fiuc mi ronʒepieŋ jazahuc gahac fiuc roekic.
22Ŋowe ŋonâŋ ŋohe bebehec mi ezepirec jazahuc gahac ŋonâŋge beheekic. Go nemuɋâŋ sureekiczi nemu ufuŋte wiac fiuc roekic.
23Go sâcmutâc dâŋte manasuhuc maŋfefe eekiczi sâcmutâc dâŋ qâsuahuc Anutu gâc hecneekic.
24Irec hâcne kecʒiŋuc qâreŋkekicne: “Qâpuc jaŋe ŋoŋere kiŋte erâ Anuture ʒâŋe musoriŋkeeŋgopieŋ.”
25Go sahacgao Anuture ma bakicne i sâcmutâc dâŋ reŋketec fârinehec eocmu. Me sâcmutâc dâŋ qataratec sahacgao ma izi fârimâc eocmu.
26Erâ dâŋ irec ŋifecne qac qârisic fokac wâc. Ŋic moc ma tâmiriczi sâcmutâc dâŋ reŋkeocmuo mahec tinac eocmu.
27Ehuc ma tâmiric fuarâ juekaczi sâcmutâc dâŋte gie baocmu eki ine fuŋnege rituocmu, miti papia â mahec juhuc sâcmutâc dâŋ qâsuaekic gore fuŋne hâcne rituocmu.
28Moc e mâc sahaczi Judaŋic hawari eocmu â sahacko sawa mahec juocmu, iŋucnezi Judaŋic fârine mi eocmu.
29Maŋzi Judaŋic izi fârine. Â sahacko sâcmutâc dâŋte ma rojuju i mâcne, maŋko Mârore ma rojuju izi fârine. Ŋic iŋucnere ŋiczi mâcne, Anutuzi maname biaŋkeocmu.
