ROMA 11:3-34

³Lohiabada e, emu peroveta taudia vada e aladia mase, emu pata helaḡadia vada e ḡiḡi rohoroho; lau mo sibogu name noho, bona lau danu e tahugumu, bae alagu mase e tomu.

⁴A Dirava ese ede e haere henia toma? Ia eto, Lauegu taunimanima na daha hitu, Baal asie toma henia dihomu.

⁵Benaini, harihari danu taunimanima kwabu-kwabudia mo nonoho, harihari-bada ese vada e abidia hidi.

⁶A bema harihari-bada ese vada e abidia hidi, kara na herevana, bema lasi, harihari-bada bema asi anina.

⁷Bena edeheto? Israel ese e tahua ḡauna na do asie davaria; a abi-hidi taudia ese vada e davaria. Oredia be lalodia e ha-auka,

⁸Buka Helaḡa ai e torea heḡereḡerena eto, Dirava ese lalodia e hamahuta: mai matadia, to asie ita; mai taiadia, to asie kamonai, ema bona harihari.

⁹Bona David eto, Edia pata na idoa bona rikiriki, Hekwakwanai ḡauna bona ahudia.

¹⁰Matadia ba hakapu, bena basie ita: Dorudia ba halaoho hanaihanai.

¹¹Ma na tomamu: idia na e hekwakwanai bena vada e keto vaitani a? Lasi vaitani. A edia keto dainai bese idau-idau ese mauri vada e davaria; bena edia vaḡeḡe vada e vara.

¹²Ḡau tamona, idia edia keto dainai tanobada bema taḡa, bona idia edia dabu dainai bese idau-idau bema boga kunu, o edia honuhonu-dae amo dahaka namona bema vara?

¹³Idau bese taumui, na hereva henimuimu: badina be lau na aposetolo taugu bese idau-idau emui ai; egu dagi danu na heaḡilaiamu.

¹⁴Unu amo, readia, vaḡeḡe baina havaraia varavaragu lalodia ai; bena haida ese mauri bae davaria.

¹⁵Badina be inegedia ese herohemaino bema havaraia tanobada ai, iabi-loudia ese dahaka bema havaraia? Mase amo mauri baine vara.

¹⁶Mane roboana bema helaḡa, taba idoinai bema helaḡa; bona ramu bema helaga, rigi danu bema helaḡa.

¹⁷A rigi haida bema dabai kwaidu, bena oi, vara-kava olivena, gabudia ai bema hirimu kau, olive ramuna bona todena amo goada boma abia.

¹⁸Matona, rigi korikori bogaragidiai basio heaḡi. Ba laloa, dia oi daimu ai ramu se maurimu, a ramu dainai oi o maurimu.

¹⁹Readia baoto “Rigi e dabai kwaidu lau bae hirigu kau helaoreana”.

²⁰Benaini, asi edia abidadama dainai e dabai kwaidu, a oi hari emu abidadama dainai o ginimu. Asio hekokoroku: ba gari.

²¹Badina be Dirava ese rigi korikori se bogadia hisi, bona oi danu basine bogamu hisi.

²²Dirava ena hebogahisi bona ena lalo-auka ba haero: e keto taudia ediai lalona e aukamu; a oi na e bogamu hisi, ena hebogahisi o badinaiamu negana ai. A basio badinaia, ia na baine utumu oho.

²³A idia be edia hedadarai bae rakatania, bae hehiri kau lou; badina be Dirava na mai siahuna baine hiridia kau lou.

²⁴Benaini, oi na vara-kava olivena ena amo e utumu oho, uma olivena enai e hirimu kau, idia be rigi korikori, edia olive korikorina ai basie hiri kau a? Vada bae hiri kau.

²⁵Varavaragu e, lau na uramu ina hereva hehunina ba diba, sibomui emui aonega ba heaḡilaia na garina. Israel taudia haida lalodia do bae duhu, ela bona bese idau-idau taudia bae didi vareai guna.

²⁶Bena Israel taudia iboudiai do bae mauri; buka ai e torea heḡereḡerena, eto, Siona ena hahemauri tauna ta baine vara; Ia ese Dirava idadaraina karadia Iakob ena amo baine atodia tabe;

²⁷Egu gwauhamata binai, edia; Edia dika baina abi oho negana ai.

²⁸Umui daimui ai idia ese sivarai namo e inai heniamu; a Dirava ese senedia e abidia hidi dainai e ura henidiamu.

²⁹Badina be Dirava ena harihari-bada bona ena abi-hidi na se idaumu.

³⁰Gunaguna umui ese Dirava o gwau edeede heniava; harihari hebogahisi vada o davaria, idia edia gwau-edeede dainai.

³¹Unuhetomana, idia na harihari e gwau edeedemu, a hebogahisi do bae davaria, umui emui hebogahisi dainai.

³²Badina be Dirava ese ita iboudai gwau-edeede ai vada e kouda ahu, baine bogada hisi helaoreana.

³³Dirava ena aonega bona ena lalo-arara na daka dobu! Ena hahemaoro na daika ese baine tahua diba? Ena dala na daika ese baine davaria diba?

³⁴Daika na Lohiabada lalona dibana? Daika ese ena kara baine herevalai henia?