WALOMA 11:3-34

³“Mndewa, wawakoma wahokozi zako na kuvibomola vilingo vako va kulavila nhosa. Ila nie niiyeka nisigale, na hewo wouzahila ugima wangu.”

⁴Ila Mulungu kamwidika vilihi? “Nikiikila mwenyego wanhu alufu saba walekile kumfugamila mavindi Baali, mulungu wa uvwizi.”

⁵Vivija mkipigiti kino hana wanhu wadodo wasaguligwe kubitila ngekewa ya Mulungu.

⁶Usaguzi wake utamanila ngekewa yake, na siyo kija kiwasang'hane. Kwavija kamba usaguzi wa Mulungu uhatamanile kija kiwasang'hane wanhu, avo ngekewa yake sambiiwe ngekewa ya kweli.

⁷Avo, Waislaeli walemelwa kukipata kija kiwakalile wokizahila? Waja wasaguligwe wakipata, ila wasigale wakala na mioyo midala.

⁸Kamba viyandikigwe Mzinyandiko Zing'alile, “Mulungu kawagwelela moyo wa ubozi, giladi meso gao sambigadahe kulola na magwiti gao sambigadahe kuhulika, mbaka zua dino.”

⁹Na Daudi kolonga, “Sona zao zigaluke tanzi na mtego, lwingila na msuno ulingile na gaja gawatendile!

¹⁰Meso gao gageligwe ziza giladi sambiwadahe kulola, na migongo yao iveduke milongo yose!”

¹¹Avo nowauza, Wayahudi waikwala na kugwa hasi? Si vivo! Ila sama ya vilozo viwatendile, ukombola uchola ha Wamhazi, avo kuwatenda Waislaeli wone migongo.

¹²Vilozo va Wayahudi vigala ugoli muulumwengu, na ukumbulu wao wa muloho ugala ugoli ha Wamhazi. Avo, Wayahudi wahaibokela nhunza ya ukombola wa Mulungu, wogala ugoli mkulu ng'hani muulumwengu!

¹³Nowalongela mweye Wamhazi, kwavija nie na mtumigwa wa Kilisto ha Wamhazi, noiyenzi sang'hano yangu

¹⁴giladi niwatende wanhu wa isi yangu mwenyego wone migongo, na niwakombole wayagwe mmwanza wao.

¹⁵Ihawa kulemigwa kumwao kutenda ulumwengu uilumbe na Mulungu, avo yowaze aho vondawatogoligwe? Yowa ugima ha awo wadanganhike.

¹⁶Kamba kidanga cha ichanduso cha mkate kilavigwe ha Mulungu king'ala, avo mkate wose usigale ung'ala. Na kamba mizizi ing'ala, na gamatambi gang'ala.

¹⁷Ila kamba matambi gayagwe ga mzaituni gakanhigwa, na mweye, muli matambi ga mzaituni muhulo, muombekigwe hanhu hagakalile matambi gaja gakanhigwe na sambi moja ugoli wa mzizi wa mzaituni,

¹⁸avo sambimgazabuze matambi ago gakalile gakanhigwe. Kamba muhagazabuza, mgelegeze kamba siyo mweye muugogile umzizi, ila umzizi uwo uwagogile mweye.

¹⁹Gweye kolonga, “Matambi gakanhigwa giladi nie niombekigwe.”

²⁰Ona, vivo ili! Ila wakanhigwa sama ya kuleka kutogola kumwao, ila gweye kwima kubitila nhamanila. Avo sambiuitope, ila udumbe.

²¹Kwavija kamba Mulungu hagalekile matambi gali si ga kuombeka, siku na gweye hakuleka.

²²Avo, mgelegeze unovu na ukali wa Mulungu. Ukali wa Mulungu mwa awo watendile vilozo, ila unovu wa Mulungu kumwenu ulavigwa ihawa mogendelela kukala muunovu wake. Ila kamba si hivo, vivija na mweye mokanhigwa.

²³Na hata Wayahudi, kamba wahagaluka na kutogola, woombekigwa, kwavija Mulungu kana udaho wa kuwaombeka kabili.

²⁴Kwavija kamba mkanhigwa kulawa mumzaituni muhulo, na muombekigwa mumzaituni kae uli na simbuko diyagwe, vobuha ng'hani matambi gano ga mzaituni kae kuombekigwa kabili kumzaituni kugakalile.

²⁵Ndugu zangu, nolonda muitange nyong'onyo ino giladi sambimgelegeze kamba muna nzewele ng'hani kubanza vimuli. Udala wa mioyo ya wanhu Waislaeli haugendelela, ila womalila haja mheta yose ya Wamhazi vondaize ha Mulungu.

²⁶Avo Waislaeli wose wokomboligwa, kamba viyandikigwe Mzinyandiko Zing'alile, “Mkombola kokwiza kulawa Sayuni, na kuusegeza Umhazi kulawa mulukolo lwa Yakobo.

²⁷Na dino dijo lagano jangu dondaniilagane nawo, kipigiti vondaniwasegezele vilozo vao.”

²⁸Kwavija waulema Usenga Unogile, Wayahudi wawa wadumuka wa Mulungu sama yenu mweye Wamhazi. Ila kwavija Mulungu kawasagula Wayahudi, wawa mbwiga zake sama ya wahenga zao.

²⁹Kwavija nhunza ya Mulungu na lukemo lwake havigaluka.

³⁰Umwaka, mweye Wamhazi mkala mumdulukile Mulungu, ila sambi m'bokela bazi jake sama ya udulu wa Wayahudi.

³¹Avo na hewo Wayahudi sambi womdulukila Mulungu, giladi kubitila bazi da Mulungu dim'bokele mweye Wamhazi, na hewo Wayahudi vivija wadibokele.

³²Kwavija Mulungu kawafunga wanhu wose mkifungo cha udulu, giladi yawonele bazi wanhu wose.

³³Lola Mulungu viyali na bwando da ugoli, ng'hungwe na ilimu! Yalihi yodaha kupeta ulamuzi wake? Na yalihi yodaha kuzitanga nzila zake?

³⁴Kamba Nyandiko Zing'alile vuzilonga, “Kwavija yalihi yozitanga ngelegeza za Mndewa? Ama yalihi yondayawe mulangulizi wake?