ᤖᤥᤔᤡ 11:3-34

³“ᤀᤠᤍᤠᤱᤒᤣ. ᤂᤧᤱᤜᤠ᤹ᤖᤧᤃ ᤁᤧᤒᤠᤱᤄᤢᤛᤡᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤁᤧᤖᤧᤰ ᤔᤧᤛᤧᤖᤢᤛᤡ. ᤜᤧᤰᤁᤩᤠᤱ ᤁᤧᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤜᤠ᤹ ᤔᤧᤕᤴᤇᤢᤀᤠᤱ ᤘᤠ᤹ᤖᤥ॥ ᤀᤡᤱᤃᤠ᤹ᤖᤰ ᤏᤖᤠᤱᤅᤠᤱ ᤘᤠ᤹ᤀᤠ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤛᤧᤵᤔᤠ ᤔᤧᤃᤥ᤺ᤳᤋᤠᤖ ᤔᤧᤘᤠ᤹ᤖᤥ॥”

⁴ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤰᤂᤣᤗ᤹ᤖᤡᤰ ᤏᤥᤃᤵ ᤐᤡᤖᤢᤒᤣ᥅ “ᤀᤡᤱᤃᤠ᤹ᤃ ᤒᤠᤗ ᤛᤠᤶᤔᤠᤱᤅᤡᤴ ᤔᤠᤱᤔᤧᤱᤄ᤺ᤔᤏᤠᤒᤠ ᤜᤧᤴᤇᤡᤱ ᤏᤢᤛᤡ (᥍᥆᥆᥆) ᤀᤠᤔᤏᤠᤜᤠ᤹ ᤋᤠᤱᤄᤢᤱᤛᤡᤱᤅᤠᤱ ᤘᤠ᤹ᤀᤠᤖᤥ॥”

⁵ᤜᤧᤰᤁᤣᤗ᤹ᤖᤡᤰᤁᤣ. ᤁᤴ ᤕᤧᤶᤔᤥᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤔᤠ᤹ ᤋᤢᤰᤔᤠᤸᤗᤧ ᤛᤣᤃᤢᤛᤡᤒᤠ ᤁᤢᤗᤰᤌᤡᤰ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠᤜᤠ᤹ ᤔᤧᤘᤠ᤹ᤖᤥ॥

⁶ᤜᤧᤰᤁᤩᤠᤱ ᤁᤱᤃ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤗᤠᤶ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤔᤠ᤹ ᤋᤢᤰᤔᤠᤗᤠᤶ ᤐᤥ᤺ᤰᤂᤧᤒᤠᤖᤥ॥ ᤂᤢᤏᤡ᤹ ᤕᤠ᤺ᤶᤒᤰᤗᤠᤶ ᤐᤥ᤺ᤰᤂᤧᤒᤠᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤔᤠ᤹ ᤋᤢᤰᤔᤠᤴ ᤌᤣᤏᤠᤎᤣ ᤐᤥ᤺ᤰᤂᤧᤒᤠᤖᤥ॥

⁷ᤂᤧᤴ ᤑᤠ᤹ᤀᤡᤱᤃ ᤌᤧᤔᤠᤒᤣ᥅ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤏᤡᤱᤘᤠ᤹ ᤔᤧᤒᤡᤖᤢᤀᤠᤱ ᤔᤧᤃᤥ᤺ᤳᤋᤢᤒᤠᤴ ᤔᤧᤱᤄᤥ᤺ᤛᤢᤴᤗᤥ. ᤁᤖ ᤁᤢᤓᤠ ᤔᤧᤛᤣᤃᤧᤒᤠᤜᤠ᤹ᤖᤧᤏᤧ ᤔᤧᤄᤥ᤺ᤛᤢᤖᤥ॥ ᤘᤣ᤹ᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤡ᤹ ᤏᤡᤱᤘᤠ᤹ ᤁᤧᤎᤢᤱᤒᤠ ᤆᤥᤃᤢ ᤐᤡᤖᤢᤛᤡᤖᤥ॥

⁸ᤛᤠᤶᤕᤥᤛᤠᤵᤗᤠ᤺ᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤐᤳ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤁᤢᤎᤏᤠ ᤁᤧᤗᤧᤱᤒᤠ ᤆᤥᤃᤢᤛᤡᤀᤠᤱ ᤘᤠ᤹. ᤜᤧᤰᤁᤩᤠᤱ ᤁᤴ ᤕᤧᤶᤎᤠᤖᤡᤰ ᤂᤧᤱᤜᤠ᤹ᤖᤧ ᤏᤡ᤺ᤔᤠ ᤔᤧᤴᤇᤢᤰᤋᤢᤴᤗ ᤑᤠ᤹ᤀᤠᤱ ᤂᤢᤏᤡ᤹ ᤔᤡᤰᤜᤠ᤹ ᤌᤣ᤺ᤰᤋᤢᤒᤡᤖᤢᤛᤡᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤶᤔᤠ ᤔᤧᤴᤇᤢᤰᤋᤢᤴᤗ ᤑᤠ᤹ᤀᤠᤱ ᤂᤢᤏᤡ᤹ ᤏᤧᤰᤂᤥ᤹ᤒᤠᤴ ᤜᤢ᤹ᤖᤢᤒᤡᤛᤡᤀᤠᤱ ᤘᤠ᤹ᤖᤥ॥”

⁹ᤍᤠᤀᤢᤍ ᤜᤠᤱᤅᤡᤸᤗᤧ ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤐᤠ᤺ᤳᤋᤢᤀᤠᤱ ᤐᤳ. “ᤜᤠᤖᤠ᤹ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤂᤢᤏᤡ᤹ ᤛᤠᤓᤠᤱᤈᤠ᤺ᤸᤗᤧ ᤀᤡᤈᤥᤀᤥ ᤌᤠ᤺ᤛᤢᤛᤡᤖ. ᤂᤢᤏᤡ᤹ ᤛᤠᤓᤠᤱᤈᤠ᤺ᤴ ᤀᤠᤄᤄᤒᤠ ᤐᤠ᤺ᤴ ᤏᤢ ᤂᤢᤶᤍᤡᤱ ᤁᤧᤍᤠ᤺ᤵᤐᤠ ᤐᤠ᤺ᤴ ᤐᤥ᤺ᤱᤗᤖᤥ॥

¹⁰ᤂᤧᤱᤜᤠ᤹ᤖᤧ ᤏᤡ᤺ᤔᤠ ᤔᤧᤴᤇᤢᤰᤋᤢᤴᤗ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤡᤰᤁᤡᤴ ᤂᤠᤍᤠᤵᤋᤢᤖ. ᤜᤧᤰᤁᤩᤠᤱ ᤂᤢᤏᤡ᤹ ᤀᤣ᤺ᤰᤁᤡᤴ ᤛᤍᤠᤍᤡᤱ ᤀᤡᤏᤥᤃᤧᤴ ᤋᤢᤰᤂᤣ᤺ᤸᤗᤧ ᤋᤢ᤺ᤱᤗᤖᤥ॥”

¹¹ᤜᤧᤰᤁᤣᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤐᤠ᤺ᤴᤎᤡᤰ ᤛᤣᤗᤠᤵᤏᤡᤱ. ᤀᤡᤛᤪᤠᤀᤡᤗᤡᤜᤠ᤹ ᤔᤧᤈᤥ᤺ᤴᤍᤧᤸᤗᤧ ᤐᤥ᤺ᤰᤔᤠᤀᤣ ᤔᤧᤴᤇᤢᤰᤔᤏᤠ ᤌᤠᤖᤡᤰ ᤔᤧᤈᤥ᤺ᤴᤍᤧᤒᤡ᥅ ᤛᤧᤰᤂᤠᤛᤠᤱ ᤔᤧ᤺ᤴᤗᤥ᥄ ᤁᤖ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤕᤥ᤺ᤸᤗᤧ ᤆᤥᤃᤢᤸᤗᤧ ᤂᤢᤏᤡ᤹ ᤏᤠᤜᤧᤶᤔᤠᤴ ᤋᤠᤖ ᤑᤠ᤹ᤀᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤥᤀᤣ ᤛᤧᤴᤗᤵᤐᤡᤴ ᤋᤩᤧᤖᤥ॥

¹²ᤁᤖ ᤕᤜᤢᤍᤡᤜᤠ᤹ᤖᤧ ᤗᤠᤕᤥ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤐᤕᤶ ᤕᤶᤒᤠ ᤔᤢ᤹ᤀᤡᤛᤠᤶ ᤋᤩᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤧᤴᤗᤵᤐᤡᤴ ᤔᤧᤏᤠ᤹ᤖᤢᤒᤠᤸᤗᤧ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤥ ᤐᤕᤶ ᤕᤶᤒᤠ ᤔᤢ᤹ᤀᤡᤛᤠᤶ ᤋᤩᤧᤏᤧ ᤑᤠ᤹ᤃᤪ ᤕᤜᤢᤍᤡᤜᤠ᤹ᤖᤧ ᤛᤧᤴᤗᤵᤐᤡᤴ ᤔᤧᤍᤠ᤺ᤰᤋᤢᤸᤗᤧ ᤀᤠᤸᤗᤛᤠᤱ ᤕᤖᤡᤰ ᤔᤢ᤹ᤀᤡᤛᤠᤶ ᤋᤠ᤺ᤀᤣᤖᤥ᥄

¹³ᤀᤡᤱᤃᤠ᤹ ᤛᤧᤰᤂᤠᤀᤣ ᤂᤡᤏᤡ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤁᤴ ᤐᤠ᤺ᤴᤏᤡᤴ ᤔᤧᤳᤏᤡᤱᤗ ᤐᤳᤋᤠᤖᤥ॥ ᤀᤡᤱᤃᤠ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤥ ᤛᤣ᤺ᤰᤕᤢᤰᤔᤡᤒᤠ ᤐᤥ᤺ᤰᤂᤠᤱᤒᤠᤸᤗᤧ ᤆᤥᤃᤢᤸᤗᤧ ᤁᤴ ᤔᤠᤱᤛᤣᤘᤠ ᤆᤥ᤺ᤰᤔᤠ ᤕᤠ᤺ᤶᤒᤰᤁᤥ ᤛᤧᤰᤂᤠᤀᤣ ᤀᤠᤛᤢᤰᤛᤢᤰ ᤋᤶᤛᤡᤴ ᤆᤥᤃᤢᤱᤗᤥ॥

¹⁴ᤜᤧᤰᤁᤣᤗ᤹ᤖᤡᤰ ᤁᤴ ᤀᤠᤔᤠᤱᤛᤣᤘᤠᤗᤠᤶ ᤀᤡᤱᤃᤠ᤹ ᤀᤠᤒᤠᤅᤣ ᤀᤠᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤠᤜᤧᤶᤔᤠᤴ ᤑᤥ᤺ᤰᤂᤢᤱᤅᤠᤱ ᤂᤧᤱᤜᤠ᤹ᤀᤥ ᤁᤢᤓᤠ ᤋᤠᤱᤛᤧ᤺ᤵᤔᤠ ᤛᤢᤰᤋᤢᤱᤛᤡᤱᤗ ᤁᤧᤗ᤹ᤒᤠ ᤏᤡᤱᤛᤠᤱ ᤆᤥᤃᤢᤱᤗᤥ॥

¹⁵ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤔᤧᤏᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤘᤣ᤹ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧᤴ ᤏᤠᤍᤱ ᤐᤥ᤺ᤱᤏᤧ ᤑᤠ᤹ᤃᤪ ᤕᤜᤢᤍᤡᤜᤠ᤹ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤔᤧᤈᤥᤃᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤶᤔᤥ ᤋᤧᤴᤍᤡᤱ ᤆᤥᤃᤢᤛᤡᤸᤗᤧ ᤂᤧᤱᤜᤠ᤹ᤖᤧ ᤛᤡ᤺ᤔᤧᤴᤗᤠᤶ ᤜᤡᤱᤔᤴ ᤔᤧᤄᤥ᤺ᤛᤢᤒᤠ ᤜᤧᤰᤁᤣᤀᤣ ᤐᤥ᤺ᤱᤗᤥ᥄

¹⁶ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤶᤔᤏᤠᤒᤠ ᤌᤡᤰᤛᤡᤃᤣ᤺ᤰᤐᤠ ᤗᤰᤁᤡᤴ ᤛᤣᤛᤣ ᤆᤥ᤺ᤰᤏᤧ ᤑᤠ᤹ᤃᤪ ᤁᤧᤏᤶᤒᤠ ᤁᤧᤖᤧᤰ ᤗᤰᤁᤡᤴᤏᤠᤱ ᤛᤣᤛᤣ ᤆᤥ᤺ᤰᤗᤥ॥ ᤛᤡᤱ ᤛᤠ᤺ᤵᤐᤡᤴ ᤛᤣᤛᤣ ᤆᤥ᤺ᤰᤏᤧ ᤑᤠ᤹ᤃᤪ ᤛᤡᤱᤒᤥᤖᤠ᤺ᤰᤜᤠ᤹ᤀᤠᤱ ᤛᤣᤛᤣ ᤔᤧᤒᤥ᤺ᤱᤗᤥ॥

¹⁷ᤁᤢᤓᤠ ᤕᤜᤢᤍᤡᤜᤠ᤹ᤃ ᤏᤢ᤺ᤒᤠ ᤈᤤᤋᤢᤏ ᤛᤡᤱᤒᤢᤱᤗᤠᤶ ᤔᤧᤈᤧᤵᤋᤢᤀᤠᤱ ᤗᤠᤵᤔᤧᤓᤢᤛᤢᤒᤠ ᤛᤡᤱᤒᤥᤖᤠ᤺ᤰ ᤁᤢᤀᤡᤛᤡ᤺ᤰ ᤔᤧᤈᤥ᤺ᤰ॥ ᤜᤧᤰᤁᤩᤠᤱ ᤂᤡᤏᤡ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤋᤠᤶᤓᤢᤱ ᤈᤤᤋᤢᤏ ᤛᤡᤱᤒᤥᤖᤠ᤺ᤰ ᤜᤧᤰᤁᤣ ᤁᤧᤈᤥᤃᤡᤛᤠᤱ ᤏᤢ᤺ᤒᤠ ᤈᤤᤋᤢᤏ ᤛᤡᤱᤒᤢᤱᤔᤥᤗᤠᤶ ᤌᤢᤶ ᤏᤢ ᤜᤡᤱᤔᤴ ᤂᤥ᤺ᤔᤠ ᤑᤠ᤹ᤀᤠᤱ ᤂᤢᤏᤡ᤹ ᤗᤧᤰᤘᤠ ᤂᤡᤏᤡ᤹ ᤁᤧᤈᤰᤁᤠᤛᤡᤀᤠᤱ ᤁᤧᤘᤕᤡ᤹ᤖᤥ॥

¹⁸ᤂᤧᤴ ᤔᤧᤈᤧᤵᤋᤢᤀᤠᤱ ᤗᤠᤵᤔᤧᤓᤢᤛᤢᤒᤠ ᤛᤡᤱᤒᤥᤖᤠ᤺ᤰᤜᤠ᤹ᤏᤢ᤺ᤸᤗᤧ ᤀᤠᤏᤡᤃᤧ ᤏᤢ᤺ᤒᤠ ᤆᤥᤃᤡᤃᤧ ᤑᤠ᤹ᤀᤠᤱ ᤀᤠᤱᤍᤡᤱ ᤔᤧᤗ᤹ᤖᤧᤶᤔᤡᤶᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤁᤢᤛᤠ᤺ᤵᤐᤡᤴ ᤁᤧᤴᤎᤖᤢᤶᤔᤡᤴ. ᤁᤖ ᤁᤢᤛᤠ᤺ᤵᤐᤡᤸᤗᤧᤏᤧ ᤂᤡᤏᤡ᤹ ᤁᤧᤎᤖᤡᤀᤠᤱ ᤘᤠ᤹ ᤁᤧᤗ᤹ᤒᤠᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥

¹⁹ᤁᤖ. ᤀᤠᤏᤡᤃᤧ ᤂᤧᤴ ᤛᤡᤱᤒᤢᤱᤔᤥ ᤆᤰᤛᤡᤱᤔᤠ ᤑᤠ᤹ᤀᤠᤱ ᤂᤧᤴ ᤛᤡᤱᤒᤥᤖᤠ᤺ᤰᤜᤠ᤹ ᤔᤧᤈᤧᤵᤋᤢᤀᤠᤱ ᤗᤠᤵᤔᤧᤓᤢᤛᤧᤖᤥ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤒᤡᤗᤠ॥

²⁰ᤛᤧᤰᤂᤠᤀᤣᤖᤥ. ᤁᤖ ᤕᤜᤢᤍᤡᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤔᤧᤴᤈᤥᤃᤢᤴᤏᤠᤱᤅᤣ ᤛᤡᤱᤒᤥᤖᤠ᤺ᤰᤁᤡᤴ ᤆᤧᤵᤔᤠᤀᤠᤱ ᤗᤠᤵᤑᤢᤔᤏᤠᤒᤠ ᤁᤢᤀᤡᤛᤡ᤺ᤰ ᤗᤠᤵᤔᤧᤓᤢᤛᤧᤒᤠᤖᤥ॥ ᤂᤡᤏᤡ᤹ ᤏᤛᤠ᤺ᤴ ᤁᤧᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤂᤧᤵᤔᤥ ᤁᤧᤘᤕᤡ᤹ᤖᤥ॥ ᤜᤧᤰᤁᤣ᤺ᤸᤗᤧ ᤀᤠᤱᤍᤡᤱ ᤔᤧᤗ᤹ᤖᤧᤶᤔᤡᤴᤏᤧ᤹ᤀᤥ. ᤁᤖ ᤂᤧᤴ ᤐᤥ᤺ᤰᤂᤧᤒᤠ ᤐᤠ᤺ᤴᤜᤠ᤹ ᤀᤡ᤺ᤳᤋᤧᤶᤔᤧ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤡᤖᤧᤶᤔᤧ᤹ᤀᤥ॥

²¹ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤧᤰᤂᤠᤒᤠ ᤐᤥᤖᤠ᤺ᤰᤜᤠ᤹ᤀᤣ ᤔᤧᤍᤠᤱᤄᤢᤴᤇᤡᤴᤏᤡᤸᤗᤧ ᤂᤡᤏᤡ᤹ᤀᤠᤱ ᤁᤧᤴᤍᤠᤱᤄᤡᤴᤗᤥ॥

²²ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤗᤢᤱᤔᤠ᤹ ᤋᤢᤰᤔᤠᤸᤗᤧ ᤁᤢᤎᤡᤶ ᤏᤢ ᤁᤧᤈᤡ᤺ᤵᤐᤠ ᤆᤥ᤺ᤰ ᤑᤠ᤹ᤀᤠᤱ ᤏᤢ᤺ᤖᤡᤰᤁᤠᤱ ᤏᤡᤱᤘᤠ᤹ ᤐᤡᤖᤧᤶᤔᤧ᤹ᤀᤥ॥ ᤏᤛᤠ᤺ᤴ ᤁᤧᤗᤧᤵᤐᤠᤜᤠ᤹ ᤁᤧᤖᤧᤰ ᤂᤢᤏᤧ᤹ ᤁᤧᤛᤠᤰᤐᤠ ᤂᤢᤶᤍᤡᤱ ᤐᤡᤖᤢᤛᤡ᤹. ᤁᤖ ᤂᤡᤏᤡ᤹ ᤁᤢᤗᤢᤱᤃᤢᤶᤔᤥ ᤆᤰᤔᤧᤸᤗ᤹ᤀᤣ ᤁᤧᤘᤕᤡ᤹ᤏᤧ ᤑᤠ᤹ᤃᤪ ᤗᤢᤱᤔᤠ᤹ ᤁᤧᤍᤢᤰᤋᤡ᤹ᤖᤥ॥ ᤔᤧ᤺ᤴᤏᤧ ᤑᤠ᤹ᤃᤪ ᤂᤡᤏᤡ᤹ᤀᤠᤱ ᤁᤧᤈᤧᤵᤋᤡᤀᤠᤱ ᤗᤠᤵᤁᤧᤓᤢᤛᤡ᤹ᤖᤥ॥

²³ᤜᤧᤰᤁᤣᤗ᤹ᤖᤡᤰᤁᤣ ᤕᤜᤢᤍᤡᤜᤠ᤹ᤖᤧ ᤏᤛᤠ᤺ᤴ ᤔᤧᤈᤥᤃᤢᤀᤠᤱ ᤔᤧᤏᤢ᤺ᤱᤏᤧ ᤑᤠ᤹ᤃᤪ ᤂᤢᤏᤧ᤹ ᤕᤠᤶᤔᤥ ᤂᤧᤱᤜᤠ᤹ ᤛᤡᤱᤒᤢᤱᤔᤥ ᤆᤰᤋᤢᤛᤡ᤹ᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤕᤠᤶᤔᤥ ᤋᤃᤡ ᤔᤧᤒᤳᤇᤧᤒᤠ ᤋᤧᤴᤏᤥ ᤆᤰᤔᤠ ᤔᤢᤰᤛᤠᤶ ᤁᤳᤋᤢ᤹ᤖᤥ॥

²⁴ᤂᤡᤏᤡ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤃ ᤋᤠᤶᤓᤢᤱ ᤈᤤᤋᤢᤏ ᤐᤥᤖᤠ᤺ᤰ ᤜᤧᤰᤋᤱᤒᤠ ᤁᤧᤈᤥᤃᤡ᤹. ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤏᤢ᤺ᤒᤠ ᤈᤤᤋᤢᤏ ᤒᤢᤱᤔᤥ ᤁᤧᤈᤰᤁᤠᤛᤡᤏᤧ ᤑᤠ᤹ᤃᤪ ᤂᤢᤏᤧ᤹ ᤀᤠᤒᤠᤅᤣ ᤁᤢᤈᤧᤰ ᤁᤢᤒᤥᤖᤠ᤺ᤰᤜᤠ᤹ ᤀᤠᤒᤠᤅᤣ ᤁᤢᤒᤢᤱᤔᤥᤀᤣ ᤆᤰᤋᤢᤛᤡᤸᤗᤧ ᤀᤠᤰᤂᤩᤠᤰ ᤁᤢᤛᤡᤰ ᤛᤶᤗ ᤆᤰᤋᤢᤛᤡᤒᤡᤗᤠ॥

²⁵ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤀᤠᤱᤍᤡᤱ ᤁᤧᤴᤗ᤹ᤖᤡᤴᤗ ᤑᤠ᤹ᤀᤠᤱ ᤁᤴ ᤛᤡᤒᤡ᤹ᤃᤧᤴ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ ᤁᤧᤗ᤹ᤒᤠ ᤀᤠᤏᤡᤱᤘᤠ᤹ ᤘᤠ᤹ᤖᤥ॥ ᤁᤴ ᤛᤡᤒᤡ᤹ᤃᤧᤴ ᤐᤠ᤺ᤴᤏᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤛᤣ᤺ᤰ ᤁᤢᤀᤡᤛᤡ᤺ᤰ ᤏᤛᤠ᤺ᤴ ᤆᤥ᤺ᤰᤔᤠ ᤁᤧᤒᤥ᤺ᤱᤒᤠ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤏᤛᤠ᤺ᤴ ᤆᤥ᤺ᤰᤔᤠ ᤔᤧᤴᤇᤢ᤺ᤳᤋᤣ ᤌᤠᤖᤡᤰ ᤕᤖᤡᤰ ᤕᤜᤢᤍᤡᤜᤠ᤹ ᤂᤢᤏᤡ᤹ ᤏᤡᤱᤘᤠ᤹ ᤔᤧᤴᤏᤢ᤺ᤱᤔᤏᤠᤒᤠ ᤔᤧᤒᤥ᤺ᤱᤗᤥ॥

²⁶ᤜᤧᤰᤁᤩᤠᤱ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤋᤠᤱᤔᤧᤛᤧ᤺ᤵᤗᤥ॥ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣ ᤛᤠᤵᤋᤧᤀᤠᤱ ᤐᤳ. “ᤛᤧᤴᤗᤵᤍᤠᤱᤒᤠᤴ ᤕᤖᤢᤛᤗᤧᤔᤗᤠᤶ ᤋᤠ᤺ᤖᤥ. ᤂᤢᤏᤧ᤹ᤀᤣ ᤀᤡᤛᤪᤠᤀᤡᤗᤡᤜᤠ᤹ ᤗᤠᤕᤥᤗᤠᤶ ᤏᤢ᤺ᤰᤋᤢᤛᤡ᤹॥

²⁷ᤜᤧᤰᤁᤩᤠᤱ. ᤀᤡᤱᤃᤠ᤹ ᤂᤢᤏᤡ᤹ ᤗᤠᤕᤥᤜᤠ᤹ ᤗᤧᤵᤔᤡ ᤐᤡᤖᤢᤱᤛᤡᤱ ᤑᤠ᤹ᤀᤠᤱ ᤂᤧᤱᤜᤠ᤹ᤏᤢ ᤆᤥᤃᤢᤱᤒᤠ ᤀᤠᤔᤠᤱᤜᤢᤵᤐᤡᤴ ᤁᤧᤳᤋᤢᤱᤗᤥ” ᤗ᤹ᤖᤡᤰ ᤕᤠᤶᤔᤥ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳᤗᤥ॥

²⁸ᤕᤜᤢᤍᤡᤜᤠ᤹ ᤛᤢᤏᤠᤀᤡᤱᤅᤡᤸᤗᤧ ᤁᤢᤏᤡᤱᤔᤡᤛᤡᤖᤥ. ᤁᤖ ᤂᤡᤏᤡ᤹ ᤗᤠᤃᤡᤃ ᤁᤴ ᤏᤢ᤺ᤒᤠᤀᤣ ᤐᤥ᤺ᤰᤂᤧᤖᤥ॥ ᤜᤧᤰᤁᤣᤛᤠᤱ ᤀᤒᤪᤠᤜᤠᤔ. ᤀᤡᤛᤜᤠᤁ. ᤕᤠᤁᤢᤒᤧᤴᤏᤢ ᤆᤥᤃᤢᤒᤠ ᤔᤠᤱᤜᤧᤰᤁᤡᤸᤗᤧ ᤆᤥᤃᤢᤸᤗᤧ ᤀᤠᤸᤗᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡ᤹ᤖᤥ॥

²⁹ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤡᤒᤠ ᤐᤷᤎᤠ᤺ᤶᤜᤠ᤹ ᤏᤢ ᤀᤢ᤺ᤳᤇᤡᤱᤔᤠᤴ ᤕᤠᤱᤏᤠ ᤔᤧᤏᤢ᤺ᤰᤋᤢᤴ॥

³⁰ᤌᤣᤀᤠᤱᤓᤧᤸᤗᤧ ᤌᤡᤰ ᤕᤧᤶᤔᤥ ᤂᤡᤏᤡ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱ ᤔᤧᤴᤀᤡ᤺ᤵᤔᤏᤠᤒᤠ ᤔᤧᤴᤏᤠ᤺ᤵᤔᤏᤠᤒᤠ ᤁᤧᤈᤥᤃᤡ᤹. ᤁᤖ ᤕᤜᤢᤍᤡᤜᤠ᤹ ᤀᤡᤱᤈᤠ᤺ᤱ ᤔᤧᤴᤀᤡ᤺ᤵᤔᤏᤠᤒᤠ ᤔᤧᤴᤏᤠ᤺ᤵᤔᤏᤠᤒᤠ ᤔᤧᤒᤥ᤺ᤰᤂᤧᤒᤠᤸᤗᤧ ᤂᤢᤏᤧ᤹ ᤁᤢᤗᤢᤱᤃᤢᤶᤔᤡᤴ ᤀᤠᤸᤗᤥ ᤂᤡᤏᤡ᤹ ᤁᤧᤄᤥ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ॥

³¹ᤜᤧᤰᤁᤣᤗ᤹ᤖᤡᤰᤁᤣ ᤂᤧᤱᤜᤠ᤹ ᤀᤡᤱᤈᤠ᤺ᤱ ᤔᤧᤴᤀᤡ᤺ᤵᤔᤏᤠᤒᤠ ᤔᤧᤴᤏᤠ᤺ᤵᤔᤏᤠᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹. ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤗᤢᤱᤔᤠ᤹ ᤁᤧᤍᤢᤰᤋᤡᤒᤠ ᤁᤢᤀᤡᤛᤡ᤺ᤰᤁᤣ ᤂᤢᤏᤧ᤹ ᤂᤧᤱᤜᤠ᤹ ᤕᤠᤶᤔᤥ ᤗᤢᤱᤔᤠ᤹ ᤋᤢᤰᤋᤢᤛᤡ᤹ᤖᤥ॥

³²ᤁᤠᤰ ᤔᤏᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱ ᤔᤧᤴᤀᤡ᤺ᤵᤔᤏᤠᤒᤠ ᤔᤧᤴᤏᤠ᤺ᤵᤔᤏᤠᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤂᤧᤱᤜᤠ᤹ ᤛᤠᤰᤐᤠ ᤁᤧᤎᤠ᤺ᤒᤠᤜᤠ᤹ ᤜᤧᤰᤁᤣ ᤔᤧᤳᤋᤢᤛᤡᤖᤥ॥ ᤁᤖ ᤂᤧᤱᤜᤠ᤹ ᤗᤢᤱᤔᤠ᤹ ᤋᤢᤰᤔᤠᤛᤡ ᤑᤠ᤹ᤀᤠᤱ ᤜᤧᤰᤁᤣ ᤆᤥᤃᤢᤒᤠᤖᤥ॥

³³ᤀᤠᤰᤁᤥ ᤜᤥ᥄ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤰᤁᤢᤶ ᤏᤡᤱᤘᤠ᤹ᤀᤡᤴ ᤏᤢ ᤁᤢᤏᤧᤜᤡᤏᤡᤱᤘᤠ᤹ᤀᤡᤴ ᤀᤠᤰᤂᤧᤴ ᤀᤡᤔᤧᤸᤗᤢᤱᤒᤠ ᤏᤢ ᤏᤡᤱᤘᤠ᤹ ᤁᤧᤔᤠᤒᤠᤒᤣ᥄ ᤂᤢᤏᤧ᤹ ᤁᤢᤄᤠᤛᤧᤴᤏᤡᤴ ᤏᤢ ᤁᤢᤗᤠᤶᤔᤡᤴ ᤁᤢᤛᤡᤱ ᤏᤡ᤺ᤵᤔᤠᤀᤣ ᤛᤢᤰᤔᤧᤍᤧᤳᤋᤡᤴᤗᤥ᥄

³⁴“ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ᤀᤡᤴ ᤜᤠ᤺ᤳᤗᤧ ᤏᤡ᤺ᤛᤢᤀᤠᤱ ᤘᤠ᤹ᤒᤣ᥅ ᤜᤧᤰᤁᤩᤠᤱ ᤜᤠ᤺ᤳ ᤂᤢᤏᤧ᤹ ᤛᤢᤈᤠ ᤁᤧᤒᤡᤒᤠ ᤐᤥ᤺ᤰᤂᤧᤀᤠᤱ ᤘᤠ᤹ᤒᤣ᥅”