ROMA 11:3-34

³“Lohiabada e, oiemu peroveta taudia idia alaia mase vadaeni, oiemu pata helagadia idia makohia vadaeni. Lau sibona lau noho, bona lau danu idia tahua, idia ura lau idia alaia mase.”

⁴Vadaeni Dirava be edena bamona ia haere henia? Ia gwau, “Lauegu tatau be 7000, idia ese lau idia rakatania lasi, unai dirava koikoi Bala idia tomadiho henia lasi.”

⁵Harihari inai nega danu be hegeregere, taunimanima momo lasi ese Dirava idia badinaia noho, iena bogahisihisi dekenai ia abidia hidi taudia sibona inai.

⁶Oibe, iena bogahisihisi dainai unai taudia ia abidia hidi, edia gaukara dainai lasi. Badina be bema edia gaukara dainai Dirava ese taunimanima ia abidia hidi, unai be, iena bogahisihisi be bogahisihisi momokani lasi.

⁷Vadaeni edena bamona ita herevalaia? Israela taudia ese idia tahua gauna be idia davaria lasi. Dirava ese ia abia hidi orea maragina sibona mo taudia ese inai gauna idia davaria. To taunimanima orena, orea badana, be lalona auka dainai, Dirava ena boiboi idia kamonai henia lasi.

⁸Buka Helaga ia torea bamona, ia gwau: “Dirava ese edia kudouna bona edia lalona ia hametaua, vadaeni idia be edia matana dekenai idia itaia diba lasi. Bona edia taiana dekenai idia kamonai diba lasi. Inai bamona idia noho ia mai bona harihari.”

⁹Ma Davida danu inai bamona ia hereva, ia gwau, “Dirava lau noia, ia ese idia aniani noho neganai do ia aladia, haoda tauna ese gwarume ia alaia bamona. Dirava lau noia, ia ese do ia hamorudia, do ia panisidia.

¹⁰Dirava be namo ia ese edia matana do ia hakapua, vadaeni idia itaia lou diba lasi, bona hisihisi do ia henidia hanaihanai, edia kerere dainai.”

¹¹Unai dainai lau henanadai, lau gwau: Iuda taudia idia moru neganai, unai moru be edia dokona momokani, a? Lasi momokani. Badina be Iuda taudia idia kara dika dainai, hamauria be Iuda lasi taudia dekenai ia ginidae, vadaeni Iuda taudia ese idia mama henidia inai.

¹²Oibe, Iuda taudia edia kara dika ese hanamoa bada herea ia mailaia tanobada taudia dekenai, bona Iuda taudia be lauma ena gau dekenai idia ogogami dainai, Iuda lasi taudia ese hanamoa bada herea idia abia. To mani ita laloa, bema Iuda taudia ibounai ese Dirava ena hamauria idia abia neganai, hanamoa ita dekenai be do ia bada herea, ani?

¹³Umui idau bese taudia, umui dekenai lau hereva. Lau be umui Iuda lasi taudia totona aposetolo gaukara lau karaia noho, bona inai dagi lalonai lau moale bada.

¹⁴Inai dagi dekena amo, sedira mama do lau havaraia egu varavara Iuda taudia edia lalona dekenai. Vadaeni inai dekena amo haida do lau hamauridia diba.

¹⁵Badina be ia ese Iuda taudia ia negea dainai, Dirava be tanobada bese ibounai danu ia maino karaia. Vadaeni Dirava ese Iuda taudia do ia abia lou neganai, be dahaka do ia vara? Mase dekena amo mauri do ia vara, ani?

¹⁶Bema tau ta ese paraoa ena kahana ginigunana ia henia Dirava dekenai, orena kahana ibounai danu be Dirava ena. Bona bema tau ta ese au ta ena ramuna ia henia Dirava dekenai, unai au rigidia danu be Dirava ena.

¹⁷To olive auna ta, idia hadoa gauna, ena rigina haida be idia utua oho, bona tubu kava olive auna ena rigi idia hakapua unai utua gabuna dekenai. Umui Iuda lasi taudia be tubu kava olive auna bamona, bona Iuda taudia edia goada bona edia mauri namona umui abia nega tamona.

¹⁸Unai dainai, unai rigi idia utua oho bamona taudia dekenai do umui laloa lasi idia be gau anina lasi bamona. Umui hekokoroku lasi! Umui be rigi sibona, umui ese ramu umui durua lasi, to ramu ese umui ia durua noho.

¹⁹Sedira do umui gwau, “Rigi be Dirava ese ia utua oho, edia gabu dekenai ai do ia atoa totona.”

²⁰Inai be momokani. Idia be idia abidadama lasi dainai Dirava ese ia utudia oho, to umui be umui abidadama dainai, umui gini noho edia gabu dekenai. To do umui hekokoroku lasi, do umui gari noho.

²¹Bema Dirava ese unai rigi korikori ia laloa momo lasi to ia utua oho, namona be do umui laloa namonamo, umui danu do ia utua oho garina.

²²Dirava ena bogahisihisi bona iena panisia kara do umui laloa. Idia moru taudia do ia panisidia, to umui dekenai do ia bogahisihisi henia, bema iena bogahisihisi umui badinaia noho neganai. To bema umui badinaia lasi, ia ese umui danu do ia utua oho momokani.

²³To Iuda taudia bema edia abidadama lasi do idia rakatania neganai, edia gabu korikori dekenai Dirava ese ma do ia atodia lou, badina be Dirava be mai ena siahu idia do ia atoa lou.

²⁴Umui Iuda lasi taudia be unai tubu kava olive auna ena rigi bamona. Unai rigi idia utua oho, vadaeni olive auna namona dekenai idia hakapua. Inai be umui emui au momokani lasi. To Iuda taudia be idia hadoa olive auna korikori bamona. Unai dainai Dirava ese karaharaga inai Iuda bamona rigidia do ia hakapudia lou diba, edia au korikori dekenai.

²⁵Lauegu varavara taudia e, lau ura be inai hunia herevana do umui diba, umui sibona emui aonega do umui hekokorokulaia garina. Gauna be inai: Israela taudia edia abidadama lasi be nega ibounai do ia noho lasi. To edia abidadama lasi do ia noho, ela bona Iuda lasi taudia dekena amo Dirava ese ia abidia hidi taudia, be iena Basileia dekenai do idia vareai.

²⁶Bona Dirava ese inai bamona dala dekenai Israela ibounai do ia hamauria, Buka Helaga ia torea hegeregerena, ia gwau: “Hamauria Tauna Siona lalona dekena amo do ia toreisi. Ia ese Iakobo bese taudia edia kara dika do ia kokia.

²⁷Dirava ia gwau, ‘Lau ese inai gwauhamata idia dekenai lau henia neganai, edia kara dika ibounai do lau abia siri.’ ”

²⁸Iuda taudia ese Sivarai Namona idia ura henia lasi dainai idia ese Dirava dekenai idia tuari henia noho. To inai bamona idia karaia dainai, umui Iuda lasi taudia be durua umui abia noho. To Dirava ese Iuda bese taudia ia abidia hidi, bona ia lalokau henidia. Bona Dirava ese edia sene taudia dekenai iena gwauhamata ia henia, idia be iena turana hanaihanai.

²⁹Oibe, bema Dirava ese taunimanima haida ia lalokau henidia dainai ia hanamodia bona ia abidia hidi neganai, ia be gabeai iena laloa do ia giroa lasi.

³⁰Umui Iuda lasi taudia ese guna Dirava dekenai umui kamonai henia lasi. To harihari Dirava ena bogahisihisi umui davaria vadaeni, Iuda taudia idia kamonai henia lasi dainai.

³¹Unai bamona danu, Iuda taudia ese harihari Dirava idia kamonai henia lasi, be idia danu inai bogahisihisi do idia davaria, umui ese umui davaria bamona.

³²Badina be Dirava ese taunimanima ibounai kamonai lasi kara ena dibura lalonai ia koudia vadaeni, iena bogahisihisi idia dekenai do ia hedinaraia totona.

³³Dirava ena namo bona iena hariharibada be bada bona bada herea, ani? Iena aonega bona iena laloa dobu be edena bamona ita tahua diba? Iena dala be daika ese do ia davaria diba?

³⁴Buka Helaga ia torea bamona, ia gwau: “Lohiabada ena laloa be daika ia diba? Daika ese ia sisiba henia diba?