Rom 11:3-34

³“Leklek, la ka umkol tar anuma propetla, pa la ka regen tar otleng na logo na tun artabar tetek u, pa iau kama kane, pa la tohi sur lar umkol iau.”

⁴Asa a arkeles ane God tetek e Elaija? I kelesi mang, “Anuka mais a rip a tarai kaning ot, ning bel la lotu tetek e Bal, a asasongo na god.”

⁵Mangotleng larning onone, e God ka aslang pas dingla ka miting na tarai, anasa ana nuna marmaris.

⁶E God ka aslang pas la ana nuna marmaris, bel ana titol ning la toli. Ngandek ning e God ir aslang pas dingla miting na tarai anasa ana titol ning la toli, bel a marmaris i ning.

⁷Dalar oroi, a tarai Israel la tatatai sur ta ngas ning lar tostos onoi namatana e God, ika bel la pastetek pasi. La ka ning ka aslang pas la, la pastek pasi, ika a tarai masik bel. I arakrakai alar ka a balanla.

⁸Larning di ka tumus tari ting na Buk Tabu mange, “E God i aloklokron a nuknukinla, i san akut a matanla sur gong la tai, pa i akutkut a talnganla sur gong la longor, tuk onone.”

⁹Pa e Dewit otleng i atai e God mange, “Ning la kes taum ana nunla na logo na hangan, ur lingiri sur ir arlar ana kun, ning lar sogor pa lar hirua onoi, pa ir arlar ana uben, ning ir tong akes la, pa ir arlar ana hat ning lar buh a hanla onoi pa lar punga, pa ir arlar ana warkurai na arkeles otleng.

¹⁰Ur san akut a matanla sur gong la tai, pa ur noren la, sur a intaurunla ir bul tikin ana tnan mamahat.”

¹¹I maining a kabah: Mangmangasa, ning a tarai Israel la punga, la punga tikin? Bel! Ika, e God i alaun pas a tarai masik, anasa ana toltol laulau anun a tarai Israel, sur ir dat atur a nuknuk a tarai Israel, sur la otleng lar ram sur e God ir alaun la.

¹²Ning a tarai Israel la gilam ris kusun a ngas ning e God ir alaun la onoi, e God i atong angisngis a tarai rop te na rakrakan hanua. Ning i kepsen anuna angisngis kusun a tarai Israel, i saran tari tetek a tarai masik. Ika ning a tarai Israel lar ulak tetek e God, a tarai te na rakrakan hanua lar angis kol.

¹³Onone a warwara tetek mulo a tarai ning bel a tarai Israel. Mulo tasmani mang a sira titol na aposel tetek mulo, a tarai ning bel a tarai Israel. A titol ning e God i sune iau onoi, i itna kol te na nuk a lalaun.

¹⁴Ana nuka titol ne, a mang sur ar akamtur a nuknuk ana nuka kaba tarai, sur lar ram omulo pa e God ir alaun pas hal onla.

¹⁵E God i gilam ris kaba kusun a tarai Israel, sur ir armoro a tarai masik. Pa ning e God ir ben ulak pas a tarai Israel, ir wakak kol. A minatla lar laun.

¹⁶Ar warwara larlar otleng mange: Ning a ningnigo na diah bret di sarani tetek e God, a kidol a bret ane God. Pa ning a wakir a rakai di sarani tetek e God, a rakrakana otleng ane God.

¹⁷A tarai Israel la arlar ana rakai a oliw momol ning di ka oman tari, pa mulo a tarai masik mulo arlar ana lomlom a rakai a oliw. E God i kuben pas dingla na rakrakana rakai a oliw momol, pa i kibas pas dingla na rakrakana lomlom a oliw, pa i tol a bading onla ting na rakai a oliw momol. Pa onone, mulo laun ana polo ning i han miting na wakir a rakai a oliw momol.

¹⁸Gong mulo iaunan mulo ning mulo oroi a rakrakana ning di ka kuben tar la. Mulo tasmani mang a wakir a rakai ot i saran a lalaun tana rakrakana, bel a rakrakanala la saran a lalaun tana wakirna. I arlar o mulo, e God i saran a lalaun tetek mulo kamna ana tarai Israel.

¹⁹Sakana mulor atongi mang, “E God i kuben dingla na rakrakana sur ir apatap tar mila ting na pukna ning ka kuben tar la.”

²⁰A momolna ot, e God i kuben la anasa bel la tortorot. Pa mulo, e God i apatap tar mulo anasa mulo tortorot. Pa gong mulo dat abarah pukulumulo, mulor matmataut.

²¹Anasa e God bel i maris alar la, i kuben tar dingla na rakrakana a rakai ning. Ning i toli larning onla, ir toli otleng larning omulo ning bel mulo tortorot.

²²I maining mulor oroi a marmaris pa balakut ane God. I asangan anuna balakut tetek la ning la han masik kusuni, pa i asangan anuna marmaris tetek mulo, ning mulo tortorot ana nuna marmaris tetek mulo, pa bel mulo manah kusuni. Ika, ning bel mulor tortorot, ir umsem omulo otleng.

²³Pa a tarai Israel otleng, ning lar tortorot, la otleng, e God ir apatap ulak la, anasa i tolsot pasi.

²⁴E God i umsem pas mulo miting na lomlom a rakai a oliw, pa i apatap tar mulo ting na rakai a oliw momol. Manglarning, bel i ngangeten sur ir apatap ulak na rakrakana rakai a oliw momol ting na rakaina.

²⁵Na tastasikla, a mang sur mulor tastasim ana utna ning nating i mumun, sur gong mulo aitna pas mulo. I manglarne: Dingla na tarai Israel, ir rakrakai a balanla, tuk ning a wawas ana tarai masik ning la tortorot, ir arlar ana nuknuk e God.

²⁶I maining ir alaun rop pas a tarai Israel. Larning di ka tumus tari ting na Buk Tabu mange, “A Tena Alaun ir han misaot e Saion, pa ir lingir a kaba tarai ane Jekop sur bel ma lar gilam ris kusun e God.

²⁷Pa ine a kunubus ning ar toli taum onla, ar kepsen anunla na toltol laulaula.”

²⁸A tarai Israel la na hirua ane God anasa bel la tortorot ana Wakak a Warwara, sur ir angis mulo a tarai masik. Ika, e God i maris kol la, anasa i aslang pas na tumtubunla.

²⁹E God bel i sira lingir a nuknukna kusun a tarai ning ka kabah pas la, pa bel i sira kibas ulak anuna artabarla kusun la.

³⁰Nating, bel mulo sira longor tetek e God. Ika ning a tarai Israel bel la longor teteki, e God i maris mulo male.

³¹I mangotleng larning, onone a tarai Israel bel la longor tetek e God, sur lar kibas anuna marmaris, anasa i maris mulo.

³²E God i noren tar a tarai rop sur anunla tabun longor ir dot akes la, sur ir asangan anuna marmaris tetek la rop.

³³Lakla! I itna kol a wakak a gongon ane God, anuna wakak a nuknukla pa anuna tastasim. Bel tik ir tolsot sur ir papak ana nuknuk e God. Bel tik i tasman anuna ngasla.

³⁴“Esining ka tasman tar a nuknuk e God? Pa esining ka warwara na harnangai tar teteki?”