3Dikiri, ò n annabinↄ dɛ̀dɛ, ò n gbagbakinↄ gbòro. Makũ mɛ́ ma gↄ̃ mado, akũ òtɛni ma wɛɛ.
4Luda pì Iliasunɛ deramɛɛ? À pì, á gbɛ̃ kũ odi kútɛ Baalinɛronↄ kũna a pↄ́ ũ gbɛ̃nↄn dúbu suppla.
5Lɛmɛ dↄ ń gbɛ̃ kpara kũ Luda ń sɛ́ a gbɛ̃kɛ gũnnↄ kpɛ́ kun ari gbãra.
6Lákũ à ń sɛ́ a gbɛ̃kɛ gũn nà, adi kɛ ń yãkɛna yãinlo. Tó lɛnlo, de Luda gbɛ̃kɛ nigↄ̃ gbɛ̃kɛ ũro.
7Deran gwee? Isarailanↄ dí yã kũ òtɛn wɛtɛ lero, ama ń gbɛ̃ kũ Luda ń sɛ́nↄ lè. Ń gbɛ̃ kũ ò gↄ̃̀nↄ sã tàta,
8lákũ à kɛ̃na Luda yãn nà ò pì: Luda iwɛza dàńnɛ, akũ ń wɛ́ dí gu ero, ń sã dí yã maro ari kũ a gbãrao.
9Dauda pì dↄ: Ń dikpɛkɛna gↄ̃ńnɛ tankutɛ ũ à ń kũ, à gↄ̃ńnɛ gɛ̃̀siki ũ de à yã lúńnɛ.
10Ń wɛ́ sisi de òsun gu ero, ń wó gↄ̃ kokona gↄrↄ sĩnda pínki.
11Ma pì yↄ́ↄ? Kũ Isarailanↄ gɛ̃̀ɛ sì, ò lɛ̀tɛ sãnsãnn yá? Lɛnlo fá! Ń taarinↄ yãin Luda buri pãndenↄ sura bà, de Isarailanↄ gↄ̃ba kpá kũńwo yãi.
12Lákũ ń taarinↄ mɛ́ à tò andunia karanaa lè nà, akũsↄ̃ ń funa mɛ́ à tò buri pãndenↄ karanaa lè, oni ń lɛ́ papana yã o dↄ yá?
13Matɛn yã o ákↄ̃nↄ buri pãndenↄnɛ sà. Lákũ má de zĩ̀ri ũ buri pãndenↄ kĩnaa nà, madì ĩa dã ma zĩ̀rikɛna yã musu,
14de mà a zĩda burinↄ nɛ̀sɛ vutɛ ò gↄ̃ba kpá, mà ń gbɛ̃kenↄ sura ba.
15Zaakũ Luda gina Isarailanↄi mɛ́ à tò andunia kɛ̀ kãao nna, tó à ɛ̀ra à ń sí dↄ, abire nigↄ̃ de deramɛɛ? Abire nigↄ̃ bi wɛ̃̀ndi ũ gɛ̀nↄnɛ.
16Tó ò burapↄ káaku kpà Ludaa, a kpara gↄ̃̀ arubarika pↄ́ ũmɛ. Tó lí zĩni de Luda pↄ́ ũ, a gã̀nↄn de a pↄ́ ũmɛ se.
17Luda kù lí yãpura gã̀ kenↄ zↄ̃̀zↄ̃, akũ à mↄkↄ̃n kũ ń de kùnnɛ lí ũ pɛ̀ a gbɛ̀n, de ǹgↄ̃ kun kũ kù lí mana zĩni gbãnao.
18Ǹsun kù lí yãpura gã̀ kũ à zↄ̃̀zↄ̃nↄ gya boro. N kɛ dera ntɛn ĩa dãa? Ń kun lí zĩni yãimɛ, adi kɛ lí zĩni mɛ́ à kun n yãiro.
19Ĩni pi, à lígãa pìnↄ zↄ̃̀zↄ̃ de à n pɛ́ ń gbɛ̀n yãimɛ.
20Lɛmɛ, ama à ń zↄ̃zↄ̃ kũ odi a náani kɛro yãi. Mↄkↄ̃n sↄ̃, n zɛki lè kũ ntɛn Luda náani kɛ yãi. Ǹsun n zĩda biro. Ǹ laakari kɛ!
21Lákũ Luda dí gí kù lí yãpura gã̀nↄ zↄ̃zↄ̃iro nà, ani gí n zↄ̃i sero.
22Ǹ gwa lákũ Luda mana nà, akũsↄ̃ à pãsĩ. À pãsĩ kũ gbɛ̃ kũ ò fùanↄ, akũ à manannɛ, tó n zɛ kũ a manakɛnaao. Tó lɛnlo, ani n zↄ̃mɛ se.
23Tó Isarailanↄ ń ludanaanikɛnasari tò, ani ɛra à ń pɛ́ ń gbɛ̀mmɛ, zaakũ à ń pɛna ń gbɛ̀n gbãna vĩ.
24Tó Luda n zↄ̃ kùnnɛ lía à n pɛ kù lí yãpuraa lákũ òdi kɛro nà, kù lí gã̀ yãpuranↄ ɛra à pɛna ń zĩda lía zɛ́ vĩ de abirelaroo?
25Ma gbɛ̃nↄ, má ye àgↄ̃ asiriyã díkĩna dↄ̃, de á wɛ́ súngↄ̃ sira à á zĩda ditɛ ĩadãrinↄ ũro yãi. Isaraila kparanↄ sãgbãna kũ̀ gĩa ari buri pãndenↄ gɛ̃na kpata kũ à bò Luda kĩnaa gũn lɛ́ gↄ̃ ká.
26Abire gbɛra Luda ni Isarailanↄ sura ba ń pínki lákũ à kɛ̃na Luda yãn nà kũ ò pì: Surabari ni bo Zaiↄ̃, ani Yakubu burinↄ kɛ̃kↄ̃a kũ ludadↄ̃nasario.
27Ma bàka kunna kũńwo yãn gwe gↄrↄ kũ mani ń durunna kɛ̃ḿma.
28Baaru nna pì yã musu ò de Luda ibɛrɛnↄ ũ á yãi. Luda gbɛ̃nↄ sɛna yã musu ò de Luda yenyĩdenↄ ũ ń dizi káakunↄ yãi.
29Zaakũ Luda gbanↄ kũ gbɛ̃ kũ à ń sísi à ń sɛ́nↄ dì sí litɛro.
30Ákↄ̃nↄ buri pãndenↄ ádi Luda yã ma yãro. Tera sà Luda sùru kɛ̀ kãáo kũ Isarailanↄ dí a yã maro yãi.
31Lɛn Isarailanↄ gì Luda yã mai lɛ tera, de Luda le à sùru kɛ kãáo gbasa à sùru kɛ kũńwo.
32Luda yãdasarikɛ kpà gbɛ̃ sĩnda pínkia de à le à sùru kɛ kũńwo ń pínki yãimɛ.
33Luda ↄ̃ndↄ̃ kũ a dↄ̃naao zↄ̃kↄ̃kɛ kà zã̀ fá! Gbɛ̃ke ni fↄ̃ à bo yã kũ à zɛ̀o asiriaro. Oni fↄ̃ ò a dↄ̀rↄ dↄ̃ro.
34Dí mɛ́ à Dikiri laasun dↄ̃ↄ? Dí mɛ́ à yã dànɛ a lɛ́dammari ũu?
ROMUDENƆ 11
ROMUDENƆ 11:3-34