Roma 10:3-20

³Jaŋe Anuturaonec kiŋfâsâc eere hata fokac i kâuc baeŋgopieŋte jaŋac tiŋke biaŋ eniŋte giene baeŋgopieŋ. Irec Anutu tiŋne rune mi dapecnembiŋ.

⁴Ŋiczi mamanasiŋhec erâ kiŋfâsâc bâfuanaŋte Kristozi sâcmutâc dâŋte hata hebâzicke‐nârewec.

⁵Mose e dâŋ ʒiŋuc qâreŋkewec: “Ŋic moc e sâcmutâc dâŋte tiŋke biaŋ hata âteocmuzi juju bâfuaocmu.”

⁶Â mamanasiŋte tiŋke biaŋ eere dâŋ ine kecʒiŋuc fokac: “Go maŋgezi ʒiŋuc mi muzemec: Mozi sambâŋko ferâ Kristo bawahaocmu,

⁷me mozi hârâcko hurâ Kristo hâmokicne jaŋeraonec jowa wefuocmu?”

⁸Iŋuc mâcne, tiri papiao kecʒiŋuc mukicne: “Miti i ʒoricko mi fokac, i mumugao â mamanagao râekicne.” I mamanasiŋte dâŋ ŋaza qazuc eeŋgopeneŋ irec mukicne.

⁹Jesu e Wofuŋ‐nane i mumugao foocmu â Anutuzi Jesu hâmockonec bâɋâre‐narewec i mamanagao foocmu eme biaŋkerâ jucmu.

¹⁰Maŋzi Jesu manasiŋkehuc kiŋfâsâc ezo, â miczi e mutaniŋkehuc biaŋkezo.

¹¹Eme irec hâcne miti papiao kecʒiŋuc qâreŋkekicne: “E manasiŋkeocmuzi mi qurutuaocmu.”

¹²Judaŋic â Grikŋic bârâwiŋ mi eŋgopeneŋ, e mocjahazi Wofuŋ junâre‐fâreekac, erâ wiac fuŋne fuŋne hezu henâreekac.

¹³Irec hâcne ʒiŋuc mukicne: “Wofuŋte ʒâŋe riwaseckeocmuzi biaŋkerâ juocmu.”

¹⁴Ririwasecke i e mi manasiŋkeeŋgopieŋzi wemocko eniŋmu? Anutu mamanasiŋke i dâŋticne mi manaeŋgopieŋzi wemocko eniŋmu? Anutu dâŋticne mamana i biŋe mumu tâmiric wemocko eniŋmu?

¹⁵Â biŋe mumu i moczi jaza sorec mi ejarehame wemocko fuaniŋmu? Dâŋqâreŋ ʒiŋuc hâcne fokac: “Biŋebiaŋ mumuŋic jaŋere kike fânâŋzi maŋ baafec bâfuaekac.”

¹⁶Biŋebiaŋ ine ŋic gâcnezi mana rereŋ mi embiŋ. Jesajazi wâc ʒiŋuc muwec: “Wofuŋ, biŋedâŋ muhaŋnekicne i mozi mana ʒakiewec?”

¹⁷Irec ʒiŋuc manazo: Mamanasiŋ i miti mu manacte fârine, â miti mu manac i Kristore micte fuaekac.

¹⁸Hâc, eme ʒiŋuc muhuc wiokopac: Jaŋe miti mi manambiŋ me? Iŋuc mâcne, “Micfânâŋ‐jeŋiczi mâreŋ sâcke‐fârewec â dâŋjeŋiczi mâreŋ qaŋeŋnao fisiwec.”

¹⁹Eme mocwâc wiohuc mukopac: Israe ŋic jaŋe mi mecne mana‐hâmombiŋ? Iŋuc mâcne, qanaŋ Mosezi ʒiŋuc qâreŋkewec i mupe: “No ŋic omane rocjopape siric‐ŋopapie iiŋguuŋ ejarenʒepieŋ; ŋicguru mutucne hefârec‐jopape buŋeŋic gâpârezejec.”

²⁰Eme ʒâhec Jesajazi dâŋ bâutuckehuc kecʒiŋuc muwec: “Mi basacnuhuc jumbiŋzi bâfuacnumbiŋ, nore mi muhuc jumbiŋ jaŋe maic‐jopapo.”