Romans 10:3-20

³Idimaa, digaula digi iloo di ala dela e hai ginaadou gii donu i baahi o God, e haihai hua nadau huai ala i ginaadou, malaa, digaula digi daudalia di ala a God dela e hai ginaadou gii donu i dono baahi.

⁴Idimaa, Christ gu haga modongoohia di hagalawa o nnaganoho, gei digau huogodoo ala gu hagadonu la guu hai digau e donu i baahi o God.

⁵Deenei di mee Moses ne hihi bolo gii hai nia daangada gii donu i baahi o God i di nadau hagalongo ang gi nnaganoho, “Be koai hua dela e hagalongo ge e daudali nnaganoho, geia ga mouli.”

⁶Di mee di Beebaa Dabu e haga modongoohia tangada dela e donu i baahi o God mai i dono hagadonu la deenei, “Goe hudee heeu adu boloo, ‘Ma koai dela gaa hana gi di langi?’” (belee laha ia a Christ).

⁷“Hudee heeu labelaa boloo, ‘Ma koai dela gaa hana gi bahi i lala henuailala?’” (belee laha aga a Christ mai di made).

⁸Deenei di mee e helekai ai boloo, “Nia helekai a God le e hoohoo adu gi di goe, i lodo doo ngudu, i lodo do manawa.” Aalaa go nia helekai o di hagadonu ala e agoago go gimaadou.

⁹Maa goe ga haga modongoohia gi doo ngudu bolo Jesus la go Tagi, ga hagadonu i lodo do manawa bolo God ne haga mouli aga a Mee mai di made, gei goe ga hagamouli.

¹⁰Idimaa, ma go tadau hagadonu dela e hai gidaadou gii donu i baahi o God, gei tadau haga modongoohia a Mee gi tadau ngudu dela e hai gidaadou gi mouli.

¹¹Di Beebaa Dabu e helekai boloo, “Be koai hua dela ga hagadonu a Mee, geia hagalee haga langaadia.”

¹²Nnelekai aanei la ang gi digau huogodoo, idimaa, di hai geegee i mehanga digau o Jew mo digau tuadimee ai. God e dahi hua, di Tagi ni digaula huogodoo, gei e haga maluagina digau huogodoo ala e tangi ang gi de Ia.

¹³Di Beebaa Dabu e helekai, “Digau ala ma ga tangi anga i di ingoo o Dimaadua i di hagamaamaa, le e hagamouli.”

¹⁴Malaa, digaula e tangi ang gi Mee behee maa ginaadou digi hagadonu? Gei digaula e hagadonu behee maa ginaadou digi longono nia helekai? Gei digaula e longono behee, maa nia helekai la digi agoago ina gi digaula?

¹⁵Gei nnelekai le e agoago behee maa digau agoago la digi hagau ina gi daha? Di Beebaa Dabu e helekai, “E madamada huoloo go di lloomoi o digau ala e gaamai di Longo Humalia!”

¹⁶Hagalee go digaula huogodoo ne kae di Longo Humalia. Isaiah gu helekai, “Meenei Dimaadua, ma koai e hagadonu madau helekai?”

¹⁷Malaa, di hagadonu le e hidi mai i di longono nia helekai, gei nia helekai ne lloomoi i nia agoago o Christ.

¹⁸Gei au ga heeu be di maa e donu digau Israel digi longono nia helekai agoago? Deeai, digaula gu longono, i di Beebaa Dabu e helekai: “Di lee o nadau helekai gu modoho gi hongo henuailala hagatau, gei nadau helekai guu dau i nia mada o henuailala.”

¹⁹Malaa, au ga heeu labelaa be di maa e donu digau Israel digi modongoohia di mee deenei? Ma go Moses modogoia dela ne helekai gi di maa matagidagi, “Au ga haga hai hegau tenua damana balumee gi heia agu daangada gi dubua; Au gaa hai tenua de kabemee gi heia agu daangada gi hagawelewele.”

²⁰Gei Isaiah e helekai haga madammaa, “Au ne gida go digau ala hagalee nogo halahala Au. Au ne haga gida Au gi digau ala hagalee nogo heheeu Au.”