Loma 10:3-20

³Ekŋenaŋ Kawawaŋmagen meti yompiŋ bembe keyet setnaŋ makandalip. Keyepmti ilinagak dolakŋaŋ bembeyet mulupmaŋ mti ekŋenaŋ Kawawaŋ am indamukulem mme teŋ makwalip an ke mabamkumpeip.

⁴Kilais egaŋ zii zet amnaŋ zii zet gawepumti teŋ kwabanup nâmti mulup mamip keyet ŋoktik kume totogat koge. Kegok mti am indamukulem mme Kawawaŋ nâmkiŋpemti an teŋ kwakwagalen setnaŋ beye.

⁵Zii zet gawepumti mama keyet Moses egaŋ zet pigok kuye, “An ŋen zii zetgalen set mâpme delaŋ zenak beme egaŋ mama kanzizit keeset tinak.”

⁶Ma Mosesiyaŋ zet ŋen amnaŋ nâmkiŋpemti teŋ bembeyelen keyet zet pigok zeye, “An ŋenaŋ kululuŋen ku moti Kilais wat topme amnaŋ teŋ bembeyelen zetnaŋ diindondoyelen mowatobe.”

⁷Ma am ŋenaŋ Kilais gakikiengatnaŋ towakwapme amnaŋ teŋ bembeyelen keyet zetnaŋ diindowe, “Kogok ku mimiyelen enenogat Kilais ilak kululuŋengatnaŋ toti gakimti wage.”

⁸Keyepmti Kawawaŋgalen Zet Itnaŋanen meluwaŋ kapigok kukuŋaŋ tazin, “Kawawaŋaŋ am mme teŋ bembeyelen keyet buŋam zapatnaŋ enzililiŋaŋ yek; sokŋaŋ tazin. Ke zikalinan mama kuip mti keŋinan ke nâmkiŋpepeyelen ma dembusekŋinan zet keyet zenâ zenâ tuŋguwinan mimiyelen.” Ke zet nin nâmkiŋpepeen timet ndendeyelen zet.

⁹Keyepmti zet zenzeŋinan, “Zisas ek Amobotnaŋ,” ke zemkawaŋ bewep. Ma Kawawaŋaŋ Zisas mme wage keyelen zet keŋinan nâmkiŋpemeŋgut Kawawaŋaŋ ingat, “An teŋ,” zemindemti mme ikŋaŋgat nembaŋaŋ bewep.

¹⁰Keŋin penaŋaŋ Zisas nâmkiŋpewewen an teŋ bewep. Ma dembusekŋinan Zisas Kawawaŋaŋ An in mukulem mimiyet peme toti indage kogok zemkawaŋ bewewen in an teŋ talip bein.

¹¹Keyepmti Kawawaŋgalen Zet Itnaŋanen kapigok meluwaŋ kukuŋaŋ, “An Zisas nâmkiŋpewe an ke Zisasiyaŋ ku bamkumpewe.”

¹²Kogogapm am sambe nin zet keyet kandaŋan tapmann delaŋ zein. Zuda am ma Glik am ekŋen sepem igak igak penaŋ ku beip. Zisas kwep etaŋaŋ ningat Amobotnaŋ temakwep mamamndain. Mti am ŋenaŋ egaŋ mukulem mimindendeyelen nâmti mandundum saip ekŋen taolet mamindain.

¹³Zet ke Kawawaŋgalen Zet Itnaŋaŋaŋ bandim mti pigok zenzeŋaŋ, “Am ŋenaŋ Amobotnaŋaŋ yomaŋ katikpepeyelen dundum sawe beme an ke yomaŋ katikpewe.”

¹⁴Ekŋenaŋ Amobotnaŋ Zisas ku nâmkiŋpeip keyaŋ zeinen ekŋenaŋ egaŋ yomin peme mebegat ku mandundum saip. Mti nan ekŋenaŋ Kawawaŋ zetnaŋ ku nâmbien benak beme zigoset egat nâmkiŋpewiek? Ma an ŋenaŋ Zet Zapat Dolakŋaŋ Penaŋ ke timti ku met diindonak beme zet ke zigok nâmbiek?

¹⁵Ma am ŋenaŋ buŋam zet mmebegalen an ŋen ku indeme mebiek benak beme buŋam zet ke zigok nâmbiek? Kawawaŋgalen Zet Itnaŋanen kapigok meluwaŋ mimiŋaŋ tazin, “Am Kawawaŋgalen Zet Zapat Dolakŋaŋ Penaŋ Nemuŋaŋ ningat Amobotnaŋ nin ndamukulem mimiyet peme toge an zet ke timti ninmagen kobien ekŋen keyaŋ muluwaŋ pembenaŋ penaŋ mip.”

¹⁶Zet Zapat Dolakŋaŋ Penaŋ am sambe ilinsakwep penaŋ ku gawepuwien keyepmti golaŋ zenze an Aizayayaŋ pigok zeye, “Amobotnaŋ buŋam zapat zemkawaŋ bembeŋaŋ an ke am sambeyaŋ ku nâmkiŋpewien.”

¹⁷Keyepmti nin kapigok nânup, Zet Zapat Dolakŋaŋ Penaŋ zemkawaŋ beme nânup keesetgatnaŋ nâmkiŋpepe maaikndain. Ma nan am ekŋen keyaŋ Zet Zapat Dolakŋaŋ Penaŋ Kawawaŋaŋ Kilais ningapmti peme toti gakimti ndage zet ke zemkawaŋ beme nin nânup am ekŋen ke Kawawaŋaŋ zemindeme ninmagen kobien.

¹⁸Yaŋgut notnaŋaŋ in kapigok mene nâgât zesâip, ekŋenaŋ Kawawaŋgalen Zet Zapat Dolakŋaŋ Penaŋ Zisas Kilaisiyet zein ku nâmbien. Ke penaŋ yek. Sam Kawawaŋgalen Zet Itnaŋanen zet ŋen kapigok tazin, “Msat sambe buŋam zapat timti zempalakŋaŋ bemepme amnaŋ nâme delaŋ zemâge. Buŋam zapat keyaŋ msat ilindiŋ bemisikti msat beŋan eyo mepme kopmâge.”

¹⁹Yaŋgut ewe tusumti yaŋkwesisowap, “Islael am ekŋenaŋ zet kapi ku nâip ma zigok?” Kegok yek. Ekŋenaŋ zet kapi nâmtalip. Ŋeŋaŋ Mosesiyaŋ zet pigok kuye ke zemkawaŋ bewi, “Neŋ am Zuda maŋgeen ku sokbembeŋaŋ indatima ekŋenaŋ nen nâmkiŋpem neme ekŋengat dolakŋaŋ nâmindema in ke egomti nâmbekam bemnembep. Neŋ am ekŋen nânâŋinpiŋ indatima in keyet nâmbekam bemti ŋenzinziŋ mbep.”

²⁰Naman bam Aizayayaŋ kiŋgagapiŋ zet windeŋaŋbeŋ kapigok zeye, “Am Zuda maŋgeen ku sokbembeŋaŋ nâgât ku natimamat mulup mbienaŋgut ekŋenaŋ nâmkiŋpemnewien. Am nâgât zem timapmapiŋ mambien ekŋenmagen sosok sokbemindawan.”