1Ŋic mâmâc sasawa kia gawaman jaŋere dâŋ reŋkenʒepieŋ. Kia gawaman gie i Anuturaonec. Juraŋgopieŋ jaŋe Anuture micte juraŋgopieŋ hâcne.
2Irec moc e kia gawaman jaŋere dâŋ qâsuahuc Anuture dâŋ qâsuaocmu. Erâ qâsuaniŋmu jaŋe okacne roniŋmu.
3Ebapa‐jeŋic biaŋne jaŋe kia gawaman jaŋere mi hâwic‐jopaekac, sâqocne baeŋgopieŋ jaŋe ine hâwic‐jopaekac. Irec go hâhâwic tâmiric juzo murâ wiac biaŋne ezemec. Wiac biaŋne etec gore manapie sâckeocmu.
4Kia gawaman jaŋe Anuture kiŋaŋ qaqa hâcne, ŋezicgupie juhâmocmurâ mujarekicne. Go sâqocne bacmuo ine hâwicguzejec, jaŋe ʒika maŋgâŋ mi bajueŋgopieŋ. Jaŋe Anuture kiŋaŋ qaqazi sâqocne bapa jaŋerao bâbâtiŋ gie bahuc okacne jareniŋmu.
5Irec dâŋjeŋic reŋke‐jâmbâŋkezo, erâ i okacnere hâhâwicte sawa mâcne, gahacne maŋzi tutuc qagarezacte wâc dâŋjeŋic reŋkezemec.
6Jaŋe Anutuzi soŋaŋ gie mujarewec i baeŋgopieŋte hâcne ŋoŋe takesi moneŋ râeeŋgopieŋ.
7Eme ŋoŋe wiac mukicne sâc ejarenʒepieŋ: Takesi jajarere mukicne jaŋe takesi jarenʒepieŋ, kiŋaŋ qaqajarere mukicne jaŋe kiŋaŋ qajarenʒepieŋ, araŋ babajarere mukicne jaŋe araŋ bajarenʒepieŋ, sâsâsec‐jopare mukicne jaŋe sâsec‐jopanʒepieŋ.
8Wiac omanere tofa bazupie tarazejec, maŋjauŋte tofa mocjaha babazuc epie tatarane ine mi fokac. Maŋjauŋhec juekaczi sâcmutâc dâŋ reŋkekac muzo.
9Sâcmutâc dâŋ ʒiŋuc mukicne: Ŋowe ŋonâŋ ŋohe bebehec mi ezepirec, go ʒika mi qazemec, go fiuc mi rozemec, go andac mi ezemec, sâcmutâc dâŋ i erâ gâcne i mâmâc sasawa qâhâckerâ qizecne ʒiŋuc mukicne: Gahacnere egareekac sâc ijaha âgogere egarezejec.
10Maŋjauŋhec juocmuzi âgo‐ticne sâqocne mi ecneocmu. Irec maŋjauŋzi sâcmutâc dâŋrereŋ fârine ekac.
11Iŋuc eniŋte muŋarekicne ŋoŋe dameŋ ʒirec fuŋne manaŋgopieŋ, guŋkonec ɋârerâ faharezo irec ʒâfo maickekac hâcne. Miti fuŋkerâ manambeŋ ira bâbâpiaŋte dameŋ ʒoʒoricne fowec, ʒi ine dameŋ qândâŋkekac.
12Ŋafe tarazo ekacte hae fureocte furic râekac. Irec dapâcte wiac hetararâ tatamackonec sându maro menâŋecko raʒizejec.
13Ʒoaŋ ɋaɋacko jujune pectâc junʒepeneŋ, nâ areŋ â tiwâ kadahe me gae wowo â sasec mamakâc me rârâsi â iiriac i mi ezo, aricne.
14Wofuŋ Jesu Kristo e ŋaqi‐ŋeŋic eme rojunʒepieŋ. Erâ sahac‐ŋeŋiczi sasec bâfuazacte mana manahuc jauŋ bacnenʒepieŋ.
