Romalani 10:3-20

³Ngangau tanali Godaia talkula bulu ngujamai, ja wontiai tanani talkula terkibala, jeruja tanali Godaia talkulani wata wodatarana ngamana warai.

⁴Ngangau jirijiribani jauraia mudani Christus nganai talkulaia, warle morlalu ngundrai.

⁵Ngangau Mosili jirijiribani jauraia talkulandru dakai: “Warle tanana ngankai, nau tanangu tepirila nganai.”

⁶Morlalu ngundranaia talkula jeruja jatai: “Wata jirikangu ngarani jatau: Worana pariwilpani tarala nganai?” Jenia wondrai Cliristus ngarilkala;

⁷“Worana kara mikaraia ngarila nganai?” Jenia wondrai Christus narindru taralkala,

⁸Mina nau jatai? “Jaura jinkangu manani ja jinkangu ngarani jinkangu karakara nganai.” Naupini morlalu ngundranaia jaura nganai, ninaia ngaiani kaukaubai.

⁹Ngangau jidni manali jinkanali Jesus Kapara dikanani, ja jinkangu ngarani morlalu ngundranani, Godali ninaia narindru jiritjibana wonti, jeruja jidni tepi pirna pantjila nganai.

¹⁰Ngangau (ngaiani) ngarali morlalu ngundrai talkulaia, ja manali (ngaiani) dikai tepia.

¹¹Ngangau jaura jatai: “Warle nunkangu morlalu ngundrai, nau wata nintali pantjila nganai”.

¹²Ngangau wata pilki ja pilki parai Juda kana ja Grieka kana; ngangau Naupini pratjanaia Kapara nganai, poto pirna warupotuja, tanali ninaia karkai ngatjinani.

¹³Ngangau warle Kaparaia tala karkai ngatjinani, nau tepi pirna pantjila nganai.

¹⁴Worderu tana ngurunguru nganai ninaia karkananto ngatjinani, nunkangu, tanali wata morlalu ngundrai? Worderu tana ngurunguru nganai nunkangu morlalu ngundrananto, nunkangundru tanali wata ngarana warai? Worderu tana ngurunguru nganai ngarananto jaura jinkinietja panini?

¹⁵Worderu tana ngurunguru nganai jaura jinkinanto, tana wata jinpanani? Worderu dakanala parai: “Worderu manju pirna tanani tidna nganai, tanali ngantjani jaura murlandru kaukaubai, tanali ngantjani jaura tepia potundru kaukaubai!”

¹⁶Wata pratjana nunkangupini ngantjani jaurani pankina warai, ngangau Jesaias jatai: “Kaparajai, warle ngujangujara ngaianinani morlalu ngundrana warai?”

¹⁷Jeruja morlalu ngundrana ngujangujarandru, ja ngujangujara Godaia jaurandru dunkai.

¹⁸Ja ngani jatai: Tanali wata ngarana warai? Morlalu, mita warupotuni tanani ngaiala dunkana wonti, ja mitaia wondirajelu jaura tanani.

¹⁹Ja ngani jatai: Israelali ninaia bulu ngujamana wonti? Ngopera Moses jatai: “Ngato jurana milkirina ngankala nganai kana wolara panini, ja kana wolara patipatini ngato jurana tiri ngankala nganai.

²⁰Jesaias japa ngurujeli jatai: “Tanali ngana manka-mankana warai, tanali ngana wata wontina warai; ngani tanangu wondraterina wonti, tanali ngakangundru wata jakalkana wonti.”