Rom 10:3-20

³Diat, tago dia tuptup ure ra varvatakodo kai God, ma dia tikan upi diat a vatur vapatuan vake ke kadia mangamangana takodo iat, pa dia ga vamolo tar diat ta ra varvatakodo kai God.

⁴Tago Kristo iat ia ra mutuai ra tinata na varkurai upi ra varvatakodo kadiat par dia nurnur.

⁵Tago Moses i tutumu ure ra varvatakodo ta ra tinata na varkurai dari: Ba ta tutana i pait ot pa go ra lavur magit na laun ure diat.

⁶Ma ra varvatakodo ta ra nurnur i biti dari: Koko u tatike dari ta ra balam: To ia na tutua urama ra bala na bakut? (a kukuraina dari, upi na agure vaba Kristo marama liu);

⁷ba: To ia na vana ba ura iat? (a kukuraina, upi na agure vatutua Kristo kan ra minat).

⁸Ma i tatike ra ava? A tinata i maravai piram, i ki ka ta ra balam; ia ra tinata na nurnur, nina ave varvai tana;

⁹tago ona una varvai dovot ma ra ngiem ure Iesu, ba ia ra Luluai, ma una nurnur tuna ta ra balam ba God i ga vatut pa ia mulai kan ra minat, da ga valaun u;

¹⁰tago a tarai dia nurnur upi ra varvatakodo ma ra bala i diat; ma dia varvai dovot bula ma ra ngie i diat upi ra varvalaun.

¹¹Tago ra Buk Tabu i biti: Nina iat muka i nurnur tana pa na vavirvir.

¹²Tago ra Iudaia ma ra Elenas pa dia enana varbaiai; tago ra kopono Luluai ia ra Luluai i diat par, ma i vapealane ra vartabar tadav diat par dia kail pirana.

¹³Tago nina i kail upi ta iang i ra Luluai, da ga valaun pa ia.

¹⁴Ma diat a kail davatane upi nina ba pa dia ga nurnur tana? Ma diat a nurnur dave tai nina ba pa dia ga valongore? Ma diat a valongore davatane ba pa ta tena varveai?

¹⁵Ma gala pa di togue diat, diat a gala varvai dave? Da di ga tumu ia dari: I mariringian ra kau i diat, dia kapkap ra bo na varveai ure ra lavur vakak na magit!

¹⁶Ma pa dia ga torom par ta ra bo na varvai. Tago Iesaia i tatike dari: Luluai, to ia laka i ga kapupi kaveve varvai?

¹⁷Damana ra nurnur i vuna ure ra valavalongor, ma ra valavalongor ure ra tinata kai Kristo.

¹⁸Ma iau biti dari: Dave, pa dia ga valongore laka? Maia pa, a dovotina, “A nilai diat i tar vana ta ra rakarakan a gunagunan par, Ma kadia tinata ta ra langlangun i ra lavur vuna gunan mutu.”

¹⁹Ma iau biti dari: Dave ra Israel, pa dia ga nunure laka? Moses i tatike lua dari: “Ina vangangap avat upi na arikai ra varpin ta vavat ure diat, Ba vakir diat tika na vuna tarai, Ma ina vangangal avat ure tika na vuna tarai dia tabobo.”

²⁰Ma Iesaia i rurung muka, ma i tatike: “Diat nam ba pa dia ga tikan upi iau, dia ga na tadav iau; Ma iau ga vaarike iau ta diat, ba pa dia ga titir upi iau.”