Roma 10:3-20

³Lula rèngu reꞌa boe jꞌara mamuri dhu mola, dhu bisa pabeꞌa dhèu dènge Lamatua, nèti èèna ka dhèu se bhoke jꞌara unu ra, ho neo sèku pabeꞌa dènge Lamatua. Dènge sèmi èèna, rèngu roꞌo boe nanene Ne.

⁴Ladhe dhèu madhutu dhoka atora di, sèna ka Lamatua sèmi nare si, na, èèna dꞌai mèka. Nèti èèna ka, Kristus pamèci nare aaꞌi mèu-mèu le, sèna ka èdhi bisa pabeꞌa dènge Lamatua. Ka limuri ne dhèu aaꞌi-aaꞌi dhu parcaya Kristus bisa pabeꞌa dènge Ama Lamatua.

⁵Uru èèna, Musa padꞌelo le jꞌara ètu dꞌara Sasuri Mola-Mèci, sèna ka dhèu bisa pabeꞌa dènge Ama Lamatua, sadꞌi ra tao madhutu aaꞌi mèu-mèu Atora Lamatua. Nèngu suri, peka na, “Dhèu cee dhu tao madhutu aaꞌi Atora ne, bèli-camèdꞌa rèngu abhu mamuri mola.”

⁶Te ngaa Sasuri Mola-Mèci Lamatua padꞌelo jꞌara leo, peka na, dhèu bisa pabeꞌa dènge Ama Lamatua sadꞌi rèngu parcaya Yesus Kristus. Dhu suri tèke, na, “Mage karèi, peka na, ‘Cee ka dhu bisa caꞌe asa sorga?’ ” (Èèna, nuka sèmi dhèu neo caꞌe laꞌe peka dènge Kristus, na, èdhi dhèu rai-haha dꞌèi ladhe Nèngu puru mai sèna ka hia mamuri mi èdhi.)

⁷Sasuri Mola-Mèci suri kahèi, peka na, “Mage karèi, na ‘Cee ka dhu neo puru laꞌe asa dꞌara naraka, ètu era dhèu madhe sèra?’ ” (Èèna, nuka sèmi dhèu dhu puru laꞌe ho pacaꞌe Kristus nèti era mamadhe Na, sèna ka hia mamuri mi èdhi.)

⁸Baku sèmi èèna! Te ètu dꞌara Sasuri Mola-Mèci suri, na, “Lii moa nèti Lamatua ètu katanga madha èu! Te lii moa èèna abhu le ètu hèbꞌa dènge dꞌara èu.” Lii moa ne dhu èdhi peka-padhai dènge dhèu, peka na, “Ladhe èu neo abhu mamuri, na, hudꞌi parcaya ku Kristus!”

⁹Ladhe èu mangaku dènge hèbꞌa mu, peka na, “Kristus èèna, Kètu jaꞌa,” aa parcaya ètu dꞌara èu, na, Ama Lamatua pamamuri hari le Yesus Kristus nèti mamadhe Na, ka Ama Lamatua patabuli èu nèti koasa sasala-sasigo èu.

¹⁰Te ladhe èu parcaya Kristus dènge dꞌara kateme, Ama Lamatua cap èu, peka na, èu dhèu dꞌara mola dhu pabeꞌa dènge Ne. Aa ladhe èu mangaku dènge hèbꞌa mu, peka na, Yesus jꞌajꞌi Kètu èu, Ama Lamatua patabuli èu nèti koasa sasala-sasigo èu kahèi.

¹¹Ètu dꞌara Sasuri Mola-Mèci Lamatua, dhu suri, peka na, “Cee dhu parcaya Ama Lamatua, bèli-camèdꞌa, naꞌe boe makae, lula Lamatua neo tao jꞌajꞌi aaꞌi mèu-mèu, ngaa dhu Na peka nare le.”

¹²Dhèu Yahudi dènge dhèu Yahudi boe, èci èèna ka. Beda boe. Abhu dhoka Kètu èci di, aa Nèngu ka Kètu nèti suku aaꞌi-aaꞌi. Nèngu neo padꞌelo dꞌara hua iia Na ae-ae mi dhèu aaꞌi-aaꞌi dhu manèngi bara nèti Nèngu.

¹³Te ètu dꞌara Sasuri Mola-Mèci dhu suri, na, “Dhèu aaꞌi-aaꞌi dhu manèngi Lamatua soru-bara si, pe Nèngu patabuli si nèti koasa sasala-sasigo ra.”

¹⁴Te ngaa tasamia dhèu bisa manèngi bara nèti ca dhèu, ladhe rèngu dhae parcaya mèka ne? Aa tasamia rèngu bisa parcaya ne, ladhe rèngu dhae tadèngi mèka jꞌara mamuri dhèu ne? Tasamia rèngu bisa tadèngi lula-nèti nèngu ne, ladhe abhu boe dhèu dhu lole dènge ra?

¹⁵Aa tasamia rèngu bisa lole dènge dhèu, ladhe abhu boe dhu pua-paleha si? Ètu dꞌara Sasuri Mola-Mèci, peka na, “Ladhe dhèu rèti mai Lii Lolo Beꞌa, mamai dhèu seꞌe se beꞌa titu kèna!”

¹⁶Te ngaa miu kahèi meꞌa, na, abhu dhèu Israꞌel cahagꞌe roꞌo boe nanene Lii Lolo Beꞌa Lamatua. Te Yesaya, ca dhèu dhu nèti lii padhai Lamatua, suri peka na, “Lamatua! Dhèu seꞌe roꞌo boe lèka lii moa dhu rèngu tadèngi le nèti jiꞌi!”

¹⁷De ladhe neo parcaya Ama Lamatua, na, hudꞌi nanene uuru ku Lii Holo-Nori Na. Aa neo meꞌa lii moa Na, hudꞌi tadèngi uuru ku lula-nèti Kristus.

¹⁸Jaꞌa karèi sèku, sèmi neꞌe: ele boe miu pangee, na, dhèu Israꞌel sèra tadèngi rèdhi mèka lula-nèti Kristus, do? Tatu ra tadèngi le! Nuka sèmi dhèu dhu suri tèke ètu dꞌara Sasuri Mola-Mèci Lamatua, peka na, “Dhèu rèti lii padhai Lamatua, dhu palolo lula-nèti Lamatua ne pale-palème le rai-haha; Lii rèngu dꞌai aaꞌi le palème rai-haha toke dꞌai suu-suu rai.”

¹⁹Jaꞌa neo karèi hari ca jꞌara, “Dhèu Israꞌel sèra dhane rare mèka jꞌara Ama Lamatua, do?” Musa ka, dhèu uru jꞌara dhu suri peka na, Lamatua peka mi dhèu Israꞌel sèmi neꞌe: “Jaꞌa neo tao jꞌara èci hia dhèu nèti suku leo sèra. Jꞌara ne tao miu tèka dꞌara. Aa Jaꞌa neo tao jꞌara èci, hia dhèu dhu mi pangee na kahadhu ènyu. Jꞌara ne tao miu kadhi ngutu.”

²⁰Limuri hari, Yesaya suri dhu paledꞌa risi lula-nèti dhèu Yahudi boe, dhu peka na, “Abhu dhèu dhu uru èèna tenge boe Jaꞌa, te ngaa rèngu paraga le dènge Jaꞌa. Abhu dhèu dhu uru èèna manèngi boe ho rèdhi Jaꞌa, te ngaa Jaꞌa padꞌelo iisi le mi rèngu.”