1?Mukave en Ebraham, vati avu onomai Siu keil? ?Kei mai mal en meten Ahi ka en sise sa?
2Veni munak Ebraham mai mal en meten Ahi ven tounah koa kei mumoni, kei kilea vahasi kei en meten meatin sav keil. Ka en meten Ahi, kei sakras vahasi kei ven asa koa mumoni.
3?Ka Tus Votut viten sa? Kei viteni vit, “Ebraham ling demkatien onen en hatkatien onen Ahi. Ka ven koanek, Ahi viteni keke Ebraham mal en meten.”
4Koakeil amum akur ui umen one, ka mal keke avakuri. Arlestei vasuval vi sanien tai.
5Ka Ahi kilea vasak revi meatin tisa keil. Sakini, navong meatin tai ling demkatien onen en Ahi, avaseini romusiltei sise ten mengkatien keil, Ahi viteni keke meatin enek mal en meten.
6Koanik suval asa Deved viteni navong selus usil sien onen koakeil Ahi les keil amal en meten, avaseini armumon etai tounah keke avakuri.
7“Sien hel en koakeil Ahi roleletei mun vatisa en keil ven tisaen one, en koakeil methos onen mul en keil!
8Sien hel en koakeil Iahova herlestei mun armaltei ven tisaen keil one.”
9?Ka mukave? ?Sien enek koa Deved selus usili vi onen koakeil enges uva en vekahoi suval Siu keil? !Vuo! Sien enek onen koakeil emun arvatei en vekahoi. Veni Tus Votut viteni vit, “Ven demkatien onen, Ahi viteni keke Ebraham mal en meten.”
10?Ka Ahi viteni keke Ebraham mal en meten en avong kave varei? ?Mulamu en avong koa Ebraham va en vekahoi, vuo katau eni? !Mulamu! Veni kei rovatei veah en vekahoi, ka Ahi viteni keke kei mal tuai.
11Anatin, Ahi san sakien ten vekahoi min Ebraham suval vi metai tai vatie lati keke mai mal en meten tuai musil sise ten demkatien navong rovatei veah en vekahoi. Ka en sakien koanek, Ebraham mai vi avu onen koakeil umai amal en meten Ahi musil sise ten demkatien, avaseini arvatei en vekahoi.
12Ka en usite sav, Ebraham mai vi avu onen koakeil emun uva en vekahoi koa amusil Ahi ral min vati demkatien koa Ebraham, avu orer telamu, kuri navong rovatei veah en vekahoi.
13Navong Ahi vat kati min Ebraham ka onen keil keke ikur tounah ten out netan koa kei vat kati min keil, rovitei veni Ebraham long kat mengkatien keil onen. !Vuo! Ahi vat kati mukok veni viteni keke kei mal en meten tuai ka en sise ten demkatien.
14Munak vi anatin keke Ahi hesan tounah koa kei vat kati min koakeil enges along kat mengkatien keil onen, meatin tovuol kilea vakuri. Ka hesakin demkatien hervitei tounah, ka hatkatien onen Ahi hehi heisav enges.
15Veni mengkatien keil akur vurohien onen Ahi mita netan en koakeil armusil kattei. Ka navong mengkatien keil atovuol, meatin keil asakras avatali kotehei.
16Sakini, hatkatien koa Ahi mumoni ka en sise ten demkatien. Hemukonek, Ahi hesani min vatiamal keil vasi onen Ebraham housil more envatien onen. Ka hersanteis min koakeil amusil kat mengkatien onen. Ka hesani min koakeil emun aling demkatien one en hatkatien onen Ahi suval koa Ebraham mumoni. Veni Ebraham vi avu orer vasi koa romusil sise ten demkatien.
17Koanek suval koa Tus Votut viteni navong vit, “Numonuk kihi mari avu onen vangi meatin houlu koa ika en kantri keil houlu.” Ebraham ling demkatien onen en Ahi, kei koa kilea voumon tounah koa mat mai vamoul eris, ka koa ren sakin tounah koa romultei veah mulamu hekistal.
18Avaseini sise tovuol emun keke Ebraham vakur titiali kati onen vaka en, kei ling demkatien onen en hatkatien koa Ahi sani mini vit, “Hehi mari avu onen vangi meatin houlu koa ika en kantri keil houlu.” Anatin, kei ling demkatien onen en Ahi koa viteni mini vit, “Vatiamal keil onom ihi houlu vis ihi houlu mok isuval hitu keil ekek.”
19Ebraham romottei en demkatien onen, avaseini sua onen vesesal vatokol handred tai (100) ka kei matu vis matu. Anatin, demkatien onen keih veah, avaseini Serah vi lumalum ka sakras vakur titiali. En usite ten titiali tai, suval koa avealu matu tuai.
20Kei rolokoveintei demkatien onen, ka masmas Ahi veni kilea keke asa koa Ahi vat kati mini hekistal hesuval koa kei viteni. Sakini, demkatien onen Ebraham sakin rendemien onen mai keih imok.
22Sakini, “Ven demkatien onen, Ahi viteni keke Ebraham mal en meten.”
23Ka selusien koa vit, “Ahi viteni keke Ebraham mal en meten,” armutistei ven Ebraham kei sasen enges.
24Amutisi ven ir emun. Veni Ahi, koa rali lat Iesu, Asuv orer, ran matien, kei hehiteni keke ir emun rehemal en meten, navong roling demkatien orer eni.
25Ka musil rendemien onen, asan matien min Iesu ven tisaen keil orer, ka kei mumoni moul eris ran matien vasakin ir romai rovamal en meten.
