Rom 11:2-24

²Kot esap pöütala nöün aramas i a fen filiiretä seni lepopun. Oua silei mine a mak lon ekewe Toropwe mi Pin usun pworausen än Elias tüngormau ngeni Kot o tip ngeni chon Israel,

³“Ai Samol, ra niela noumw kewe soufos o ataetiu om kewe rongen asor. Ngang chök üa chüen manau. Nge ra pwal ekiekin nieila.”

⁴Met Kot a eäni pölüen ngeni Elias? “Üa aimwüela fän itei fisungeröü aramas me lon Israel, ir chokewe resap fel ngeni ewe anü Paal.”

⁵Iei usun mine a pwal fis ikenai. Mi wor eu kükün mwichen aramas, ir chokewe Kot a filiiretä pokiten an ümöümöch.

⁶An afiliiretä a longolong won an ümöümöch, nge sap won mine ra föri. Pun are an fil a longolong won met aramas ra föri, mürin an ümöümöch esap chüen enletin ümöümöch.

⁷Iwe, met? Ekewe aramasen Israel resap küna mine ra kütta. Eu chök kükün mwich Kot a filiiretä ra küna. Nge ekewe ekoch Kot a föri pwe resap tongeni rongorong ngeni an kö.

⁸Usun a mak lon ekewe Toropwe mi Pin, “Kot a föri pwe resap tongeni mefi ika weweiti och. Tori ikenai resap tongeni küna ika rongorong.”

⁹Tafit a pwal apasa, “Amwo ar kewe kametip repwe wiliti eu sär me eu likatuputup fän iter.

¹⁰Amwo meser kewe repwe chunula, pwe resap tongeni küna mwer. Kopwe pwal föri pwe sökürür epwe pwor ren ar riaföü fansoun meinisin.”

¹¹Üa pwal ais: Lupwen ekewe chon Juta ra chepetek, ra turula o unusen feiengau? Apwi, esap ina! Pokiten ra tipis, manau esemüch a tori ekewe chon lükün Israel, pwe ekewe chon Juta repwe lolloletä rer.

¹²Än ekewe chon Juta tipis a atoto watten feiöch ngeni chon fanüfan, nge ar wöüngau lon ngünür a atoto watten feiöch ngeni ekewe chon lükün Israel. Epwe ifan me watten ewe feiöch lupwen unusen chon Juta meinisin repwe kapachelong!

¹³Iwe, iei üpwe kapas ngenikemi chon lükün Israel: Lupwen fansoun üa eman soukünö ngeni ekewe chon lükün Israel, ngang üpwe alapala ai angang.

¹⁴Eli üpwe tongeni föri, pwe püsin aramasei repwe lolloletä, pwe lupwen üpwe angang ngeniir, Kot epwe amanaua ekoch me leir.

¹⁵Pun lupwen Kot a pöütiirela, chon fanüfan ra chä ngeni Kot. Iwe, met epwe fis lupwen Kot epwe etiweer? Epwe fis manau seni mäla.

¹⁶Are a pin och kinikinin pilawa eman a eäni asor ngeni Kot, unusen ewe pilawa a pwal pin. Nge are eman a eäni asor waren efoch irä ngeni Kot, palan kana ra pwal pin.

¹⁷Ekoch palen ewe irä olif eman a tümwünü ra kuputiu, nge palen ewe irä olif mi chök püsin pwükütä lein pötöwöl a kapachelong lepökün. Ämi chon lükün Israel, oua wewe ngeni ewe irä olif mi pwükütä me lein pötöwöl, nge iei oua angei watten feiöch seni ekewe chon Juta, usun chök ewe palen irä olif mi pwükütä lein pötöwöl a angei feiöch seni chönün ewe irä olif eman a tümwünü.

¹⁸Iei mine ousap turunufasei chokewe mi usun chök ekewe palen irä mi kuputiu. Pwota oupwe lamalamtekia? Ämi oua usun chök efoch palen irä. Ämi oua manau seni waren ewe irä, nge waren ewe irä resap manau senikemi.

¹⁹Nge eli oupwe apasa, “Ewer, nge ekewe palan ra kuputiu, pwe epwe wor leniem.”

²⁰Mi pwüng. Ra kuputiu pokiten resap lükü, nge ämi oua nomotiu lon lenier pokiten oua lükü. Iwe, ousap lamalamtekia usun ei, nge oupwe niuokus.

²¹Pun Kot esap achika ekewe chon Juta, ir wesewesen palen ewe irä, ifa usun, oua ekieki pwe epwe achikakemi?

²²Iei mine oupwe ekieki usun än Kot kirikiröch me an pöchökül. A fokun pöchökül ngeni chokewe mi turutiu, nge a kirikiröch ngeni ämi. Are oua sopwela le föri mine a mürina, epwe sopwela le kirikiröch ngenikemi, nge are ousap föri iei usun, pwal ämi oupwe kuputiu.

²³Iwe, are ekewe chon Juta repwe likitala ar lükümang, repwe liwinsefälilong lon lenier me mwan, pun Kot a tongeni aliwinisefäliir.

²⁴Ämi chon lükün Israel, oua wewe ngeni efoch palen ewe irä olif mi püsin pwükütä lein pötöwöl a kuputiu o kapach ngeni efoch irä olif eman a tümwünü, nge esap iei pwüngün ei sokun angang. Ekewe chon Juta ra usun chök ewe irä olif eman a tümwünü. Iwe, epwe fokun mecheres ngeni Kot an epwe apachasefälielong ekewe palen irä mi kuputiu lon lenier me mwan.