Text copied!
CopyCompare
Paipel - Rom

Rom 7

Help us?
Click on verse(s) to share them!
1Pwii kana, oupwe fokun weweiti mine üa mochen kapas ngenikemi usun, pun ämi meinisin oua silei usun allük. Ewe allük a chök nemenem won eman aramas lupwen a chüen manau.
2Eu chök awewe: Eman fefin mi pwüpwülü a riri ngeni pwülüan lon ükükün ränin manauan ren ewe allükün pwüpwülü. Nge lupwen ewe mwän a mäla, ei fefin esap chüen nonom fän ewe allükün pwüpwülü a riri ngeni pwülüan ren.
3Iei mine, are neminei a pwüpwülü ngeni pwal eman mwän lupwen pwülüan we a chüen manau, epwe iteni eman fin lisowu. Nge are pwülüan we a mäla, neminei a ngas seni fän nemenien ewe allükün pwüpwülü, nge esap iteni eman fin lisowu, inamwo are a pwülüeni pwal eman mwän.
4Ämi pwii kana, ina chök pwal usun ämi, oua mäla ngeni ewe Allük pokiten ämi oua eu kinikinin inisin Kraist. Iei ämi oua nöün ätewe Kot a amanauasefäli seni mäla, pwe epwe wor uän ach angang ngeni Kot.
5Pun lupwen sia manau lon fitukach, ewe Allük a aselipato ekewe mochenian tipis lon inisich. Iwe, sia chon angang ngeni mäla.
6Nge iei sia ngas seni fän nemenien ewe Allük pokiten sia fen mäla ngeni mine a fötekinikich. Iwe, sisap chüen angang ngeni Kot lon ewe lapalapen lom ren ewe allük mi makketiu, nge sia angang ngeni lon ewe lapalap mi fö ren Ngünmifel.
7Iwe, met sipwe üra? Sipwe apasa pwe ewe Allük mi tipis? Apwi, esap fokun ina usun! Nge ewe Allük a amefi ngeniei met wewen tipis. Pun üsap weweiti usun mochenia are ewe allük esap apasa, “Kosap mochenia ngeni pisekin eman.”
8Nge tipis a küna eu fansoun mi fich pwe epwe afisätä sokopaten mochenia lon ngang ren ewe allük. Pun are esap wor allük, tipis esap wor an manaman.
9Me lom üa manau lupwen esamwo wor allük mi aiti ngeniei pwe a tipis ai föri föför mi ngau. Nge lupwen üa silei ewe allük, tipis a popuetä le nemenem.
10Iwe, üa mäla. Itä ewe allük epwe aworato manau, nge a chök aworato mäla ngeniei.
11Tipis a küna eu fansoun mi fich, o ren ewe allük tipis a atupuei o nieila.
12Iei usun än Moses kewe Allük ra pin o mine ewe allük a apasa a pwüng o mürina.
13Met wewen ei? Epwe wewen pwe mine a mürina a aworato ai mäla? Apwi, esap fokun ina! Tipis a föri ei. Ren an aea mine a mürina, tipis a aworato mäla ngeniei, pwe epwe pwäpwäla wesewesen lapalapen tipis. Iei usun ren ewe allük a pwäla pwe tipis a fokun ngau.
14Kich mi silei pwe ewe Allük sokun ngün, nge ngang sokun fituk, pwe üa nom fän nemenien tipis.
15Üsap weweiti mine üa föri. Pun üsap föri mine üa mochen föri, nge üa föri mine üa oput.
16Iwe, lupwen üa föri mine üsap mochen föri, a pwä pwe üa tipeeu ngeni pwe ewe Allük a pwüng.
17Iei usun sap ngang wesewesen ewe mi föri ei, nge ewe tipis mi nonom loi.
18Ngang üa silei pwe mine a mürina esap nom loi, wewen esap nom lon fitukei. Pun inamwo ika a nom rei ewe mochenin föri mine a mürina, nge üsap tongeni föri.

19Ngang üsap föri mine a mürina usun üa mochen, nge üa föri mine a ngau, ewe sokun föför ngang üsap mochen pwe üpwe föri.
20Are ngang üa föri mine üsap mochen föri, wewen pwe sap ngang üa föri ei, pwe ewe tipis mi nonom loi.
21Iwe, üa küna pwe ei allük a angang lon manauei: Lupwen üa mochen föri mine a mürina, üa chök filätä ai üpwe föri mine a ngau.
22Pun seni lon letipei üa pwapwaiti än Kot allük.
23Nge üa küna pwal eu allük a angang lon inisi, eu allük mi fiu ngeni ewe allük letipei a tipeeu ngeni, o a fötekiniei fän ewe allükün tipis, ewe a angang lon inisi.
24Ngang eman aramas mi attong o weiresikis! Iö epwe angasaei seni ei inis inisin mäla?
25Kilisou ngeni Kot a angasaei ren ach Samol Jesus Kraist! Iwe, iei usi: Ngang won inisi üa angang ngeni än Kot allük ren letipei, nge lon fitukei üa angang ngeni ewe allükün tipis.