Roma 11:2-24

²Wedà tinàyog se Timanem te menge Judiyo, sìyan pinemallì din gebii. Netegahan tadon iyan so doen insolat diyà te kagi te Timanem tepad te inikagi te telekeliwat te kagi te Timanem si Elias gebii. Pegtawal-tawal din diyà te Timanem, mig-indan sikandin tepad te medaet ininang te menge doma din Judiyo,

³kagi din, “E Pengolo ko, nengimatay dan te menge doma telekeliwat te kagi nikaw. Migbaet dan heman te menge solanan te ipegpemegay day diyà kamno. Sebad ko olò se nesamà egtaking kamno, aw ibeg dan mengimatay heman kanak.”

⁴Meneng kenà olò si Elias se egtaking te Timanem, so seini se inikagi te Timanem diyà kandin, kagi din, “Doen pa pito melalan otaw tinani ko wedà pegsimba te inotaw iningedanan Baal.”

⁵Iling heman kenyan, doen heman songkani menge otaw egtaking te Timanem pengkey pilabok kidon, so pinemallì kidon din pineokit te keido din.

⁶Simpana pemellien olò te Timanem se menge otaw mèpiya se inang dan, kenà iyan lekat te keido din. Meneng pinemallì kidon din kenà pineokit te ininang tadon pengkey mèpiya aw medaet, meneng pinemallì kidon din pineokit te keido din kenitadon.

⁷Yan se doun te netegahan tadon den ini. Pengkey ibeg te keditaan te Judiyo eneng-enengen te Timanem te metòlid dan pineokit te pegtolò dan te menge punù ingkeliwat i Moises, meneng wedà dan iyan kebatog. Pilabok olò se Judiyo pinemallì te Timanem, aw yan se otaw inaneng-aneng din te metòlid dan. Meneng wedà pegpetaga-taga se Timanem te kebenalan diyà te doma Judiyo,

⁸so doen kagi te Timanem insolat tepad te menge Judiyo wedà pemenal kandin, “Impekagsen te Timanem se olo dan amon eked dan pekelabet te kebenalan. Ininang din dan iling te otaw eked kità pengkey doen mata dan, aw eked dineg pengkey doen telinga dan, aw iling dan kenyan lamig songkani.”

⁹Iling heman kenyan se insolat i David gebii, “Pengkey dakel se kànen dan, meneng meinang iyan litag aw belatik aw tokliben, so detengan dan te pelumun.

¹⁰Meinang dan iling te otaw bota amon eked dan kità te kebenalan. Meinang dan iling te otaw bongkog tandà te kelimahan wedad temanan domateng kandan.”

¹¹Nayan, pengkey nekesalà se keditaan te Judiyo so wedà dan pemenal ki Cristo, meneng ikà niyo eg-aneng-aneng te eked den kepakay aw megselsel dan, so kenà iyan benal. Meneng so nekesalà se menge Judiyo, doen den menge otaw kenà Judiyo impelowà te Timanem lekat te salà. Impelowà din dan amon mingà se menge Judiyo kandan aw memenal dan heman.

¹²So nekesalà se menge Judiyo, tinebangan den te Timanem se kedita te otaw te keneyonan. So wedà kinawà se menge Judiyo te ontong ibegay peden te Timanem kandan, doen den ontong imbegay din diyà te menge otaw kenà Judiyo. Pengkey mèpiya se ininang te Timanem sìyan, meneng labi pa mèpiya aw megpesakop heman se kedita te Judiyo diyà ki Cristo.

¹³Nayan, doen isolat ko diyà te kedita niyo kenà Judiyo. Ininang a sogounun i Cristo amon megtoladà a kenyo te kagi din. Ontò a measeb te pegtoladà ko

¹⁴so ibeg ko mingà se menge Judiyo kenyo nemenal, amon doen heman kandan memenal aw mekelowà lekat te salà.

¹⁵Pineokit te pegtinàyog te Timanem te menge Judiyo, mepakay aw megsebad den se menge otaw kenà Judiyo aw Timanem. Pengkey mèpiya iyan, meneng labi pa mèpiya aw mesakop heman se menge Judiyo, so meinang dan iling te otaw neantay lekat te nematay.

¹⁶Se menge Judiyo, iling dan te pan imbegay diyà te Timanem, so aw kandin se sebad lapid te pan, kandin heman se kedakel te pan. Iling dan heman te kayo imbegay diyà te Timanem, so aw kandin se dalid niyan, kandin heman se panga niyan.

¹⁷Ipolingun ko se menge Judiyo wedà pemenal iling te menge panga te kayo iningedanan olibo intanem te Timanem, so tinepò se menge panga niyan. Meneng sikiyo menge otaw kenà Judiyo nemenal, iling kaw te menge panga te kayo timobò doton te kebenesan. Meneng inabat kaw te Timanem lekat te kayo timobò doton te kebenesan aw insogpat kaw din doton te lawa te sìyan kayo intanem din amon tomilles kaw kidoen. Yan sinakop kaw den te Timanem diyà te menge otaw eg-ipaten din iling te menge Judiyo inipat din gebii.

¹⁸Pengkey iling te panga tinepò se menge Judiyo wedà pemenal, meneng ikà niyo eg-aneng-aneng te labi kaw pa mèpiya diyà kandan. Eked kepakay aw megpelangkaw-langkaw kaw, so iling kaw olò te panga. Matay se panga aw wedad dalid te kayo, so lekat te dalid se keseg te panga.

¹⁹Doen besi otaw kenà Judiyo mikagi kanak iling kani, “Meneng labi kay mèpiya diyà te menge Judiyo, so iling dan te panga tinepò amon iselilin kay kandan.”

²⁰Benal se kagi din sìyan te sinelilinan se menge Judiyo, meneng tinepò dan te Timanem so wedà dan pemenal. Inselilin kaw din so nemenal kaw. Yan peg-ahà kaw. Ikà niyo egpelangkaw-langkaw.

²¹Wedà keidowi te Timanem se menge Judiyo wedà taking kandin, pengkey iling dan te ontò panga te kayo din, meneng tinepò din dan. Yan ikà niyo eg-aneng-aneng te pengkey lomengà kaw te pegtaking niyo kandin, gayed kaw din pa keidowan.

²²Pineokit kenyan, netegahan tadon den te doen otaw keidowan te Timanem, aw doen heman otaw ipelumun din. Ipelumun din se otaw nekesalà, meneng keidowan kaw din aw tomayod kaw tomaking kandin. Meneng aw lomengà kaw tomaking kandin, inangen kaw din heman iling te panga tinepò.

²³Meneng aw megselsel se menge Judiyo aw tomaking dan kandin, todà din dan sekopen iling te panga todà isogpat doton te kayo amon tomilles, so mebatog din iyan inangen.

²⁴Sikiyo menge otaw kenà Judiyo, iling kaw te panga tinepò lekat te kayo timobò doton te kebenesan, aw insogpat kaw diyà te kayo intanem, pengkey wedad otaw mig-aneng-aneng te mebatog iyan. Meneng se menge Judiyo iling te panga te kayo intanem. Labi pa mola aw todà dan isogpat diyà te kayo tinepoan kandan.