Roma 11:2-24

²Uplerlawna edonna Nhopliala mutnu-rahanu, maka Ha Nwalir nian oleka la'a ululu memna. Ina-nara ama-hyali, mhioratreria la hya' ed maka ha rakot targa la Puka ralamni la' Elia, la' lera ha naklaka Israela re la'a Uplerlawna. Elia nakot la:

³“Matromlawnu ne! Riy rwen oleka makwohorulu-ktatrulmu re! Ne rweyata-rwaniawua katri'ana maka ha ral nhioi-tniani la O'a. Enekneka amuemueh'a, me iriwra rwenan walia a'u!”

⁴Ne hya' ed maka Uplerlawna hota Ha Nakota la Elia? Uplerlawna Nwahla Eli lirni Niwra: “Hota edon emkade! Yoma A'g e wualir niana riy riwnu wo'itu pua ultarga la' Awuameh'u. Ira edonna rru'u-rtowar ma'ta la uplera-upmati Ba'al.”

⁵Pede hota emkade walia la dodo'ondi. Uplerlawna e Nwalir dioinia Israel riy doma pa E gahani yoma la'a E sniayanni la ira.

⁶Enwalir nian ira onnila sniayanni la' ira. E' edonna Namkek la ira hihi'ini-yapyapni. Yoma maka ha riwra sniayanni plollola de edonna namkek la riy hihi'ini-yapyapni wniehwani-liakatni.

⁷Pa hota emkameni? Riy Israel honona edonna rlernan talan pa ror Uplerlawna rkalwieda emeknekama hya' ed maka ha rwahakhaka, enekneka (cuma) Israel riy dom to'a maka Uplerlawna Nwalir niana. Mere la' Israel mutu korni honona re Uplerlawna Nhi' pa ra'o'ta wat muomuou lia'a Uplerlawna polpuollu.

⁸Pa emeknekama ha rhorat targa la'a Puka ralamni niwra: “Uplerlawna Nhi'a ira wniarorni-wnialaini pa nwal lia riy podku, ne la ululu la'pa dodo'ondi meman pa tlinni-matni ratniutwu.”

⁹Daud nakot walia: “Miollia pa mukni-heparnu ya'anlawna-yemunlawna re plinu-plinnianama rwal lia klierat lawna.

¹⁰Miollia pa yamkekni re rmela-rka'ara, me mtieman targa re totpena rodia pa to'orni rkokioil nohora re pa nodi liarni.”

¹¹Pede hota emkameni owa'ana? Yanpa la' lerni la Yahudi mutnu rler la klieratni de emeknekama e rtuini-rdai pa ta'eni raprir nian owa'ana? Mere hota edon emkade! La'a ir do'oni-halli maka edon rreinian Yesus Kristus de, pede hairi dom to' mutnu-rahanu mana rreiniana Yesus Kristus de pa rlernana yamori-yalewna. Totpa hota la' hade pede riy Yahudi mana ralamni rahniar wialia Uplerlawna ra'ani-pallu la'a Yesus Kristus maka riy mak kden la hairi dom to'a re rlernan oleka pede Yahudi mana riwra rlernana pa rpesiay wiali.

¹²Yahudi atia'a mak kden la nohkeran di de, rlernana ra'ani-pallu mak karehi-kalawna yoma Yahudi re do'oni-halli maka rwayotil oleka yamori-yalewna, onnila Yesus Kristus hihi'ini. Pede la'pa Yahudi honona maka Uplerlawna Nwalir tiaru rwaldioinia pa rreiniana-ra'nana Yesus Kristus totpa ror Uplerlawna rkalwied owa'ana, hota yeher to'a pa Uplerlawna kalwiedni-paitiotni na'ititar rer lia nohkeran di wawannu.

¹³Mere dodo'ondi, a'g e ultier niohora hari tiy ina-nara ama-hyali miy, miaka edonna kler wut lia riy Yahudi. A' di de ghi'a riy makodia Uplerlawna lirni-tunnu la'a miy maka Yahudi atia'a, de akar toto' memna yoma awuarora de ha samomuou eda kniar di.

¹⁴Agha'ar reria a arnu totpena la a knia'ru di ed maka karieiniande a mutwua'lu Yahudi re orgahi ralamni rahniar wal lia ra'a-palu maka Yahudi atia'a miy mliernana, totpena la talan de Uplerlawna Namori-nalewan nan ira.

¹⁵La'pa Uplerlawna Nwayotlia Yahudi re nareiniande Nharia loi-talla la hairi-hairi dom to'a miy pa mior Uplerlawna mpiali owa'an la kalwiedni. Yaho'ma la' ler maka Uplerlawna Nreinian olek Yahudi re onnila ir pesiayni de. Hota hade emekwalima riy mak kmati rmori owa'ana!

¹⁶Ne Abraham, Isak me Yakopa de Uplerlawna gahani ira, pede hota emkade walia, ir duratni-waitni mana, Uplerlawna gahani walia ira. Itala yamanna pa tawalliohor teka (contoh). Nhi'inde la'pa Yahudi re rala prehenni yanullu la Uplerlawna, de hota nnia'eratni de prehenni korni mana Uplerlawna gahani walia. Hota hade emekwalima ora-au id wali. De la'pa au ga'ar de ha samoga de, de hota onni tutnu-akni mana samou walia de.

¹⁷Hota tawalliohora riy Yahudi la'a Saitun tutnu-akni maka rhamin doin la au Saitun ida. Ne Yahudi atia' miy re emolmolan nekama Saitun akni maka rhamin doinia la wo'ora-kawru pa rma rtapla la'a nhiamin gen die, la'a Saitun tutnu-akni mulaliaini de letgarni. Pa hota emolmolan nekama tutnu-akni maka rhamin doin la de nlernana ruri-lai la au Saitun de, de hota miy mliernan walia ra'a-palu yoma Uplerlawna nnio'oni la Yahudi re upni-tgarni.

¹⁸La' hade pede yan memmemna mpiarwah'a nana riy Yahudi maka Uplerlawna Nwayotlia, la'pa emkameni la ir de emekwalima Saitun akni maka ha rhamin dodioinia. Mere la'pa mimiwra mrian inonmi la Yahudi re, mhioratreria! Miy di de emeknekama ha ak tio'a miy. Ne au aki ho'mana hota edonna nalla ga'arni na'ana, mere ga'ar de ed mak kalla ha'akni de na'ana.

¹⁹Mere yanpa hota riy Yahudi atia' id tiy miy die mpiahla li'ru miwra: “Yowa, mere Yahudi re hota emeknekama au tutnu-akni maka ha rhamin doinia re totpena ha rtapla ha'aki id owa'ana la au die. Ne a' die hota emeknekama ha'aki maka ha rtapal walia la au onni de”.

²⁰Hade plola. Mere mhioratreria me! Rhopliala Yahudi re yoma rakleh pesiay. Ne rreinian targho' miy, yoma la'a pesiaymi. La' hade pede yana yehwami natulu-napetan la Yahudi re. Mere mhi' yehwami de mliol yawa, me mimta'ata mhiopliala miy pesiaymi.

²¹Yoma la'pa Uplerlawna Nakleha sniayanni la'a riy Yahudi mak kakleha pesiay, pa Nhopliala pa emeknekama rhopliala au tiutu-aki la mulaliaini de, de hota Enhoplial wali miy yoma mikleha pesiay.

²²Pede ina-nara ama-hyali, itatga de Uplerlawna kalwiedni de inpona. Mere hankeranni lawan walia. Entutg hankeranni la Yahudi maka edon kpesiay. Mere Entutga ralam kalwiedni la Yahudi atia' miy maka kden rer lia E kalwiedni. Mere la'pa miy edonan mdien rer lia pesiaymi, de miy miana hota rhoplial wal miy.

²³Ne la'pa riy Yahudi re ir rolin doinia nhiolli-lietni la'a kleh pesiayni re, de hota Uplerlawna Nreinian owa'an ira, yoma Uplerlawna ed maka kodi plolli pa Nreinian owa'ana re.

²⁴Yoma makden Yahudi atia'a miy emekwalima hatutu-ha'aki maka ha rhamin doini la au Saitun mak kdella wo'ora, maka edon rtera, mere emkade ho'mana rtapal wutga la au Saitun maka ha rterter reria emolmolan walia makden Yahudi, de Israel duratni-waitni re. La'pa Uplerlawna Nreinian Yahudi atia'a miy onnila miy pesiaymi de, hota yeher to'a pa Enreiniana-na'nana owa'an Yahudi re onnila ir pesiayni. Yoma ir er maka Uplerlawna Ntera-nlahu, me ir er maka Uplerlawna Nakot targ ulu oleka E nnio'oni la.