Rom 6

1

2

3

4

5

6

7

8

9

10

11

12

13

14

15

16

¹Iwe, met sipwe üra? Sipwe sopwela le föföri tipis, pwe än Kot ümöümöch epwe lapalapala?

²Apwi, esap fokun ina! Kich sa mäla ngeni tipis, ifa usun ach sipwe tongeni sopwela le föföri tipis?

³Ika ousap silei pwe kich meinisin mi fen papatais lon Kraist Jesus, sia papatais lon an we mäla?

⁴Iwe, ren ach papatais sia peiasepök me i o eti i lon an mäla, pwe usun chök Kraist a manausefäl seni mäla ren amwararen manamanen ewe Sam, ina usun pwal kich sipwe manaueni eu manau mi fö.

⁵Pun are sia eti Kraist lon an we mäla, sipwe pwal fokun eti i lon an we manausefäl.

⁶Iwe, sia silei pwe ewe aramas mi mes a eti Kraist le mäla won an we iräpenges, pwe pöchökülen mochenian ach föri tipis epwe wesila, pun sisap chüen nonom fän nemenien tipis.

⁷Pun lupwen eman aramas a mäla, a ngasala seni fän nemenien tipis.

⁸Are sia eti Kraist le mäla, sia lükü pwe sipwe pwal eti i le manau.

⁹Pun sia silei pwe Kraist a manausefäl seni mäla, o esap chüen tongeni mälasefäl. Iwe, mäla esap chüen nemeni i.

¹⁰Iwe, pokiten a mäli ei sokun mäla, esap chüen wor nemenemen tipis won. Nge mine a manaueni a manaueni fänäsengesin Kot.

¹¹Iei usun pwal ämi oupwe chechemeni pwe ämi oua fen mäla ngeni tipis, nge iei oua manau lon ämi chiechifengen me Kot lon Kraist Jesus.

¹²Tipis esap fokun chüen nemeni inisimi inisin mäla, pun ousap chüen aleasochisi ekewe mochenian fitukemi.

¹³Ousap pwal fokun fangatä och kifetin inisimi ngeni tipis fänäsengesin föför mi ngau, nge oupwe fangala inisimi ngeni Kot usun chokewe mi towu seni mäla o tolong lon manau. Oupwe fokun fangatä unusen inisimi ngeni Kot fänäsengesin föför mi pwüng.

¹⁴Ousap chüen nonom fän nemenien tipis, pun ousap chüen nonom fän nemenien allük, nge oua nonom fän nemenien ümöümöchün Kot.

¹⁵Iwe, nge met chök sipwe apasa? Sipwe föri tipis pokiten sisap chüen nonom fän nemenien allük, nge sia nonom fän nemenien ümöümöchün Kot? Apwi, esap fokun ina!

¹⁶Oua püsin silei, pwe lupwen oua fangatä inisimi ngeni eman pwe epwe nöünikemi chon angang o aleasochis ngeni, oua chon angang ngeni ätewe oua aleasochisi. Ika oupwe aleasochis ngeni tipis, sopolan oupwe mäla, ika oupwe aleasochis ngeni Kot, sopolan oupwe küna pwüng mwen mesan.

¹⁷Nge kilisou ngeni Kot, pwe inamwo ika oua chon angang ngeni tipis me lom, nge iei ren unusen letipemi oua aleasochis ngeni mine a let seni lon ewe afalafal oua rongorong.

¹⁸Oua ngas seni tipis o oua wiliti chon angang ngeni pwüng.

¹⁹Üa aea kapasen awewe seni nonomun manauen aramas pokiten apwangapwangen fitukemi. Me lom oua fangatä unusen inisimi pwe oupwe chon angang ngeni föför mi limengau me föför mi ngau fänäsengesin mine a ngau. Ina usun oupwe fokun fangatä unusen inisimi pwe oupwe chon angang ngeni pwüng fänäsengesin mine a pin.

²⁰Lupwen oua chon angang ngeni tipis, ousap nonom fän nemenien pwüng.

²¹Met sokun feiöch oua angei seni ekei föför oua föriir me lom? Iei oua säw ren, pun sopolor mäla.

²²Nge iei oua ngas seni fän nemenien tipis o oua chon angang ngeni Kot. Feiöchümi pwe oua angei eu manau mi pin, nge sopolan ewe manau esemüch.

²³Pun liwinin tipis mäla, nge än Kot lifang manau esemüch lon Kraist Jesus ach Samol.